ສນຊ ສະເໜີສະພາ ສືບຕໍ່ຕິດຕາມກວດກາ ຊຸກຍູ້ໃຫ້ລັດຖະບານແກ້ໄຂບັນຫາຕ່າງໆ

ທ່ານ ລາວປາວຊົ່ງ ນະວົງໄຊ ກຳມະການສູນກາງພັກຮອງປະທານສູນກາງແນວລາວສ້າງຊາດ ໄດ້ຕາງໜ້າໃຫ້ຄະນະປະຈຳ ສນຊ, ສະຫະພັນນັກຮົບເກົ່າແຫ່ງຊາດລາວ ແລະ ບັນດາອົງການຈັດຕັ້ງມະຫາຊົນຂັ້ນສູນກາງ ປະກອບຄໍາເຫັນຕໍ່ການປະຕິບັດໜ້າທີ່ຂອງສະພາແຫ່ງຊາດ ແລະ ບັນດາທ່ານສະມາຊິກສະພາແຫ່ງຊາດໃນປີ 2026 ນີ້:ຄວນສືບຕໍ່ເອົາໃຈໃສ່ຕິດຕາມ ກວດກາ ແລະ ຊຸກຍູ້ໃຫ້ລັດຖະບານແກ້ໄຂບາງບັນຫາຕ່າງໆ ດັ່ງນີ້: 1) ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໂດຍສະເພາະການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເຖິງວ່າລັດຖະບານໄດ້ວາງຫຼາຍມາດຕະການ ເຮັດໃຫ້ຄ່າເງິນກີບແຂງຄ່າຂຶ້ນ ທຽບກັບເງິນຕາຕ່າງປະເທດ ແຕ່ໃນສະພາບຄວາມເປັນຈິງລາຄາສິນຄ້າ (ຄ່າຄອງຊີບ, ຄ່າໄຟຟ້າ, ນໍ້າປະປາ, ນໍ້າມັນເຊື້ອໄຟ, ແກ້ສ) ຍັງສູງຄືເກົ່າ ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນລາວບັນດາເຜົ່າ ທີ່ມີລາຍໄດ້ຕໍ່າ ເຫັນວ່າຍັງບໍ່ໄດ້ຮັບການແກ້ໄຂໃຫ້ຢູ່ໃນສະພາບປົກກະຕິໄດ້. ພ້ອມດຽວກັນນັ້ນ, ການແກ້ໄຂບັນຫາຢາເສບຕິດ ແລະ ສະແກມເມີ ຍັງບໍ່ທັນກາຍເປັນຄວາມຮັບຜິດຊອບຂອງທົ່ວສັງຄົມ ແລະ ປະຊາຊົນ ເຖິງແມ່ນວ່າເຈົ້າໜ້າທີ່ຈະໄດ້ເອົາໃຈໃສ່ປາບປາມຢ່າງຈິງຈັງຜ່ານມາ ແຕ່ສະພາບຕົວຈິງ ພວກກຸ່ມຄົນບໍ່ດີຍັງມີການລັກລອບເຄື່ອນໄຫວເປັນວົງກວ້າງ, ແນບນຽນກ່ວາເກົ່າ. 2) ເວລາສ້າງ, ປັບປຸງກົດໝາຍຂອງສະພາແຫ່ງຊາດ ເຫັນວ່າຍັງຂາດການທາບທາມ ແລະ ແທດເຖິງກຸ່ມເປົ້າໝາຍ, ຂາດການມີສ່ວນຮ່ວມຂອງປະຊາຊົນລາວບັນດາເຜົ່າ ພ້ອມທັງການປະເມີນ ແລະ ການໂຄສະນາເຜີຍແຜ່ກົດໝາຍ ກໍ່ຍັງບໍ່ທັນກວ້າງຂວງ, ບໍ່ແທດເຖິງທຸກໆເປົ້າໝາຍໃນທົ່ວສັງຄົມ ເຮັດໃຫ້ບັນດາກົດໝາຍທີ່ສະພາແຫ່ງຊາດຮັບຮອງແລ້ວ ໃນເວລາຈັດຕັ້ງປະຕິບັດບໍ່ສາມາດປະຕິບັດໄດ້ເທົ່າທີ່ຄວນ. 3) ບັນດາມະຕິທີ່ສະພາແຫ່ງຊາດຮັບຮອງໄປແລ້ວເຫັນວ່າມີຈຳນວນຫຼາຍ ແຕ່ການປະຕິບັດຕົວຈິງ ຍັງບໍ່ທັນເຂັ້ມ ງວດ-ເດັດຂາດເທົ່າທີ່ຄວນ ເຊັ່ນ: ການຄຸ້ມຄອງໂຄງການຂຸດຄົ້ນບໍ່ແຮ່, ການປະຕິບັດສັນຍາສຳປະທານ ແລະ ບັນຫາອື່ນໆ ທີ່ຕິດພັນກັບມະຕິຂອງສະພາແຫ່ງຊາດ ຍັງບໍ່ໄດ້ຮັບການຈັດຕັ້ງປະຕິບັດໃຫ້ເປັນຮູບປະທໍາ ໃຫ້ສົມກັບສະພາແຫ່ງຊາດ ແມ່ນອົງການສູງສຸດແຫ່ງອຳນາດລັດ ແລະ ຄວນມີການປະຕິບັດຢ່າງເຂັ້ມງວດ. 4) ການລົງພົບປະຜູ້ມີສິດເລືອກຕັ້ງ ຂອງສະມາຊິກສະພາແຫ່ງຊາດ ຍັງບໍ່ທັນທົ່ວເຖິງ ໂດຍສະເພາະ ເຂດຫ່າງໄກສອກຫຼີກ, ຊົນເຜົ່າ, ເຂດຊາຍແດນ, ໃນນັ້ນການລົງພົບປະແຕ່ລະຄັ້ງສະມາຊິກສະພາແຫ່ງຊາດ ຄວນປະສານສົມທົບກັບ ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ແລະ ອົງການປົກຄອງທ້ອງຖິ່ນ ເພື່ອເຕົ້າໂຮມປະຊາຊົນເຂົ້າຮ່ວມຮັບຟັງການເຜີຍແຜ່ຜົນສໍາເລັດ ຂອງກອງປະຊຸມສະພາແຫ່ງຊາດ ແລະ ສະພາປະຊາຊົນຂັ້ນແຂວງແຕ່ລະຄັ້ງ. 5) ການເຂົ້າຮ່ວມກອງປະຊຸມສະພາແຫ່ງຊາດ ຂອງສະມາຊິກສະພາແຫ່ງຊາດ ແມ່ນມີຄວາມຕັ້ງໜ້າສູງ ແຕ່ການປະກອບຄໍາເຫັນ ແລະ ຊັກຖາມບັນຫາຕ່າງໆ ຂອງສະມາຊິກສະພາແຫ່ງຊາດຈາກແຕ່ລະເຂດເລືອກຕັ້ງ ຍັງບໍ່ທັນຮັດກຸມ ລົງເລິກບັນຫາທີ່ປະຊາຊົນສ່ອງແສງເຖິງລັດຖະບານ ແລະ ຍັງບໍ່ລົງເລິກເຖິງວິທີສະເໜີແນະການແກ້ໄຂບັນຫາໃຫ້ຖືກຈຸດ (ບາງທ່ານມີການປະກອບຄວາມເຫັນຫຼາຍຄັ້ງ, ແຕ່ບາງທ່ານບໍ່ມີການປະກອບຄວາມເຫັນເລີຍ). 6) ການຕິດຕາມ ກວດກາຂອງສະພາແຫ່ງຊາດ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ (ສະບັບປັບປຸງ) ເລກທີ56/ສພຊ, ລົງວັນທີ 28 ມິຖຸນາ 2024, ໝວດທີ 5, ຕາມມາດຕາ 24; ກົດໝາຍ ວ່າດ້ວຍການຕິດຕາມ ກວດກາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງຍັງບໍ່ທັນແຂງແຮງ ແລະ ເປັນຮູບປະທໍາ ການເກັບກຳຂໍ້ມູນ, ການວິເຄາະວິໄຈບັນຫາ ແລະ ການປະສານງານພາກສ່ວນທີ່ກ່ຽວຂ້ອງພິຈາລະນາແກ້ໄຂບໍ່ທັນໄດ້ດີ. 7) ການນໍາເອົາຄໍາຄິດ, ຄໍາເຫັນ, ຄໍາສະເໜີຂອງປະຊາຊົນບັນດາເຜົ່າທີ່ສະເໜີຜ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ສາຍດ່ວນ ຍັງບໍ່ທັນໄດ້ຮັບການອະທິບາຍ, ຊີ້ແຈງ ແລະ ມີຄໍາຕອບໃຫ້ປະຊາຊົນຢ່າງເປັນລະບົບ ແລະ ຊັດເຈນ. ຂ່າວ: ບຸນຕອມ