ໃນວັນທີ 20 ກຸມພາ ຜ່ານມາ, ທີ່ສູນພັດທະນາ ແລະ ບໍລິການກະສິກໍາ-ປ່າໄມ້ໜອງເຕົ່າ ພະແນກກະສິກຳ ແລະ ປ່າໄມ້ແຂວງ ສະຫວັນນະເຂດ ໄດ້ຈັດກິດຈະກໍາສົ່ງເສີມ ແລະ ບໍລິການກະສິກໍາສູ່ຊຸມຊົນ ຢູ່ບ້ານດົງໝາກຢາງ ນະຄອນໄກສອນພົມວິຫານ. ໂດຍການເຂົ້າຮ່ວມຂອງທ່ານ ປະສົງສິນ ຈະເລີນສຸກ ເຈົ້ານະຄອນໄກສອນພົມວິຫານ, ທ່ານ ຄໍາມອນ ທິລາວົງ ຮອງຫົວໜ້າພະແນກກະສິກໍາ ແລະປ່າໄມ້ແຂວງ, ທ່ານ ນາງ ທິຕິຍາ ປານມະນີ ຮອງຫົວໜ້າກົງສູນໃຫຍ່ແຫ່ງຣາຊະອານາຈັກໄທ ປະຈຳແຂວງສະຫວັນນະເຂດ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດນີ້, ທ່ານ ສຸລິພອນ ພິມມະຈັກ ຫົວໜ້າສູນພັດທະນາ, ບໍລິການກະສິກໍາ ແລະ ປ່າໄມ້ໜອງເຕົ່າ ໄດ້ລາຍງານຈຸດປະສົງຂອງການຈັດກິດຈະກໍາຄັ້ງນີ້ວ່າ: ການຜະລິດສະບຽງອາຫານປະກອບດ້ວຍຫຼາຍປັດໄຈທີ່ຕ້ອງໄດ້ເອົາໃຈໃສ່ແຕ່ລະຂັ້ນຕອນ ຊຶ່ງຄົນສ່ວນຫຼາຍຍັງຖືເບົາ ແລະ ໃຊ້ສານເຄມີໃນການເລັ່ງຜົນຜະລິດ ເຮັດໃຫ້ມີສານພິດຕົກຄ້າງໃນຜົນຜະລິດ ແລະ ຕົກຄ້າງໃນດິນ. ດັ່ງນັ້ນ, ສູນພັດທະນາ, ບໍລິການກະສິກຳ-ປ່າໄມ້ໜອງເຕົ່າ ຈຶ່ງໄດ້ຈັດກິດຈະກຳສົ່ງເສີມ ແລະ ແນະກຳການຜະລິດກະສິກຳແບບຖືກວິທີ ໂດຍໃນປີນີ້ ໄດ້ເລືອກເອົາບ້ານດົງໝາກຢາງ ແລະເຊີນບ້ານໃກ້ຄຽງເຂົ້າຮ່ວມ ຊຶ່ງເປັນບ້ານທີ່ມີທ່າແຮງໃນການຜະລິດ ເພື່ອແນະນຳສົ່ງເສີມການຜະລິດກະສິກຳ. ໂດຍຈະເນັ້ນການບໍລິການໃຫ້ຄຳແນະນຳທາງດ້ານເຕັກນິກວິຊາການກະສິກຳ, ສົ່ງເສີມການປູກຝັງ-ລ້ຽງສັດ ໂດຍໄດ້ຮັບການສະໜັບສະໜູນຈາກມູລະນິທິໄຊພັດທະນາ ປະເທດໄທ.
ທ່ານ ປະສົງສິນ ຈະເລີນສຸກ ໄດ້ກ່າວວ່າ: ໂຄງການດັ່ງກ່າວນີ້, ແມ່ນມີຄວາມໝາຍສຳຄັນຫຼາຍ ຊຶ່ງສະແດງເຖິງການພົວພັນ-ຮ່ວມມືຂອງ 2 ປະເທດ ກໍຄື 2 ແຂວງສະຫວັນນະເຂດ-ມຸກດາຫານ (ມູລະນິທິໄຊພັດທະນາຊຶ່ງເປັນໜ່ວຍງານຫຼັກ) ໃນການດຳເນີນໂຄງການ ແລະ ພັດທະນາທາງດ້ານວິຊາການ, ການສົ່ງເສີມດ້ານເຕັກນິກວິຊາການກະສິກຳ-ປ່າໄມ້. ຖືເປັນໂອກາດທີ່ດີ ໃນການຫັນເອົາເຕັກນິກວິຊາການດ້ານກະສິກຳລົງສູ່ຊຸມຊົນໃຫ້ເຖິງຜູ້ເຮັດການຜະລິດໂດຍກົງ. ຫວັງຢ່າງຍິ່ງວ່າກິດຈະກຳໃນຄັ້ງນີ້ ຈະເກີດມີຄວາມຮູ້ຄວາມເຂົ້າໃຈ ແລະ ການສະດຸ້ງ ຕໍ່ສະພາບການຜະລິດກະສິກຳຂອງພວກເຮົາ ກໍຄືການນໍາເອົາບົດຮຽນອັນໃໝ່ ວິຊາການກະສິກຳດ້ານຕ່າງໆ ມາປັບໃຊ້ເຂົ້າໃນຄອບຄົວຂອງຕົນໃຫ້ເກີ ປະສິດທິພາບສູງສຸດ ສາມາດຜະລິດໃຫ້ກຸ້ມກິນ, ແຮໃວ້ ແລະ ຂາຍເປັນສິນຄ້າ.
(ຂ່າວ: ສະຫວັນ)
ຄໍາເຫັນ