ຮອງປະທານສະພາແຫ່ງຊາດ ພ້ອມຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດ.
ໂອກາດນີ້, ທ່ານ ຄຳໃບ ດຳລັດ ໄດ້ກ່າວຈຸດປະສົງ ແລະ ແຜນການເຄື່ອນໄຫວວຽກງານທີ່ແຂວງສະຫວັນນະເຂດໃນຄັ້ງນີ້, ພ້ອມນີ້ ກໍໄດ້ມີການປຶກສາຫາລືຫຼາຍບັນຫາສໍາຄັນຮ່ວມກັນ ກັບ ທ່ານເຈົ້າແຂວງສະຫວັນນະເຂດ ໂດຍສະເພາະກ່ຽວກັບວຽກງານການປະຕິຮູບການສຶກສາຂອງລາວເຮົາທີ່ພັກ ແລະ ລັດຖະບານພວກເຮົາໄດ້ສຸມໃສ່ຈັດຕັ້ງປະຕິບັດໃຫ້ສຳເລັດຕາມແຜນການທີ່ວາງໄວ້.
ທ່ານ ບຸນໂຈມ ອຸບົນປະເສີດ ໄດ້ກ່າວສະແດງຄວາມຕ້ອນຮັບທ່ານຮອງປະທານສະພາແຫ່ງຊາດ ພ້ອມຄະນະ ແລະ ໄດ້ຍົກໃຫ້ຮູ້ສະພາບການຂອງວຽກງານການສຶກສາຢູ່ແຂວງສະຫວັນນະເຂດ, ຊຶ່ງກໍໄດ້ມີຂໍ້ຫຍຸ້ງຍາກຫຼາຍປະການເປັນຕົ້ນ: ການຂາດແຄນຄູ ເຊິ່ງມີໂຕເລກສູງກວ່າ 500 ຄົນໂດຍສະເພາະໃນເຂດຫ່າງໄກສອກຫຼີກ ຊົນນະບົົດ ແລະ ໃນປີນີ້ມີຄູເຂົ້າຮັບບຳນານອີກກວ່າ 300 ຄົນ. ຈາກນີ້, ກໍຍັງມີບັນຫາຄູຄົນດຽວສອນຄວບຫຼາຍຫ້ອງເຮັດໃຫ້ການຮຽນ-ການສອນບໍ່ໄດ້ຄຸນະພາບ, ໂຮງຮຽນໄກ ແລະ ບັນຫາອື່ນໆອີກ. ຕໍ່ກັບສະພາບການດັ່ງກ່າວ, ທາງຄະນະການນຳຂັ້ນແຂວງພວກເຮົາກໍໄດ້ມີຄວາມເປັນຫ່ວງເປັນໄຍ ແລະ ໄດ້ປຶກສາຫາລືຮ່ວມກັນເພື່ອຫາທິດທາງແກ້ໄຂ. ຊຶ່ງເມື່ອບໍ່ດົນມານີ້, ໄດ້ມີການລະດົມທຶນຈາກພາກສ່ວນຕ່າງໆໃນສັງຄົມໄດ້ຈຳນວນກວ່າ 1.4 ຕື້ກີບ ເພື່ອນຳໄປຈັດຊື້ອຸປະກອນການຮຽນ, ຊຸດນັກຮຽນໄປມອບໃຫ້ນັກຮຽນໃນເຂດຫ່າງໄກສອກຫຼີກຂອງແຂວງ.
ສຳລັບແຜນໃນຕໍ່ໜ້າພວກເຮົາຈະໄດ້ແບ່ງເອົາເງິນເກີນແຜນຂອງແຂວງເພື່ອແກ້ໄຂບັນຫາການຂາດແຄນຄູສອນຈຳນວນ 118 ຄົນ ເພື່ອໄປສອນຕາມໂຮງຮຽນແຫ່ງຕ່າງໆໃນເຂດຫ່າງໄກສອກຫຼີກໂດຍສະເພາະໃນເຂດເມືອງເຊໂປນ, ພ້ອມນີ້ ກໍຈະສຸມໃສ່ການແກ້ໄຂເດັກນ້ອຍໃນເກນໃຫ້ໄດ້ເຂົ້າຮຽນ, ການປະລະການຮຽນ, ການປັບປຸງຜູ້ບໍລິຫານການສຶກສາທັງນີ້ກໍເພື່ອແນໃສ່ເພື່ອເຮັດໃຫ້ວຽກງານການສຶກສາພາຍໃນແຂວງພວກເຮົາໄດ້ຮັບການພັດທະນາດີຂຶ້ນກວ່າເກົ່າ.
(ຂ່າວ: ສະຫວັນ)
ຄໍາເຫັນ