ສະຫວັນນະເຂດເປີດກອງປະຊຸມຄົບຄະນະບໍລິຫານງານພັກແຂວງເປີດກວ້າງຄັ້ງທີ 13ສະໄໝທີ IX

ກອງປະຊຸມຄົບຄະນະບໍລິຫານງານພັກແຂວງສະຫວັນນະເຂດ(ເປີດກວ້າງ)ຄັ້ງທີ 13ສະໄໝທີ IX ໄດ້ດຳເນີນໃນລະຫວ່າງວັນທີ 4-5ມັງກອນ 2024ທີ່ແຂວງສະຫວັນນະເຂດໂດຍການເປັນປະທານຂອງສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ມີບັນດາສະຫາຍຄະນະປະຈຳພັກແຂວງ, ກຳມະການພັກແຂວງ ແລະພາກສ່ວນກ່ຽວຂ້ອງເຂົ້າຮ່ວມ.
    ສະຫາຍບຸນໂຈມ ອຸບົນປະເສີດ ໄດ້ຜ່ານບົດສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ປະຈຳປີ 2023ແລະທິດທາງແຜນການປີ 2024.
ຈາກນັ້ນ, ໃນກອງປະຊຸມໄດ້ລາຍງານລົງເລິກສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງປີ 2023 ແລະ ທິດທາງແຜນການປີ 2024 ຈາກທ່ານ ຄຳຜຸຍ ສີບຸນເຮືອງ ກຳມະການພັກແຂວງ ຫົວໜ້າພະແນກແຜນການ ແລະການລົງທຶນແຂວງ, ລາຍງານການຈັດຕັ້ງປະຕິບັດແຜນງົບປະມານປະຈຳປີ 2023 ແລະທິດທາງແຜນການປີ 2024ຕິດພັນກັບການສ້າງຄວາມເຂັ້ມແຂງດ້ານງົບປະມານ, ເພີ່ມທະວີການຄຸ້ມຄອງ ແລະຕ້ານການຮົ່ວໄຫຼຂອງລາຍຮັບງົບປະມານ, ລາຍງານການຊຸກຍູ້ສົ່ງເສີມການຜະລິດກະສິກຳເປັນສິນຄ້າເພື່ອທົດແທນການນໍາເຂົ້າ ແລະເພື່ອການສົ່ງອອກທີ່ພົ້ນເດັ່ນຂອງແຂວງ, ພ້ອມນັ້ນກໍມີບັນດາພະແນກການຕ່າງໆຂອງແຂວງຂຶ້ນລາຍງານການຈັດຕັ້ງປະຕິບັດໜ້າທີ່ວຽກງານໃນຂະແໜງການຂອງຕົນຮັບຜິດຊອບ, ລາຍງານສະພາບການຮັກສາຄວາມສະຫງົບ ແລະຄວາມເປັນລະບຽບຮຽບຮ້ອຍໃນສັງຄົມ ຕິດພັນກັບການແກ້ໄຂບັນຫາປະກົດການຫຍໍ້ທໍ້ ແລະການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະທິດທາງແຜນການປີ 2024, ຜ່ານມະຕິວ່າດ້ວຍການແຕ່ງຕັ້ງຄະນະຊີ້ນຳ ແລະບັນດາອະນຸກຳມະການກະກຽມ ແລະດຳເນີນກອງປະຊຸມໃຫຍ່ 3 ຂັ້ນຂອງພັກ ແລະຄາດຄະເນແຕ່ລະບາດກ້າວ, ຂັ້ນຕອນການເຄື່ອນໄຫວແຕ່ລະວຽກ ເພື່ອດຳເນີນກອງປະຊຸມໃຫຍ່ອົງຄະນະພັກເມືອງ, ນະຄອນ ແລະແຂວງໃນຕໍ່ໜ້າ, ລາຍງານການປັບປຸງກົງຈັກການຈັດຕັ້ງຢູ່ບັນດາພະແນກການ ແລະທຽບເທົ່າອ້ອມຂ້າງແຂວງ, ຢູ່ບັນດາຫ້ອງການ ແລະທຽບເທົ່າອ້ອມຂ້າງເມືອງ ຕາມຄຳສັ່ງ 190/ຄລສພ, ການກຳນົດຕຳແໜ່ງງານ ແລະການປັບປຸງອົງການປົກຄອງບ້ານ ໃນທົ່ວແຂວງ, ການປະກອບຄຳເຫັນ ແລະປັບປຸງລະບົບການເມືອງຢູ່ຮາກຖານບ້ານຕິດພັນກັບການແກ້ໄຂບັນຫາສາສະໜາ ແລະປະກົດການຫຍໍ້ທໍ້ຢູ່ລຽບຕາມຊາຍແດນຂອງເມືອງເຊໂປນ, ການປະກອບຄຳເຫັນ ຜົນສຳເລັດໃນການປັບປຸງການຈັດຕັ້ງຮາກຖານບ້ານຄິດພັນກັບການປັບປຸງອຳນາດການປົກຄອງບ້ານຕາມທິດຫັນເປັນໜຸ່ມ, ປະກອບຄຳເຫັນການຜັນຂະຫຍາຍຂໍ້ກຳນົດເລກທີ 416/ຄລສພ ລົງວັນທີ 28 ສິງຫາ 2023 ວ່າດ້ວຍການຈັດຕັ້ງ ແລະການເຄື່ອນໄຫວຂອງຄະນະພັກຮາກຖານກຸ່ມບ້ານ ແລະບ້ານໃຫຍ່ ເພື່ອສ້າງຄວາມເຂັ້ມແຂງຢູ່ຂັ້ນຮາກຖານ ແລະບັນຫາອື່ນໆທີ່ປິ່ນອ້ອມໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມຂອງແຂວງໄດ້ຖືກນຳມາສະເໜີໃນກອງປະຊຸມຄັ້ງນີ້ດ້ວຍ. 
ຂ່າວ : ສະຫວັນນະເຂດ