ບົດລາຍງານເບື້ອງຕົ້ນທີ່ອອກໂດຍສຳນັກງານຄະນະລັດຖະມົນຕີຍີ່ປຸ່ນໃນວັນທີ 16 ພະຈິກ ນີ້ ຊີ້ໃຫ້ເຫັນວ່າ: ການບໍລິໂພກຂອງພາກເອກະຊົນ ຊຶ່ງກວມເອົາຫຼາຍກວ່າເຄິ່ງໜຶ່ງຂອງເສດຖະກິດ, ຫຼຸດລົງ 0.3% ໃນໄລຍະເດືອນເມສາ-ມິຖຸນາ ຊຶ່ງໄດ້ຮັບແຮງກົດດັນຈາກລາຄາສິນຄ້າທີ່ສູງຂຶ້ນ.
ນອກຈາກນັ້ນ, ການບໍລິໂພກໃນລະຫວ່າງເດືອນກໍລະກົດ ຫາ ເດືອນກັນຍາ ໄດ້ຮັບຜົນກະທົບຈາກແຜ່ນດິນໄຫວຂະໜາດ 7.1 ຣິກເຕີໃນແຂວງຄຸມາໂມໂຕະ ໃນທ້າຍເດືອນກໍລະກົດ ແລະ ຝົນຕົກໜັກ, ໂດຍສະເພາະໃນແຂວງຊິບະ ໃນກາງເດືອນສິງຫາ ຊຶ່ງເຮັດໃຫ້ປະຊາຊົນຫຼຸດຜ່ອນການເດີນທາງ.
ໃນຂະນະດຽວກັນ, ການລົງທຶນທາງທຸລະກິດເພີ່ມຂຶ້ນ 1.6%, ໂດຍມີແຮງຂັບເຄື່ອນຈາກຄວາມຕ້ອງການການລົງທຶນໃນເຕັກໂນໂລຊີທີ່ຊ່ວຍປະຢັດແຮງງານ, ການຫັນປ່ຽນສູ່ລະບົບດີຈີຕອນ ແລະ ເຕັກໂນໂລຊີທີ່ກ່ຽວຂ້ອງກັບປັນຍາປະດິດ (AI). ດ້ານການສົ່ງອອກຫຼຸດລົງ 0.2%, ໃນຂະນະທີ່ການນໍາເຂົ້າເພີ່ມຂຶ້ນ 2.5%, ສຳລັບການລົງທຶນໃນຂະແໜງທີ່ຢູ່ອາໄສຫຼຸດລົງ 1.1%, ສ່ວນການໃຊ້ຈ່າຍຂອງລັດຖະບານຫຼຸດລົງເລັກນ້ອຍ 0.03%.
ຂໍ້ມູນຈາກສຳນັກງານຄະນະລັດຖະມົນຕີຍີ່ປຸ່ນສອດຄ່ອງກັບບົດລາຍງານການຄາດຄະເນເສດຖະກິດຫຼ້າສຸດທີ່ອອກໂດຍທະນາຄານກາງຍີ່ປຸ່ນ (BOJ) ກ່ອນໜ້ານີ້ ຊຶ່ງຊີ້ໃຫ້ເຫັນວ່າການໃຊ້ຈ່າຍຂອງຄົວເຮືອນອ່ອນແອລົງຍ້ອນສະພາບອາກາດເຊັ່ນ: ພາຍຸໄຕ້ຝຸ່ນ, ຝົນຕົກໜັກ ແລະ ຝົນຕົກຕໍ່ເນື່ອງເປັນເວລາດົນ. ໂດຍຂໍ້ມູນຈາກອົງການອຸຕຸນິຍົມວິທະຍາຍີ່ປຸ່ນລະບຸວ່າ: ນະຄອນຫຼວງໂຕກຽວປະສົບກັບຝົນຕົກຕິດຕໍ່ກັນ 37 ມື້ຕັ້ງແຕ່ທ້າຍເດືອນສິງຫາ ຫາ ຕົ້ນເດືອນຕຸລາ ຊຶ່ງເປັນສະຖິຕິທີ່ຍາວນານທີ່ສຸດເທົ່າທີ່ເຄີຍມີມາ.
ນອກຈາກນີ້, BOJ ຍັງລະບຸວ່າ: ຄ່າຄອງຊີບທີ່ເພີ່ມຂຶ້ນຢ່າງຕໍ່ເນື່ອງຍັງເຮັດໃຫ້ຜູ້ບໍລິໂພກມີຄວາມລະມັດລະວັງໃນການໃຊ້ຈ່າຍຫຼາຍຂຶ້ນ, ໂດຍສະເພາະຜູ້ທີ່ໄດ້ຮັບເງິນບຳນານທີ່ກຳລັງປະຢັດຫຼາຍຂຶ້ນ.
ການໃຊ້ຈ່າຍຂອງຜູ້ບໍລິໂພກທີ່ອ່ອນແອລົງຊີ້ໃຫ້ເຫັນວ່າ: ຄວາມຕ້ອງການພາຍໃນປະເທດຍັງບໍ່ພຽງພໍທີ່ຈະສະໜັບສະໜູນໃຫ້ອັດຕາເງິນເຟີ້ຢູ່ໃນລະດັບທີ່ເໝາະສົມໄດ້ຢ່າງຍືນຍົງ. ໃນຂະນະດຽວກັນ, ປັດໄຈດ້ານການສະໜອງພາຍນອກ, ໂດຍສະເພາະຄ່າໃຊ້ຈ່າຍດ້ານພະລັງງານ ແລະ ການນຳເຂົ້າອາຫານທີ່ສູງຂຶ້ນ, ສືບຕໍ່ຊຸກຍູ້ອັດຕາເງິນເຟີ້. ຍິ່ງໄປກວ່ານັ້ນ, ການຫຼຸດລົງຂອງການບໍລິໂພກສະທ້ອນໃຫ້ເຫັນເຖິງການຂາດການເຊື່ອມຕໍ່ກັບວົງຈອນເສດຖະກິດໃນທາງບວກທີ່ຜູ້ກຳນົດນະໂຍບາຍກຳລັງພະຍາຍາມສົ່ງເສີມ, ຍ້ອນວ່າການເພີ່ມຂຶ້ນຂອງຄ່າແຮງງານຢ່າງຕໍ່ເນື່ອງບໍ່ສາມາດກະຕຸ້ນຄວາມຕ້ອງ ການໄດ້.
ຄໍາເຫັນ