 |
ສະຫາຍ ພົນໂທ ວົງສອນ ອິນປານພິມ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ການເມືອງກອງທັບປະຊາຊົນລາວ ໄດ້ຂຶ້ນຜ່ານບົດລາຍງານຫຍໍ້ ຜົນສຳເລັດການເຄື່ອນໄຫວລົງສຳຫຼວດ ແລະ ສ້າງເປັນເອກະສານມູນເຊື້ອຮ່ອງຮອຍປະຫວັດສາດ ເສັ້ນທາງສາຍພູຫຼວງ-ເສັ້ນທາງໂຮ່ຈິມິນ ເບື້ອງດິນລາວ ໃຫ້ຮູ້ວ່າ: ການສຳຫຼວດ (ລາວ ແລະ ຫວຽດນາມ) ເກັບກຳຂໍ້ມູນຮ່ອງຮອຍປະຫວັດສາດ ຕາມເສັ້ນທາງໂຮ່ຈິມິນ ຜ່ານດິນແດນເບື້ອງລາວ ນັບແຕ່ເມືອງຄໍາເກີດ ແຂວງບໍລິຄໍາໄຊ, ຄໍາມ່ວນ, ສະຫວັນນະເຂດ, ສາລະວັນ, ເຊກອງ, ຈໍາປາສັກ ແລະ ແຂວງອັດຕະປື ຊຶ່ງສາມາດລວບລວມ ແລະ ບັນທຶກໄດ້ ທັງໝົດ 19 ຈຸດ ທີ່ສາມາດຮັບຮອງເອົາເປັນມໍຣະດົກທາງປະຫວັດສາດ ຮ່ວມສຳພັນສູ້ຮົບ, ຄວາມສາມັກຄີພິເສດ ລະຫວ່າງ ລາວ-ຫວຽດນາມ ໃນພາລະກິດຕໍ່ສູ້ປົດປ່ອຍຊາດ ຂອງ 2 ຊາດ ລາວ-ຫວຽດນາມ.
 |
ໃນສະພາບຄວາມເປັນຈິງທາງດ້ານປະຫວັດສາດ ໄດ້ພິສູດໃຫ້ພວກເຮົາເຫັນແລ້ວວ່າ ເສັ້ນທາງໂຮ່ຈິມິນ ຜ່ານດິນລາວ, ບໍ່ພຽງແຕ່ມີພາລະບົດບາດສຳຄັນ ເປັນເສັ້ນທາງລໍາລຽງຂົນສົ່ງຍຸດທະສາດທາງດ້ານການທະຫານ, ພະລາທິການເທົ່ານັ້ນ ແຕ່ຍັງມີບົດບາດອັນສຳຄັນ ກາຍເປັນທີ່ໝັ້ນຍຸດທະສາດ ເປັນບ່ອນອີງປະກອບສ່ວນຊ່ວຍໜູນອັນສຳຄັນໃຫ້ແກ່ການຕໍ່ສູ້ຂອງລາວ, ຂະບວນການຕໍ່ສູ້ປົດປ່ອຍຊາດຂອງປະຊາຊົນພາກໃຕ້ຫວຽດນາມ ແລະ ຂະບວນການຕໍ່ສູ້ປະຕິວັດຂອງປະຊາຊົນກຳປູເຈຍນ, ຕີເອົາຊະນະສັດຕູຜູ້ຮຸກຮານ ກ້າວໄປເຖິງການປົດປ່ອຍພາກໃຕ້ຫວຽດນາມຂອງກອງທັບ ແລະ ປະຊາຊົນຫວຽເນາມ ອ້າຍນ້ອງ.
 |
ພ້ອມນີ້, ກໍໃຫ້ຮູ້ວ່າ: ຜ່ານການຮ່ວມມືຂອງສອງຝ່າຍ ລາວ-ຫວຽດນາມ, ກະຊວງປ້ອງກັນປະເທດ ໄດ້ຈັດພິມເປັນປຶ້ມຂັ້ນພື້ນຖານ ຈໍານວນ 6 ຊຸດ, ລວມມີ 18 ຫົວ ຄື: ປຶ້ມຮ່ອງຮອຍປະຫວັດສາດເສັ້ນທາງສາຍພູຫຼວງ-ເສັ້ນທາງໂຮ່ຈິມິນ 6 ຫົວ; ປຶ້ມຮູບພາບບັນລະຍາຍ 6 ຫົວ; ປຶ້ມແຜນທີ່, ຈຸດທີ່ຕັ້ງຊີ້ບອກເສັ້ນທາງເຂົ້າຫາຮ່ອງຮອຍ ຈໍານວນ 6 ຫົວ. ຫຼັງຈາກການຈັດພິມສຳເລັດ, ກະຊວງປ້ອງກັນປະເທດ ໄດ້ຮ່າງໜັງສືສະເໜີ ໃຫ້ທ່ານນາຍົກລັດຖະມົນຕີ ແຫ່ງ ສປປ ລາວ ພິຈາລະນາຮັບຮອງເອົາບັນດາເອກະສານຢັ້ງຢືນ ແລະ ຈຸດຮ່ອງຮອຍເສັ້ນທາງສາຍພູຫຼວງ-ເສັ້ນທາງໂຮ່ຈິມິນ ເບື້ອງດິນລາວ ເປັນຮ່ອງຮອຍປະຫວັດສາດ ລະດັບຊາດ ຂອງຊາດລາວ (ໂດຍຜ່ານອົງການທີ່ກ່ຽວຂ້ອງ). ໂດຍໄດ້ຮັບການຊີ້ນໍາຂອງທ່ານນາຍົກລັດຖະມົນຕີ ແຫ່ງ ສປປ ລາວ ແລະ ການກວດແກ້ທາງດ້ານເນື້ອໃນເອກະສານຈາກວິຊາການຂອງກົມມໍຣະດົກ ເຫັນວ່າຖືກຕ້ອງຕາມລະບຽບຫຼັກການ, ກໍໄດ້ມີການອອກຂໍ້ຕົກລົງ ແລະ ໃບຢັ້ງຢືນ ສະບັບເລກທີ 1552/ຖວທ, ລົງວັນທີ 16 ທັນວາ 2024 ວ່າດ້ວຍ ການຮັບຮອງເອົາຮ່ອງຮອຍປະຫວັດສາດ ເສັ້ນທາງສາຍພູຫຼວງ-ເສັ້ນທາງໂຮ່ຈິມິນ ເບື້ອງດິນລາວ ເປັນຣະດົກແຫ່ງຊາດ ລະດັບຊາດ ທາງດ້ານປະຫວັດສາດ ຂອງ ສປປ ລາວ.
 |
ຈາກນັ້ນ, ສະຫາຍ ທອງລິດ ຫຼວງໂຄດ ຮອງຫົວໜ້າກົມມໍຣະດົກ ກະຊວງວັດທະນະທໍາ ແລະ ການທ່ອງທ່ຽວ ກໍໄດ້ຂຶ້ນຜ່ານຂໍ້ຕົກລົງດັ່ງກ່າວ ແລະ ພິທີກໍໄດ້ມີການ ມອບ-ຮັບ ໃບຢັ້ງຢືນຮັບຮອງເອົາຮ່ອງຮອຍປະຫວັດເສັ້ນທາງສາຍພູຫຼວງ-ເສັ້ນທາງໂຮ່ຈິມິນ ເບື້ອງດິນລາວ ເປັນມໍຣະດົກແຫ່ງຊາດ ລະດັບຊາດ ທາງດ້ານປະຫວັດສາດ ຂອງ ສປປ ລາວ ໂດຍ ສະຫາຍ ນາງ ດາລານີ ພົມມະວົງສາ ຮອງລັດຖະມົນຕີກະຊວງວັດທະນະທໍາ ແລະ ການທ່ອງທ່ຽວ ຜູ້ຊີ້ນໍາວຽກງານການທ່ອງທ່ຽວ ເປັນຜູ້ຂຶ້ນມອບ ແລະ ຂຶ້ນຮັບໂດຍ ພົນໂທ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ.
 |
(ຂ່າວ-ພາບ: ສຸກສະຫວັນ)
ຄໍາເຫັນ