 |
ໃນກອງປະຊຸມ, ທ່ານ ກົງແກ້ວ ມີວໍລະຈັກ ໄດ້ກ່າວເປີດກອງປະຊຸມວ່າ: ການດໍາເນີນກອງປະຊຸມ ຄັ້ງນີ້, ເປັນການປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງ, ອີກດ້ານໜຶ່ງ ເປັນຄວາມພະຍາຍາມ ແລະ ຄວາມເອົາໃຈໃສ່ຂອງສະພາປະຊາຊົນແຂວງໃນການຈັດຕັ້ງຜັນຂະຫຍາຍແນວທາງນະໂຍບາຍປ່ຽນແປງໃໝ່ຂອງພັກໃຫ້ເປັນອັນລະອຽດເຂົ້າໃສ່ເນື້ອໃນຂອງລັດຖະທໍາມະນູນ, ກົດໝາຍເພື່ອໃຫ້ມີການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍໃຫ້ມີປະສິດທິພາບສູງຂຶ້ນເລື້ອຍໆ. ພ້ອມດຽວກັນນີ້, ເພື່ອພິຈາລະນາຮັບຮອງເອົາການປັບປຸງກົງຈັກການຈັດຕັ້ງພະແນກການຂັ້ນແຂວງ ແລະ ອົງການລັດທຽບເທົ່າພະແນກຂັ້ນແຂວງໃຫ້ມີຄຸນນະພາບ ແລະ ບັນລຸຜົນຕາມແຜນການທີ່ວາງໄວ້ ແລະ ຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງ, ບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຈົ່ງໄດ້ນໍາໃຊ້ສິດປະຊາທິປະໄຕ, ເສີມຂະຫຍາຍຫົວຄິດປະດິດສ້າງ ແລະ ເຊີດຊູຄວາມຮັບຜິດຊອບການເມືອງຂອງຕົນ, ປະກອບຄຳເຫັນ, ພິຈາລະນາຮັບຮອງຢ່າງຖີ່ຖ້ວນ, ສ້າງສັນ, ຮັດກຸມ, ພາວະວິໄສ, ມີເຫດ ມີຜົນ, ແທດຕົວຈິງບົນພື້ນຖານແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ຕາມລັດຖະທໍາມະນູນ, ກົດໝາຍຂອງລັດ ແລະ ສະພາບຄວາມເປັນຈິງທາງດ້ານເສດຖະກິດ-ສັງຄົມຂອງແຂວງໃນປັດຈຸບັນ. ຄຽງຄູ່ກັນນີ້, ກໍພ້ອມກັນຊອກຫາວິທີການ, ມາດຕະການ ທີ່ສອດຄ່ອງເພື່ອແກ້ໄຂບັນດາບັນຫາຮີບດ່ວນ ແລະ ເຄັ່ງຮ້ອນໃນປັດຈຸບັນ. ເອກະພາບສູງຕໍ່ເນື້ອໃນທີ່ນໍາມາພິຈາລະນາໃນກອງປະຊຸມຄັ້ງນີ້ເພື່ອສາມາດຮັບຮອງຢ່າງມີປະສິດທິຜົນ.
ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ໄດ້ຜ່ານບົດສະເໜີກ່ຽວກັບການປັບປຸງກົງຈັກການຈັດຕັ້ງພະແນກການຂັ້ນແຂວງ ແລະ ອົງການລັດທຽບເທົ່າພະແນກຂັ້ນແຂວງ, ເພື່ອໃຫ້ສະພາປະຊາຊົນແຂວງພິຈາລະນາຮັບຮອງ, ເຮັດໃຫ້ກົງຈັກການຈັດຕັ້ງຂອງບັນດາພະແນກການຂັ້ນແຂວງເປັນລະບົບຄົບຊຸດ, ສອດຄ່ອງກັບລັດຖະທໍາມະນູນ, ກົດໝາຍ ແລະ ມະຕິ ຂອງຄະນະບໍລິຫານງານສູນກາງພັກເລກທີ 03/ຄບສພ, ລົງວັນທີ 12 ມີນາ 2025 ວ່າດ້ວຍການປັບປຸງກົງຈັກການຈັດຕັ້ງ, ທັງຮັບປະກັນໃນການເຄື່ອນໄຫວວຽກງານເປັນປົກກະຕິ ແລະ ຕໍ່ເນື່ອງ; ເພື່ອໃຫ້ກອງປະຊຸມພິຈາລະນາ ຮັບຮອງເອົາການປັບປຸງກົງຈັກການຈັດຕັ້ງ ບັນດາພະແນກການຂັ້ນແຂວງດັ່ງນີ້: ໂຮມພະແນກແຜນການແລະ ການລົງທຶນແຂວງ ເຂົ້າກັບພະແນກການເງິນແຂວງ ເປັນພະແນກການເງິນແຂວງ; ໂຮມພະແນກພະລັງງານ ແລະ ບໍ່ແຮ່ແຂວງ ເຂົ້າກັບພະແນກອຸດສາຫະກໍາ ແລະ ການຄ້າແຂວງ ເປັນພະແນກອຸດສາຫະກໍາ ແລະ ການຄ້າແຂວງ; ໂຮມພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ເຂົ້າກັບພະແນກກະສິກໍາ ແລະ ປ່າໄມ້ແຂວງ ເປັນພະແນກກະສິກໍາ ແລະ ສິີ່ງແວດລ້ອມແຂວງ; ໂຮມພະແນກພາຍໃນແຂວງເຂົ້າກັບຄະນະຈັດຕັ້ງແຂວງ, ຫ້ອງວ່າການແຂວງ ແລະ ພະແນກການອືີ່ນທີີ່ກ່ຽວຂ້ອງ; ໂອນວຽກຖະແຫຼງຂ່າວອອກຈາກພະແນກຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວແຂວງໄປຂຶ້ນກັບຄະນະໂຄສະນາອົບຮົມແຂວງ; ພ້ອມທັງປ່ຽນຊື່ພະແນກຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວແຂວງເປັນພະແນກວັດທະນະທໍາ ແລະ ທ່ອງທ່ຽວແຂວງ.
 |
ສໍາລັບວຽກ, ກົງຈັກລະອຽດ (ຂະແໜງ, ໜ່ວຍງານ...) ຂອງແຕ່ລະພະແນກທີ່ຖືກໂຮມ, ຍຸບ, ໂອນຈະໄປຂຶ້ນກັບພາກສ່ວນໃດນັ້ນ ແມ່ນປະຕິບັດຕາມກົງຈັກຂັ້ນສູນກາງທີ່ຖືກຮັບຮອງ ແລະ ຕາມການຕົກລົງຂອງຂັ້ນເທິງ, ສະເໜີຄົ້ນຄວ້າພິຈາລະນາ ແລະ ຮັບຮອງເອົາການປັບປຸງກົງຈັກການຈັດຕັ້ງບັນດາພະແນກການຂອງແຂວງສະຫວັນນະເຂດ; ຄົົ້ນຄວ້າພິຈາລະນາຮັບຮອງເອົາກົງຈັກການຈັດຕັ້ງອົງການກາແດງແຂວງ, ດ່ານສາກົນແດນສະຫວັນ ແລະ ດ່ານສາກົນ ຂົວມິດຕະພາບລາວ-ໄທ 2 ເປັນອົງການລັດທຽບເທົ່າຂັ້ນພະແນກການຂອງແຂວງ. ຈາກນັ້ນ, ໃນກອງປະຊຸມຍັງໄດ້ມີການປະກອບຄຳຄິດຄຳເຫັນເຈາະຈິ້ມກ່ຽວກັບການປັບປຸງກົງຈັກການຈັດຕັ້ງພະແນກການຂັ້ນແຂວງ ແລະ ອົງການລັດທຽບເທົ່າພະແນກຂັ້ນແຂວງຈາກບັນດາສະມາຊິກສະພາແຫ່ງຊາດເຂດເລືອກຕັ້ງທີ 13 ແລະ ສະມາຊິກສະພາປະຊາຊົນແຂວງຕື່ມນໍາອີກ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ