 |
ສະຫາຍ ບຸນໂຈມ ອຸບົນປະເສີດ ໄດ້ກ່າວເປີດກອງປະຊຸມວ່າ: ກອງປະຊຸມໃນຄັ້ງນີ້, ແມ່ນມີຄວາມສຳຄັນຫຼາຍ ເພາະວ່າພ້ອມກັນສະຫຼຸບຕີລາຄາຄືນ ກ່ຽວກັບວຽກງານການນໍາພາ-ຊີ້ນໍາວຽກງານຮອບດ້ານຂອງຄະນະບໍລິຫານງານພັກແຂວງ ໄລຍະ 6 ເດືອນຜ່ານມາ ແລະ ວາງທິດທາງແຜນການ 6 ເດືອນທ້າຍປີ ຫຼື ແຜນໝົດປີ 2025, ຈະໄດ້ພ້ອມກັນສະຫຼຸບຕີລາຄາການນໍາພາຂອງຄະນະບໍລິຫານງານພັກແຂວງໃນທຸກຂົງເຂດວຽກງານ ນັບແຕ່ວຽກງານການເມືອງ-ແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານພັດທະນາເສດຖະກິດ-ສັງຄົມ, ວຽກງານຂົງເຂດບໍລິຫານລັດ, ວຽກງານນິຕິບັນຍັດ, ວຽກງານຕຸລາການ-ຍຸຕິທໍາ, ວຽກງານແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ ຕະຫຼອດຮອດວຽກງານກໍ່ສ້າງພັກ-ພະນັກງານ ແລະ ວຽກງານກວດກາ ກວດສອບພາຍໃນແຂວງ ແລະ ຮັບຟັງການປະກອບຄຳຄິດຄຳເຫັນຈາກພາກສ່ວນຕ່າງໆ ກ່ຽວກັບວຽກງານຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໄລຍະ 6 ເດືອນຕົ້ນປີ ແລະ ແຜນການທ້າຍປີ 2025 ເພື່ອຕີລາຄາໃຫ້ເລິກເຊິ່ງ, ຍົກໃຫ້ເຫັນຜົນງານທີ່ຍາດມາໄດ້ ເພື່ອສຶບຕໍ່ເສີມຂະຫຍາຍ, ຕີລາຄາຈຸດອ່ອນ-ຂໍ້ຄົງຄ້າງ, ຊອກໃຫ້ເຫັນສາເຫດເພື່ອຈະໄດ້ເອົາໃຈໃສ່ປັບປຸງແກ້ໄຂ ແລະຖອດຖອນບັນດາບົດຮຽນຈາກການຈັດຕັ້ງປະຕິບັດວຽກງານຕົວຈິງໃນໄລຍະ 6 ເດືອນຜ່ານມາ ເພື່ອນໍາໄປຜັນຂະຫຍາຍ; ພ້ອມນັ້ນ ຈະໄດ້ພ້ອມກັນຄົ້ນຄວ້າປະກອບຄຳເຫັນໃສ່ທິດທາງການນໍາພາ-ຊີ້ນໍາຂອງຄະນະພັກແຂວງໃນໄລຍະ 6 ເດືອນທ້າຍປີ ກໍຄືທິດທາງແຜນການໝົດປີ 2025 ທີ່ຈະຕ້ອງສູ້ຊົນຈັດຕັ້ງປະຕິບັດ ແນໃສ່ນໍາພາ ແລະ ຊີ້ ນໍາການປັບປຸງພັກທາງດ້ານການເມືອງ-ແນວຄິດ, ປັບປຸງການຈັດຕັ້ງໃຫ້ປອດໃສ, ເຂັ້ມແຂງ, ໜັກແໜ້ນ; ຕັ້ງໜ້າແກ້ໄຂບັນດາປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ເພື່ອຜັນຂະຫຍາຍ 2 ວາລະແຫ່ງຊາດໃນການແກ້ໄຂບັນຫາຢາເສບຕິດ ແລະ ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແກ້ໄຂຄວາມທຸກຍາກຂອງປະຊາຊົນ.
ສະຫາຍເລຂາພັກແຂວງ ຍັງໄດ້ຮຽກຮ້ອງໃຫ້ບັນດາສະຫາຍ ຈົ່ງພ້ອມກັນສຸມສະຕິປັນຍາ ແລະ ຍົກສູງຄວາມຮັບຜິດຊອບຂອງຕົນເຂົ້າໃນການຄົ້ນຄວ້າຄິດຫງຳ ແລະ ປະກອບຄຳເຫັນຢ່າງຕັ້ງໜ້າ; ເອົາໃຈໃສ່ແລກປ່ຽນບົດຮຽນຈາກພຶດຕິກຳຕົວຈິງຂອງພະແນກການ, ກົມກອງຂອງຕົນ; ອັນສຳຄັນແມ່ນຢາກໃຫ້ພວກສະຫາຍ ລົງເລິກປະກອບຄຳເຫັນໃສ່ຮ່າງບົດລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສໍາຫຼວດການນໍາພາລວມຂອງຄະນະບໍລິຫານງານພັກແຂວງ ຊຸດທີ IX ຕໍ່ກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ ໃຫ້ມີເນື້ອໃນທີ່ຄົບຖ້ວນ ແລະ ສົມບູນຍິ່ງຂຶ້ນ.
ໃນກອງປະຊຸມ, ຜູ້ແທນທີ່ເຂົ້າຮ່ວມຈະໄດ້ຮັບຟັງການຜ່ານບົດສະຫຼຸບການນຳພາ-ຊີ້ນຳວຽກງານຮອບດ້ານຂອງຄະນະບໍລິຫານງານພັກແຂວງປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2025, ຮັບຟັງການລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານປະຈຳ 6 ເດືອນຕົ້ນປີ ແລະ ທິດທາງແຜນການສູ້ຊົນ 6 ເດືອນທ້າຍປີ 2025, ເຜີຍແຜ່ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI, ຜ່ານຮ່າງລາຍງານການເມືອງກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ X, ຜ່ານຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X. ຈາກນັ້ນ, ຜູ້ເຂົ້າຮ່ວມກໍຈະໄດ້ພ້ອມກັນປະກອບຄໍາເຫັນໃສ່ຮ່າງບົດລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສໍາຫຼວດການນໍາພາລວມຂອງຄະນະບໍລິຫານງານພັກແຂວງ ຊຸດທີ IX.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ