ແລະ ບໍລິການດ້ານການກະເສດ ຫ້ວຍຊອນ-ຫ້ວຍຊົ້ວ ຢູ່ ຫຼັກ 22 ເມືອງນາຊາຍທອງນະຄອນຫຼວງວຽງຈັນ; ໂດຍການນໍາພາຂອງ ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດທັງເປັນລັດຖະມົນຕີກຽດຕິຍົດ ພ້ອມດ້ວຍຄະນະທາງການຂອງຝ່າຍໄທ ແລະ ລາວ; ໃຫ້ການຕ້ອນຮັບການມາຢ້ຽມຢາມຄັ້ງນີ້ ໂດຍ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ທ່ານ ລິນຄໍາ ດວງສະຫວັນ ລັດຖະມົນຕີ ກະຊວງກະສິກຳ ແລະ ປ່າໄມ້ພ້ອມດ້ວຍຄະນະ.
ໃນໂອກາດນີ້, ທ່ານ ລິນຄໍາ ດວງສະຫວັນ ໄດ້ລາຍງານກ່ຽວກັບຜົນສໍາເລັດບາງດ້ານ ໃນການຈັດຕັ້ງປະຕິບັດບັນດາວຽກງານຂອງສູນດັ່ງກ່າວ ໃນໄລຍະ 1 ປີຜ່ານມາ ຊຶ່ງສູນດັ່ງກ່າວເປັນໂຄງການຮ່ວມມືແບບພິເສດລະຫວ່າງ ພະບາດ ສົມເດັດ ພະບໍຣົມ ຊະນະກາທິເບດ ມະຫາພູມິພົນອະດຸນຍະເດດມະຫາຣາດ ບໍຣົມມະນາດບໍພິດ ແລະ ປະທານ ໄກສອນ ພົມວິຫານ ເພື່ອເສີມສ້າງສາຍພົວພັນມິດຕະພາບ ແລະ ການຮ່ວມມືຖານບ້ານໃກ້ເຮືອນຄຽງທີ່ດີ ລະຫວ່າງ ສອງປະເທດ ກໍຄື ປະຊາຊົນສອງຊາດ ຂອງ ສປປ ລາວ ແລະຣາຊະອານາຈັກໄທ,ເປັນໂຄງການພັດທະນາກະສິກຳຄົບວົງຈອນ ທີ່ໄດ້ເລີ່ມຕົ້ນເປີດຢ່າງເປັນທາງການ ໃນວັນທີ 8 ເມສາ 1994, ມີເນື້ອທີ່ທັງໝົດ 52 ເຮັກຕາ. ການສ້າງສູນແຫ່ງນີ້, ກໍເພື່ອເປັນການຮ່ວມມືທາງດ້ານວິຊາການ ກ່ຽວກັບວຽກງານກະສິກຳ ແລະ ປັບປຸງຊີວິດການເປັນຢູ່ຂອງປະຊາຊົນ ໂດຍມີການສາທິດ, ຖ່າຍທອດດ້ານຄວາມຮູ້-ທິດສະດີ, ພາກປະຕິບັດຕົວຈິງ ແລະ ການຂະຫຍາຍແນວພັນພືດ-ແນວພັນສັດ ພາຍໃຕ້ຄວາມຮັບຜິດຊອບ ແລະ ບໍລິຫານໂດຍກົງ ຂອງກະຊວງກະສິກຳ ແລະ ປ່າໄມ້.
ປັດຈຸບັນ, ຢູ່ສູນພັດທະນາ ແລະ ບໍລິການດ້ານການກະເສດຫ້ວຍຊອນ-ຫ້ວຍຊົ້ວ ໄດ້ເອົາໃຈໃສ່ ສືບຕໍ່ຈັດຕັ້ງປະຕິບັດ ແລະ ຜັນຂະຫຍາຍບັນດາໜ້າວຽກຕາມແຜນງານ ແລະ ເປົ້າໝາຍທີ່ວາງໄວ້, ອັນພົ້ນເດັ່ນແມ່ນສໍາເລັດການກໍ່ສ້າງອາຄານ ຈຳນວນ 1 ຫຼັງ ເພື່ອຮັບໃຊ້ໃຫ້ການສຳມະນາ ແລະ ເຄື່ອນໄຫວກິດຈະກຳຕ່າງໆຂອງສູນ, ສາມາດຖ່າຍທອດເຕັກນິກວິຊາການດ້ານການກະເສດ ໃຫ້ແກ່ພະນັກງານ, ນັກຮຽນ-ນັກສຶກສາ, ກະສິກອນ ແລະ ບັນດານັກພັດທະນາ, ສາມາດສ້າງ ແລະ ຂະຫຍາຍບັນດາຄອບຄົວຕົວແບບ, ຂະຫຍາຍແນວພັນໄມ້ໃຫ້ໝາກ, ໄມ້ອຸດສາຫະກຳ, ພືດໄລຍະສັ້ນ-ໄລຍະຍາວ, ຂະຫຍາຍແນວພັນ ໄກ່, ເປັດ, ໝູ, ງົວ, ຜະລິດລູກປານ້ອຍ, ກົບ, ຜະລິດຝຸ່ນຊີວະພາບ, ຜະລິດຫຍ້າແຟກ, ຜະລິດນໍ້າໝາກສະໝູນໄພ,ສະໜອງນໍ້າຊົນລະປະທານ ໃສ່ພື້ນທີ່ການຜະລິດ ໃຫ້ແກ່ ປະຊາຊົນໄດ້ 2 ລະດູການ ໃນເນື້ອທີ່ 580 ເຮັກຕາ.
ນອກຈາກນີ້, ການຈັດຕັ້ງປະຕິບັດວຽກງານການຮ່ວມມື 2 ຝ່າຍ ແມ່ນໄດ້ມີແຜນໃນການກໍ່ສ້າງຝາຍກັ້ນນໍ້າຫ້ວຍຊົ້ວ ແລະ ຄອງຊົນລະປະທານ ໃຫ້ກຸ່ມບ້ານເປົ້າໝາຍ ຈໍານວນ 6 ບ້ານ ຕາມເຈດຈຳນົງຂອງສອງຝ່າຍ ທີ່ເຫັນດີເປັນເອກະພາບໃນເບື້ອງຕົ້ນແລ້ວນັ້ນ. ສະນັ້ນ, ຖ້າຫາກຝາຍກັ້ນນໍ້າ ແລະ ຄອງຊົນລະປະທານດັ່ງກ່າວໄດ້ຮັບການກໍ່ສ້າງຢ່າງເປັນຮູບປະທຳ ຈະເຮັດໃຫ້ການພັດທະນາສູນດັ່ງກ່າວ, ຄົບຖ້ວນ, ສົມບູນ ແລະ ສາມາດສົ່ງເສີມການຜະລິດ ແລະ ປັບປຸງຊີວິດການເປັນຢູ່ຂອງປະຊາຊົນ ໄດ້ຢ່າງເປັນຮູບປະທຳຂຶ້ນຕື່ມ.
ສໍາລັບ ທິດທາງແຜນພັດທະນາຂອງສູນໃນຕໍ່ໜ້າ ຈະສືບຕໍ່ ເອົາໃຈໃສ່ ແລະ ພັດທະນາໃຫ້ເປັນບ່ອນຮຽນຮູ້, ເປັນສູນຕົ້ນແບບທີ່ດີ ໃນການຜະລິດກະສິກຳ ເພື່ອເປັນບ່ອນ ຖ່າຍທອດຄວາມຮູ້, ເຕັກນິກ, ເຕັກໂນໂລຊີທີ່ດີໃຫ້ແກ່ກະສິກອນ, ກຸ່ມຜູ້ຜະລິດ, ຜູ້ປະກອບການ, ບັນດາສູນ, ສະຖານີ, ພະນັກງານ, ນັກຮຽນ, ນັກສຶກສາ ແລະ ສັງຄົມ ໃນຂອບເຂດທົ່ວປະເທດ, ສືບຕໍ່ເອົາໃຈໃສ່ ເພີ່ມທະວີການພົວພັນຮ່ວມມື ລະຫວ່າງ ສູນພັດທະນາ ແລະ ບໍລິການດ້ານ ການກະເສດ ຫ້ວຍຊອນ-ຫ້ວຍຊົ້ວ ແລະ ບັນດາໂຄງການອັນເນື່ອງມາຈາກພະຣາດຊະດໍາຣິ ທັງໃນ ສປປ ລາວ ແລະ ຣາຊະອານາຈັກໄທ ເພື່ອແລກປ່ຽນບົດຮຽນ ແລະ ເຕັກນິກ, ວິຊາການ ກໍຄື ການບໍລິຫານຈັດການ ແລະ ພັດທະນາສູນ ໃຫ້ມີການພັດທະນາ, ສາມາດຕອບສະໜອງ ແລະ ໃຫ້ບໍລິການ ແນວພັນພືດ-ແນວພັນສັດ ແລະ ບົດຮຽນໃຫ້ແກ່ປະຊາຊົນ ໄດ້ຢ່າງມີປະສິດທິພາບສູງ ແລະ ທົ່ວເຖິງ.
ທ່ານ ລິນຄໍາ ດວງສະຫວັນ ຍັງໄດ້ສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງມາຍັງ ກົມສົມເດັດພະເທບ ທີ່ໄດ້ມີໂຄງການອັນເນື່ອງມາຈາກ ພະຣາດຊະດຳຣິ ສະໜັບສະໜູນກໍ່ສ້າງຫ້ອງປະຊຸມຝຶກອົບຮົມຫຼັງໃໝ່ ເຮັດໃຫ້ສູນແຫ່ງນີ້ ມີໃບໜ້າໃບຕາໃໝ່, ມີການພັດທະນາ ແລະ ມີຜົນສຳເລັດເປັນກ້າວໆ ແລະ ກໍຫວັງວ່າຈະສືບຕໍ່ໄດ້ຮັບການສະໜັບສະໜູນ ແລະ ຈະໄດ້ມີໂອກາດຖວາຍການຕ້ອນຮັບ ການສະເດັດຂອງ ກົມສົມເດັດພະເທບ ໃນໂອກາດໜ້າອີກຄັ້ງ.
(ຂ່າວ-ພາບ: ແສງຈັນ)
ຄໍາເຫັນ