ເສີມສ້າງວຽກງານການຮ່ວມມື ເພື່ອສຸຂະພາບເດັກ ໃນ ສປປ ລາວ

ກອງປະຊຸມ, ໄດ້ຍົກໃຫ້ເຫັນວ່າ: ການໃຫ້ວັກຊິນ ແມ່ນການປົກປ້ອງເດັກທີ່ມີປະສິດທິພາບທີ່ສຸດ ຈາກພະຍາດທີ່ອັນຕະລາຍຕໍ່ຊີວິດ, ເປັນວຽກງານບຸລິມະສິດໃນການສ້າງພຸມຄຸ້ມກັນແຫ່ງຊາດ ແລະ ຄວາມມຸ່ງໝັ້ນຂອງລັດຖະບານ; ກະຊວງສາທາລະນະສຸກ ໄດ້ໃຫ້ຄວາມສໍາຄັນຕໍ່ການສ້າງຄວາມເຂັ້ມແຂງ ດ້ານການບໍລິການສັກຢາກວັກຊິນ ແລະ ເພື່ອຮັບປະກັນວ່າເດັກນ້ອຍຢູ່ລາວທຸກໆຄົນໄດ້ຮັບວັກຊິນ, ການມີສ່ວນຮ່ວມຂອງທຸກພາກສ່ວນໃນການສົ່ງເສີມໂຄສະນາກ່ຽວກັບການໃຫ້ວັກຊິນໂປລິໂອໃນລະດັບຊາດແມ່ນມີຄວາມສຳຄັນຫຼາຍຕໍ່ຊຸມຊົນ ແລະ ຢູ່ເຂດຫ່າງໄກສອກຫຼີກ; ການປົກປ້ອງສຸຂະພາບຂອງເດັກແມ່ນຕ້ອງອາໄສຂໍ້ມູນທີ່ໜ້າເຊື່ອຖື ແລະ ການມີສ່ວນຮ່ວມຂອງຊຸມຊົນ ເພື່ອຊ່ວຍກັນໂຄສະນາໃຫ້ປະຊາຊົນລາວບັນດາເຜົ່າ ມີຄວາມເຂົ້າໃຈຕໍ່ວຽກງານປ້ອງກັນ-ຮັກສາສຸຂະພາບ ແລະ ໄດ້ຮັບວັກຊິນກັນພະຍາດຢ່າງຄົບຖ້ວນກວ້າງຂວາງທົ່ວເຖິງ ຕາມຫຼັກການວຽກງານໂພຊະນາການ ຂອງກະຊວງສາທາລະນະສຸກ ເພື່ອໃຫ້ເດັກນ້ອຍລາວທຸກໆຄົນມີສຸຂະພາບທີ່ດີ.

ທ່ານ ກິແກ້ວ ໄຂຄໍາພິທູນ ໄດ້ສະແດງຄວາມຍ້ອງຍໍຊົມເຊີຍ ຕໍ່ອົງການປົກຄອງພັກ-ລັດ ແຕ່ສູນກາງຮອດທ້ອງຖິ່ນ, ອົງການອຸຍນິເຊັບ ປະຈໍາລາວ ແລະ ອົງການຈັດຕັ້ງສາກົນທຸກພາກສ່ວນ ທີ່ໄດ້ເຄື່ອນໄຫວວຽກງານດັ່ງກ່າວ ຢ່າງມີຜົນສຳເລັດໃນແຕ່ລະໄລຍະ ແລະ ໄດ້ເນັ້ນຕື່ມວ່າ: ໃຫ້ທຸກພາກສ່ວນສືບຕໍ່ປັບປຸງລະບົບປະສານງານໃຫ້ມີຄວາມກົມກຽວ, ໃຫ້ມີການແບ່ງວຽກງານກັນລະອຽດກໍານົດພາລະບົດ ບາດຂອງແຕ່ລະພາກສ່ວນໃຫ້ສາມາດເຄື່ອນໄຫວໄດ້ສະດວກ, ຖືກຕ້ອງ ໂດຍສະເພາະການໂຄສະນາສຶກສາອົບຮົມນໍາເອົາແນວທາງຂອງພັກເຂົ້າສູ່ການປະຕິບັດຕົວຈິງຢ່າງເປັນຮູບປະທໍາ, ໂຄສະນາເຜີຍແຜ່ວຽກງານດັ່ງກ່າວໃຫ້ກວ້າງຂວາງທົ່ວເຖິງໃຫ້ປະຊາຊົນໄດ້ຮັບຮູ້ເຂົ້າໃຈ, ນຳພາປະຊາຊົນເຮັດ ແລະ ປະຊາຊົນປະຕິບັດ, ໂຄສະນາດ້ວຍຫຼາຍຮູບແບບ ເປັນຕົ້ນນຳໃຊ້ພາສາທ້ອງຖິ່ນ ແລະ ເຄົາລົບຮີດຄອງປະເພນີທີ່ຖືກຕ້ອງ; ເສີມຂະຫຍາຍບົດບາດຜູ້ຊົງຄຸນວຸດທິໃຫ້ມີສ່ວນຮ່ວມ, ປະກອບສ່ວນເຂົ້າໃນການສຶກສາອົບຮົມໃຫ້ປະຊາຊົນມີການປ່ຽນແປງທາງດ້ານພຶດຕິກຳ, ສ້າງຕາໜ່າງແນວໂຮມຄອບຄົວແນວໂຮມເປັນຄອບຄົວແບບຢ່າງດ້ານສາທາລະນະສຸກ ແລະ ສ້າງຄວາມໝັ້ນໃຈໃນການບໍລິການສຸຂະພາບ ເພື່ອໃຫ້ເດັກທຸກໆຄົນ ໄດ້ຮັບວັກຊິນປ້ອງກັນພະຍາດ ແລະ ຮຽກຮ້ອງໃຫ້ອົງການອຸຍນິເຊັບສືບຕໍ່ໃຫ້ການຮ່ວມມື ແລະ ໃຫ້ການສະໜັບສະໜູນວຽກງານສຸຂະພາບ ໃຫ້ແກ່ ສປປ ລາວ ໃນຫຼາຍຮູບການຕື່ມອີກ.

ຂ່າວ+ພາບ: ເຢ