 |
ຈຸດປະສົງຂອງກອງປະຊຸມພົບປະເພື່ອທົບທວນຄືນການຈັດຕັ້ງປະຕິບັດວຽກງານຂອງທັງຂະແໜງການ ທີ່ໄດ້ຈັດຕັ້ງປະຕິບັດຮ່ວມກັນຜ່ານມາ ແລະ ປຶກສາຫາລືຫາວິທີແກ້ໄຂ ບັນຫາເຄັ່ງຮ້ອນຮີບດ່ວນ ແລະ ສຳຄັນ ຂອງຊາດ ກໍຄືທິດຊີ້ນຳຂອງຂັ້ນເທິງ ທີ່ມອບໝາຍໃຫ້ສອງຂະແໜງການ ຮັບຜິດຊອບຮ່ວມກັນ ຊຶ່ງຫົວຂໍ້ສະເພາະທີ່ຍົກຂຶ້ນມາປຶກສາຫາລືກັນແມ່ນ 1. ການກໍານົດໂຄງສ້າງລາຄາຊີ້ນໝູໜ້າຟາມ ແລະ ການຂາຍຍົກ-ຂາຍຍ່ອຍຊີ້ນໝູ ແລະ ບັນຫາອື່ນໆທີ່ຕິດພັນ ແລະ 2. ປຶກສາຫາລືກ່ຽວກັບການຈັດຕັ້ງຜັນຂະຫຍາຍຄຳສັ່ງວ່າດ້ວຍການເພີ່ມທະວີແກ້ໄຂບັນຫາຜົນກະທົບຈາກລາຄານ້ຳມັນເຊື້ອໄຟ ເລກທີ 40/ນຍ, ລົງວັນທີ 13 ມີນາ 2026 ທີ່ຕິດພັນກັບ 2 ຂະແໜງການ.
ຜ່ານການປະຊຸມປຶກສາຫາລືກັນ ທັງສອງພາກສ່ວນໄດ້ເຫັນດີເປັນເອກະພາບກັນມອບໃຫ້ຫ້ອງການ ແລະ ກົມວິຊາການກ່ຽວຂ້ອງທັງສອງກະຊວງ ຮີບຮ້ອນປະສານສົມທົບກັບພາກສ່ວນກ່ຽວຂ້ອງ ແກ້ໄຂບັນຫາລາຄາໝູໜ້າຟາມ ແລະ ລາຄາຊີ້ນໝູໃນທ້ອງຕະຫຼາດ ໃຫ້ມີຄວາມເໝາະສົມ ແລະ ເປັນທຳ ຕໍ່ຜູ້ຜະລິດ, ຜູ້ຈຳໜ່າຍ ແລະ ຜູ້ບໍລິໂພກ. ກ່ຽວກັບການຈັດຕັ້ງຜັນຂະຫຍາຍຄຳສັ່ງວ່າດ້ວຍການເພີ່ມທະວີແກ້ໄຂບັນຫາຜົນກະທົບຈາກລາຄານ້ຳມັນເຊື້ອໄຟເລກທີ 40/ນຍ ກໍໄດ້ເປັນເອກະພາບກັນໃຫ້ກົມວິຊາການກ່ຽວຂ້ອງທັງສອງກະຊວງ ລົງເລິກສັງລວມຂໍ້ມູນຄວາມຕ້ອງການ, ຄົ້ນຄວ້າຊອກຫາກົນໄກ, ວິທີການ ແລະ ມາດຕະການແກ້ໄຂ ຮີບດ່ວນ ເພື່ອສະໜອງນ້ຳມັນເຊື້ອໄຟໃຫ້ເຖິງເປົ້າໝາຍຜູ້ຜະລິດ ແລະ ນຳໃຊ້ເຂົ້າໃນການຜະລິດຕາມວັດຖຸປະສົງ ເພື່ອໃຫ້ສາມາດຜະລິດສະບຽງອາຫານຢ່າງພຽງພໍ.
 |
ໃນຕອນທ້າຍກອງປະຊຸມ, ຄະນະປະທານກໍໄດ້ຊີ້ນຳມອບໝາຍໃຫ້ຫ້ອງການ, ບັນດາກົມວິຊາການກ່ຽວຂ້ອງທັງສອງກະຊວງ ຮີບຮ້ອນປະສານສົມທົບກັບພາກສ່ວນກ່ຽວຂ້ອງທັງສູນກາງ ແລະ ທ້ອງຖິ່ນ ສືບຕໍ່ຄົ້ນຄວ້າລົງເລິກຈັດຕັ້ງຜັນຂະຫຍາຍປະຕິບັດບັນດາໜ້າວຽກຕ່າງໆທີ່ໄດ້ເປັນເອກະພາບກັນ ເຂົ້າສູ່ຕົວຈິງ ແລະ ເປັນຮູບປະທຳ.
ຂ່າວ-ພາບ :ກະຊວງກະສິກຳ ແລະ ສິ່ງແວດລ້ອມ
ຄໍາເຫັນ