ເສີມຂະຫຍາຍມູນເຊື້ອສື່ມວນຊົນ-ການພິມຈຳໜ່າຍໃນກອງທັບໃຫ້ມີການພັດທະນາກ້າວຂຶ້ນຢ່າງບໍ່ຢຸດຢັ້ງ

 ໄດ້ໃຫ້ສຳພາດຕໍ່ສື່ມວນຊົນກອງທັບວ່າ: ຕະຫຼອດໄລຍະແຫ່ງການນໍາພາໆລະກິດຕໍ່ສູ້ປົດປ່ອຍຊາດຍາດເອົາເອກະລາດ ແລະ ອິດສະຫຼະພາບມາສູ່ປະຊາຊົນກໍຄືພາລະກິດປົກປັກຮັກສາ ແລະ ພັດທະນາປະເທດຊາດໃນຍ່ານທາງ 49 ປີຜ່ານມາ, ພັກປະຊາຊົນປະຕິວັດລາວ ຍາມໃດກໍຖືເອົາວຽກງານໂຄສະນາສຶກສາອົບຮົມຂົນຂວາຍ ແລະ ຈັດຕັ້ງກໍາລັງມະຫາຊົນເປັນວິທີປະຕິວັດອັນໜຶ່ງ ເພື່ອເປັນກໍາລັງແຮງຂອງການປະຕິວັດລາວ. ໃນນັ້ນ, ວຽກງານສື່ມວນຊົນ ແລະ ການພິມຈຳໜ່າຍເວົ້າສະເພາະແມ່ນປະເພດສິ່ງພິມ ແລະ ສື່ເອເລັກໂຕຣນິກ, ສອງປະເພດສື່ມວນຊົນນີ້ໄດ້ກາຍເປັນອາວຸດອັນແຫຼມຄົມຂອງພັກ ແລະ ເປັນກໍາລັງແຮງສັງລວມຂອງສັງຄົມ ຊຶ່ງຍາມໃດກໍໄດ້ປະກອບສ່ວນຢ່າງຕັ້ງໜ້າເຂົ້າໃນໄຊຊະນະລວມຂອງການປະຕິວັດລາວຕະຫຼອດມາ.

ເພື່ອປະຕິບັດຕາມແນວທາງ-ແຜນນະໂຍບາຍ " ເປີດກວ້າງຂະຫຍາຍແນວໂຮມໄປພ້ອມກັບການຂະຫຍາຍສົງຄາມປະຊາຊົນຢ່າງແຂງແຮງທັງເປັນການໜີບຮັດກຳລັງສັດຕູ”, ກອງປະຊຸມໃຫຍ່ຜູ້ແທນທົ່ວປະເທດຊຶ່ງເປີດຂຶ້ນໃນວັນທີ 13 ສິງຫາ 1950 ໄດ້ຕົກລົງສ້າງຕັ້ງ“ແນວລາວອິດສະຫຼະ” ແລະ ລັດຖະບານລາວຕໍ່ຕ້ານ”ໂດຍມີສະເດັດເຈົ້າສຸພານຸວົງ ເປັນປະທານແນວລາວອິດສະຫຼະ ແລະ ເປັນນາຍົກລັດຖະມົນຕີຂອງລັດຖະບານລາວຕໍ່ຕ້ານ; ໃນມື້ດຽວກັນນັ້ນ, ກອງປະຊຸມໄດ້ຕົກລົງສ້າງຕັ້ງໜັງສືພິມປະຕິວັດຂຶ້ນໂດຍໃສ່ຊື່ວ່າ: ໜັງສືພິມລາວອິດສະຫຼະ". ໜັງສືພິມນີ້, ຮູບນອກເປັນສຽງຂອງແນວລາວອິດສະຫຼະ ແລະ ລັດຖະບານລາວຕໍ່ຕ້ານ, ສ່ວນເນື້ອແທ້ກໍແມ່ນໜັງສືພິມຂອງພັກ ເພື່ອຮັບໃຊ້ໜ້າທີ່ການເມືອງຄື: ພິມເອກະສານຂອງກອງປະຊຸມໃຫຍ່, ພິມຄໍາຮຽກຮ້ອງຂອງລັດຖະບານລາວຕໍ່ຕ້ານ ແລະ ອື່ນໆ; ໜັງສືພິມລາວອິດສະຫຼະໄດ້ສ້າງຕັ້ງໂຮງພິມ “ລາວອິດສະຫຼະຂຶ້ນ. ໂດຍພາຍໃຕ້ການຊີ້ນໍາຂອງທ່ານ ສີຊະນະ ສີສານ ຫົວໜ້າບັນນາທິການທັງເປັນຮອງຫົວໜ້າໂຄສະນາ-ອົບຮົມ-ວັດທະນະທໍາມີຊື່ຫຍໍ້ວ່າ (ຄອວ), ເຄື່ອງພິມ ແລະ ອຸປະກອນຮັບໃຊ້ເວລານັ້ນປະຖົມປະຖານຫຼາຍຈົນຮອດທ້າຍປີ 1953 ຈຶ່ງໄດ້ຫັນໄປສູ່ການພິມດ້ວຍເຄື່ອງຈັກຕີໂປມີທັງໝົດ 2 ເຄື່ອງ (ເຄື່ອງຕີໂປນອນ ແລະ ເຄື່ອງຕີໂປຕັ້ງ) ແລະ ມີການຈັດລຽນຕົວໜັງສື. ນັບແຕ່ມື້ສ້າງຕັ້ງພັກ (ວັນທີ 22 ມີນາ 1955) ເປັນຕົ້ນມາ, ພັກເຮົາຍິ່ງເອົາໃຈໃສ່ໃກ້ຊິດຊີ້ນໍາໜັງສືພິມປະຕິວັດເພື່ອເຮັດສຳເລັດໜ້າທີ່ຂອງຕົນ. ມາຮອດວັນທີ 6 ມັງກອນ 1956. ກອງປະຊຸມໃຫຍ່ຜູ້ແທນທົ່ວປະເທດຂອງແນວລາວອິດສະຫຼະ ທີ່ໄຂຂຶ້ນຢູ່ແຂວງຫົວພັນໄດ້ຕົກລົງປ່ຽນຊື່ແນວລາວອິດສະຫຼະ ມາເປັນແນວລາວຮັກຊາດເພື່ອໃຫ້ສອດຄ່ອງກັບໜ້າທີ່ການເມືອງໃນໄລຍະນັ້ນພ້ອມທັງປ່ຽນຊື່ໜັງສືພິມລາວອິດສະຫຼະມາເປັນໜັງສືພິມລາວຮັກຊາດ ແລະ ເປັນໜັງສືພິມ “ສຽງປະຊາຊົນ” ພາຍຫຼັງກອງປະຊຸມໃຫຍ່ຄັ້ງທີ III ຂອງພັກ, ສູນກາງພັກປະຊາຊົນ ປະຕິວັດລາວໄດ້ຕົກລົງປ່ຽນຊື່ໜັງສືພິມ “ສຽງປະຊາຊົນ” ມາເປັນໜັງສືພິມ “ປະຊາຊົນ” ສຽງຂອງສູນກາງພັກປະຊາຊົນປະຕິວັດລາວຈົນເຖິງປັດຈຸບັນ.ຫຼັງຈາກນັ້ນ, ໜັງສືພິມປະຊາຊົນສຽງຂອງສູນກາງພັກປະຊາຊົນ ປະຕິວັດລາວໄດ້ຮັບການພັດທະນາ ແລະ ເຕີບໃຫຍ່ຂະຫຍາຍຕົວເປັນກ້າວໆມາ.

ພາຍຫຼັງພັກປະຊາຊົນປະຕິວັດລາວ ໄດ້ກຳນົດແນວທາງປ່ຽນແປງໃໝ່ຮອບດ້ານ, ມີຫຼັກການຂອງພັກ, ວຽກງານສື່ມວນຊົນຍິ່ງມີບົດບາດສໍາຄັນໃນການເຜີຍແຜ່ແນວທາງປ່ຽນແປງໃໝ່ຂອງພັກ ລົງສູ່ທ້ອງຖິ່ນຮາກຖານປະຊາຊົນ ແລະ ເປີດກວ້າງການຮ່ວມມືກັບຕ່າງປະເທດ ນັບມື້ມີບາດກ້າວຂະຫຍາຍຕົວພົ້ນເດັ່ນຂຶ້ນໃນສັງຄົມ. ເວົ້າສະເພາະສື່ມວນຊົນກອງທັບໃນໄລຍະຜ່ານມາໄດ້ຕັ້ງໜ້າປັບປຸງພາລະບົດບາດ, ໜ້າທີ່ຄວາມຮັບຜິດຊອບເຂົ້າໃນການພັດທະນາວຽກງານດັ່ງກ່າວຕະຫຼອດມາເປັນຕົ້ນແມ່ນໜັງສືພິມ, ວາລະສານປ້ອງກັນຊາດ, ວິທະຍຸກະຈາຍສຽງ ແລະ ໂທລະພາບກອງທັບໃຫ້ມີຄວາມຄົມແຫຼມ, ຫຼາກຫຼາຍສີສັນ ແລະ ທັນສະໄໝຂຶ້ນເທື່ອລະກ້າວສ້າງຄວາມດຶງດູດຕໍ່ຜູ້ອ່ານ, ຜູ້ຟັງ ແລະ ຜູ້ຊົມຮັບໃຊ້ໜ້າທີ່ການເມືອງໃນຖານະເປັນກະບອກສຽງຂອງຄະນະພັກກະຊວງປ້ອງກັນປະເທດປະກອບສ່ວນອັນສໍາຄັນເຂົ້າໃນການປຸກລະດົມຊຸກຍູ້ການປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ພັດທະນາປະເທດຊາດ. ຕໍ່ກັບວຽກງານພິມຈຳໜ່າຍໄລຍະຜ່ານມາໄດ້ເອົາໃຈໃສ່ຢ່າງຕັ້ງໜ້າໃນການຄຸ້ມຄອງ, ຊຸກຍູ້ສົ່ງເສີມ, ສ້າງແຜນພັດທະນາວຽກງານພິມຈຳໜ່າຍໃຫ້ມີບາດກ້າວຂະຫຍາຍຕົວຂຶ້ນເລື້ອຍໆ ສາມາດຮັບໃຊ້ໜ້າທີ່ການເມືອງທັງເປັນການເຜີຍແຜ່ຜົນງານດ້ານຊັບສິນທາງປັນຍາ, ສະໜອງຂໍ້ມູນຂ່າວສານດ້ານຕ່າງໆໃຫ້ສັງຄົມ, ສ້າງວິໄສທັດ, ສຶກສາອົບຮົມຄຸນສົມບັດ, ແບບແຜນດຳລົງຊີວິດທີ່ປອດໃສໃຫ້ພະນັກງານ-ນັກຮົບ, ຫຼຸດຜ່ອນບັນຫາ ແລະ ປະກົດການຫຍໍ້ທໍ້ທາງສັງຄົມປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ກໍຄືສ້າງກອງທັບໃຫ້ເປັນກອງທັບປະຕິວັດມີແບບແຜນທັນສະໄໝ.ດັ່ງນັ້ນ, ເພື່ອສືບຕໍ່ເສີມຂະຫຍາຍມູນເຊື້ອ ແລະ ຜົນງານການຈັດຕັ້ງປະຕິບັດວຽກງານຂອງສື່ມວນຊົນ ແລະ ການພິມຈຳໜ່າຍ, ເອົາໃຈໃສ່ບໍາລຸງ-ກໍ່ສ້າງບຸກຄະລາກອນສື່ມວນຊົນ ແລະ ການພິມຈຳໜ່າຍໃຫ້ເປັນລະບົບຕໍ່ເນື່ອງ ແລະ ມີຄຸນນະພາບ, ຍົກສູງຄວາມຮັບຜິດຊອບໃນການປະຕິບັດໜ້າທີ່, ສິດ, ພາລະບົດບາດຂອງຕົນຢ່າງຈິງຈັງ ແລະ ໃຫ້ເກີດຜົນປະໂຫຍດສູງສຸດ, ສືບຕໍ່ເອົາໃຈໃສ່ຄົ້ນຄວ້າເຊື່ອມຊຶມມະຕິຂອງພັກ ແລະ ລະບຽບກົດໝາຍຂອງລັດໃຫ້ເລິກເຊິ່ງ, ເຖິງຖອງ ແລະ ແທດເຖິງກັບວຽກງານຕົວຈິງ, ສືບຕໍ່ປັບປຸງ, ພັດທະນາຕົນເອງໃຫ້ມີການຫັນປ່ຽນໄປສູ່ຄຸນນະພາບໃໝ່, ຕັ້ງໜ້າພັດທະນາໃຫ້ສົມກັບວ່າເປັນກະບອກສຽງທີ່ແຫຼມຄົມຂອງພັກ, ລັດທີ່ແທ້ຈິງ ແລະ ເປັນເຄື່ອງມີຮັບໃຊ້ວຽກງານໂຄສະນາສ້າງຄວາມຮັບຮູ້, ເຂົ້າໃຈໃຫ້ແກ່ສັງຄົມໂດຍສະເພາະວຽກງານນໍາພາຂອງພັກ, ການຄຸ້ມຄອງຂອງລັດ ແລະ ເປັນເວທີສົ່ງເສີມແລກປ່ຽນບົດຮຽນ, ເປັນແຫຼ່ງຂໍ້ມູນຂ່າວສານ, ສາລະຄວາມຮູ້ ແລະ ຕອບໂຕ້ຖ້ອຍທໍານອງຂອງກຸ່ມຄົນບໍ່ດີ, ເອົາໃຈໃສ່ພັດທະນາເນື້ອໃນ, ຮູບການ ແລະ ວິທີການເຄື່ອນໄຫວຂອງສື່ມວນຊົນ ແລະ ການພິມຈໍາໜ່າຍໃຫ້ສາມາດດຶງດູດຄວາມສົນໃຈຂອງຜູ້ອ່ານ, ຜູ້ຝັງ ແລະ ຜູ້ຊົມ. ພ້ອມທັງຮັບປະກັນຕາມ 4 ລັກສະນະຂອງສື່ມວນຊົນຕາມແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ສືບຕໍ່ສຸມໃສ່ໂຄສະນາຜົນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກໃນໄລຍະທ້າຍສະໄໝກໍຄືມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ວ່າດ້ວຍ 4 ໜ້າທີ່ໃຫຍ່ 26 ແຜນງານຕິດພັນກັບການດໍາເນີນກອງປະຊຸມໃຫຍ່ 3 ຂັ້ນຂອງພັກ, ຂະບວນການສ້າງໜ່ວຍພັກປອດໃສເຂັ້ມແຂງໜັກແໜ້ນ, ການເຝິກແອບຮໍ່າຮຽນ, ປັບປຸງກໍ່ສ້າງກຳລັງ, ກຽມພ້ອມສູ້ຮົບ, ການຫັນລົງກໍ່ສ້າງຮາກຖານການເມືອງຕິດພັນກັບການສ້າງທ່າສະໜາມປ້ອງກັນຊາດ-ປ້ອງກັນຄວາມສະຫງົບ, ຂະບວນກິລາກາຍະກຳ-ສິລະປະ-ວັນນະຄະດີ ແລະ ອື່ນໆ, ຍູ້ແຮງການໂຄສະນາບັນດາເຫດການສໍາຄັນຕ່າງໆຂອງພັກ, ຂອງຊາດ ແລະ ກອງທັບເປັນຕົ້ນການຈັດຕັ້ງກະກຽມສະເຫຼີມສະຫຼອງ 3 ວັນປະຫວັດສາດໃນປີ 2025 ໃຫ້ບັນລຸຕາມແຜນການ.

ເນື່ອງໃນໂອກາດວັນສື່ມວນຊົນ ແລະ ການພິມຈໍາໜ່າຍ ຄົບຮອບ 74 ປີ ສະຫາຍ ພົນຈັດຕະວາ ແປ້ນຄຳ ບຸດຈັນແພງ ໄດ້ອວຍພອນໄຊອັນປະເສີດມາຍັງການນໍາພັກ-ລັດ, ຄະນະນໍາກະຊວງປ້ອງກັນປະເທດ, ຄະນະນຳກົມໃຫຍ່ການເມືອງກອງທັບຈົ່ງມີສຸຂະພາບເຂັ້ມແຂງ, ສືບຕໍ່ຊີ້ນໍາ-ນໍາພາວຽກງານສື່ມວນຊົນ ແລະ ການພິມຈຳໜ່າຍໃນກອງທັບໃຫ້ມີການພັດທະນາກ້າວຂຶ້ນຢ່າງບໍ່ຢຸດຢັ້ງ, ອວຍພອນມາຍັງຄະນະພັກ-ຄະນະບັນຊາບັນດາກົມກອງສື່ມວນຊົນໃນກອງທັບໃຫ້ມີສຸຂະພາບເຂັ້ມແຂງພ້ອມກັນສ້າງຜົນງານອັນໂດດເດັ່ນຍິ່ງຂຶ້ນກວ່າເກົ່າໃນການປະຕິບັດໜ້າທີ່ການເມືອງອັນມີກຽດສະຫງ່າຂອງຕົນ ແລະ ມີຜົນສໍາເລັດຢ່າງຈົບງາມ.