ສນຊ ສະເໜີ 7 ບັນຫາ ເພື່ອໃຫ້ສະພາແຫ່ງຊາດ ແລະ ສສຊພິຈາລະນາແກ້ໄຂໃນຕໍ່ໜ້າ

ໃນໄລຍະຜ່ານມາ,ສະພາແຫ່ງຊາດ, ຄະນະປະຈຳສະພາແຫ່ງຊາດແລະສະມາຊິກສະພາແຫ່ງຊາດ(ສສຊ), ສະມາຊິກສະພາປະຊາຊົນແຂວງໄດ້ເອົາໃຈໃສປະຕິບັດພາລະບົດບາດ, ສິດ ແລະ ໜ້າທີ່ຂອງຕົນຢ່າງແຂງແຮງຊຶ່ງບັນຫາສ່ວນໃຫຍ່ທີ່ຄະນະປະຈຳສູນກາງແນວລາວສ້າງຊາດໄດ້ສະເໜີແນະຕໍ່ກອງປະຊຸມສະພາແຫ່ງຊາດຄັ້ງຜ່ານມາໄດ້ຖືກແກ້ໄຂແລ້ວກໍຕາມແຕ່ກໍຍັງມີຄໍາສະເໜີ, ສ່ອງແສງຂອງປະຊາຊົນຈຳນວນໜຶ່ງຕໍ່ອົງການອຳນາດລັດຂອງພວກເຮົາ.
ທ່ານ ຄໍາໄຫຼ ສີປະເສີດ ຮອງປະທານຜູ້ປະຈໍາການ ສູນກາງແນວລາວສ້າງຊາດ (ສນຊ) ໄດ້ລາຍງານການຕິດຕາມການເຄື່ອນໄຫວວຽກງານກາງສະໄໝ 5 ປີ (2021-2025)ແລະ ທິດທາງແຜນການທ້າຍສະໄໝຮອດປີ 2025 ແລະ ການຈັດຕັ້ງປະຕິບັດແຜນການປະຈຳປີ2023 ແລະ ທິດທາງແຜນການປີ 2024ຂອງສະພາແຫ່ງຊາດຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IXໃນວັນທີ 10 ພະຈິກນີ້ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານ ຄໍາໄຫຼ ສີປະເສີດ ກ່າວວ່າ: ຜ່ານມາເຖິງວ່າສະພາແຫ່ງຊາດ, ຄະນະປະຈຳສະພາແຫ່ງຊາດແລະສສຊ, ສະມາຊິກສະພາປະຊາຊົນແຂວງໄດ້ເອົາໃຈໃສປະຕິບັດພາລະບົດບາດ, ສິດ ແລະ ໜ້າທີ່ຂອງຕົນຢ່າງແຂງແຮງກໍຕາມ ບັນຫາສ່ວນໃຫຍ່ທີ່ຄະນະປະຈຳ ສນຊໄດ້ສະເໜີແນະຕໍ່ກອງປະຊຸມສະພາແຫ່ງຊາດ ສະໄໝສາມັນເທື່ອທີ 4ໄດ້ຖືກແກ້ໄຂແລ້ວກໍຕາມແຕ່ກໍຍັງມີຄໍາສະເໜີ, ສ່ອງແສງຂອງປະຊາຊົນຈຳນວນໜຶ່ງຕໍ່ອົງການອຳນາດລັດຂອງພວກເຮົາແລະຂໍຖືໂອກາດນີ້,ສະເໜີຕໍ່ສະພາແຫ່ງຊາດ, ສສຊ ເພື່ອພິຈາລະນາຊຸກຍູ້ແກ້ໄຂໃນຕໍ່ໜ້າມີດັ່ງນີ້: 1). ພາຍຫຼັງການແຜ່ລະບາດຂອງພະຍາດໂຄວິດ-19 ເຫັນວ່າ: ພະນັກງານ, ທະຫານ, ຕຳຫຼວດ, ປະຊາຊົນບັນດາເຜົ່າຈຳນວນໜຶ່ງຍັງພົບຄວາມຫຍຸ້ງຍາກດ້ານການຍົກສູງຊີວິດການເປັນຢູ່ ແລະ ການມີສ່ວນຮ່ວມຂອງທົ່ວສັງຄົມ ໃນການຈັດຕັ້ງປະຕິບັດສອງວາລະແຫ່ງຊາດເຊັ່ນ:ບັນຫາເງິນກີບອ່ອນຄ່າ, ຄ່າຄອງຊີບສູງຂຶ້ນ, ບັນຫາຈັນຍາບັນ-ຈັນຍາທຳແພດໝໍ, ຂາດແຄນຄູສອນ,ຂາດແຄນແຮງງານ ແລະ ການຄຸ້ມຄອງເຂດເສດຖະກິດພິເສດ, ບັນຫາເສັ້ນທາງເປ່ເພສັນຈອນບໍ່ສະດວກກະທົບຕໍ່ການຜະລິດ-ທຸລະກິດ, ຕົ້ນທຶນການຜະລິດສູງຂຶ້ນຫຼາຍ; ໂດຍສະເພາະການເປີດປີທ່ອງທ່ຽວລາວປີ 2024 ຊຶ່ງບັນຫາທັງໝົດນີ້, ສະພາແຫ່ງຊາດ, ສນຊ, ສະຫະພັນນັກຮົບເກົ່າແຫ່ງຊາດລາວ, ອົງການຈັດຕັ້ງມະຫາຊົນຂັ້ນສູນກາງພ້ອມກັນຊຸກຍູ້ພາກສ່ວນທີ່ກ່ຽວຂ້ອງຕິດຕາມການແກ້ໄຂຢ່າງຮີບດ່ວນ; 2). ການສ້າງ ແລະ ປັບປຸງກົດໝາຍຂອງບາງຂົງເຂດມີລັກສະນະຟ້າວຟັ່ງແລ່ນນໍາປະລິມານ, ການປະຕິບັດຂັ້ນຕອນການສ້າງ ແລະ ປັບປຸງກົດໝາຍບາງດ້ານຍັງບໍ່ທັນສອດຄ່ອງຕາມກົດໝາຍວ່າດ້ວຍການສ້າງນິຕິກໍາ; ຕົວຢ່າງ: ມີບາງກົດໝາຍປັບປຸງບໍ່ທັນມີການປະເມີນ, ໂດຍບໍ່ໄດ້ລົງທາບທາມປະຊາຊົນຢ່າງກວ້າງຂວາງ(ກົດໝາຍໃໝ່, ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍສິ່ງແວດລ້ອມແລະ ອື່ນໆ); 3). ສະເໜີສະພາແຫ່ງຊາດ ຊຸກຍູ້ການສະໜອງທຶນ ເພື່ອຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການຈັດສັນງົບປະມານແຫ່ງລັດຂອງກະຊວງທີ່ກ່ຽວຂ້ອງ, ທີ່ໄດ້ຮັບຮອງຈາກສະພາແຫ່ງຊາດ ແລະ ອອກເປັນມະຕິຢ່າງເປັນທາງການແລ້ວໃຫ້ຖືກຕາມກົດໝາຍທີ່ກຳນົດ. ໃນຫຼາຍປີຜ່ານມາ ເຫັນວ່າຊັກຊ້າກວ່າກຳນົດເວລາ; 4). ສະເໜີສະພາແຫ່ງຊາດຊຸກຍູ້, ຕິດຕາມກວດກາພາກສ່ວນກ່ຽວຂ້ອງຈັດຕັ້ງປະຕິບັດຜົນການກວດກາຕາມຜົນການກວດສອບທີ່ສະພາແຫ່ງຊາດໄດ້ຮັບຮອງໃຫ້ໄດ້ຮັບການຈັັດຕັ້ງປະຕິບັດຢ່າງເຂັ້ມງວດເຊັ່ນ: ການເກັບກູ້ຊັບສິນ, ເງິນ,ຄຳ, ວັດຖຸມີຄ່າ, ນັບທັງການລົງວິໄນຕໍ່ບຸກຄົນທີ່ລະເມີດວິໄນແຜນການໆເງິນແລະກົດໝາຍບໍ່ເຂັ້ມງວດແລະ ອື່ນໆເຫັນວ່າ: ມີຫຼາຍມະຕິທີ່ສະພາແຫ່ງຊາດຮັບຮອງແລ້ວ ເຫັນວ່າ: ບໍ່ທັນສັກສິດເທື່ອ; 5). ຕໍ່ກັບສະມາຊິກສະພາແຫ່ງຊາດມີບາງກໍລະນີການລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນຂອງສະພາແຫ່ງຊາດໃນແຕ່ລະຄັ້ງເຫັນວ່າ: ສະມາຊິກສະພາບາງທ່ານ ການກະກຽມເນື້ອໃນເອກະສານບໍ່ທັນແທດເໝາະກັບຈຸດພິເສດແຕ່ລະເປົ້າໝາຍຂອງທ້ອງຖິ່ນ; ສ່ວນຫຼາຍມີແຕ່ບັນລະຍາຍເອກະສານສະບັບດຽວ, ເວລາໃຫ້ປະຊາຊົນຊັກຖາມໜ້ອຍຫຼາຍ; 6). ໃນແຜນວຽກການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເຖິງວ່າ: ມີມະຕິ, ມີແຜນການ,ແຕ່ເປັນແຜນກວມລວມທີ່ມະຫາພາກຫຼາຍກ່ວາ,ແຕ່ປະຊາຊົນຢາກໄດ້ແມ່ນໂຄງການ ແລະກິດຈະການຕົວຈິງໃນແຕ່ລະຂະແໜງການແລະແຕ່ລະແຂວງເຮັດຫຍັງແທ້?,ການສົ່ງເສີມການຜະລິດ ເພື່ອທົດແທນການນໍາເຂົ້າກໍຄວນເປັນຮູບປະທຳຕື່ມ, ການຈັດຫາແຫຼ່ງທຶນເພື່ືອສ້າງໂຄງການສາທາລະນະຍັງໜ້ອຍຫຼາຍ,ໃນນັ້ນສະເໜີພິຈາລະນາທຶນສຳລັບການປັບປຸງເສັ້ນທາງຫຼວງແຫ່ງຊາດ, ເສັ້ນທາງຫຼວງແຂວງ-ແຂວງ, ເມືອງ-ເມືອງຕື່ມອີກແລະຕ້ອງມີທາງອອກໃຫ້ຊັດເຈນແຕ່ຫົວປີ;7). ການປະຕິບັດວາລະແຫ່ງຊາດກ່ຽວກັບການແກ້ໄຂບັນຫາຢາເສບຕິດ:ສະເໜີໃຫ້ເປີດຂະບວນການທີ່ກວ້າງຂວາງທົ່ວສັງຄົມແລະມີການບັນຊາປະຕິບັດເປັນປະຈຳວັນ, ສະເໜີໃຫ້ພິຈາລານາແກ້ໄຂໄວເຂົ້າຕື່ມຕໍ່ສູນບໍາບັດຜູ້ເສບຢາເສບຕິດເຫັນວ່າ: ແອອັດຫຼາຍເກີນໄປ.
ຂ່າວ: ພູວັນ, ພາບ: ສຸກສະຫວັນ