ສວນຖົ່ວລຽນພູຖໍ້າຄໍາ ຕົວແບບການປູກພືດເປັນສິນຄ້າ ຂອງເມືອງທຸລະຄົມ

ໂດຍ: ສ.ບຸດປະຊາ
    ການປູກພືດເປັນສິນຄ້າ ແມ່ນໜຶ່ງແນວທາງນະໂຍບາຍຂອງພັກ - ລັດເຮົາ ເພື່ອຊ່ວຍໃຫ້ປະຊາຊົນລາວບັນດາເຜົ່າ ຜູ້ທີ່ດຸໝັ່ນຂະຫຍັນພຽນ, ຜູ້ທີ່ເຮັດແທ້ທໍາຈິງ ເຮັດດ້ວຍຄວາມຕັ້ງໃຈ ສາມາດສ້າງໄດ້ລາຍຮັບໃຫ້ຄອບຄົວ ໄດ້ມີຢູ່ມີກິນ ແລະ ກາຍເປັນຕົວແບບແກ່ຄອບຄົວອື່ນໆ ນໍາໄປເປັນບົດຮຽນ ຊຶ່ງຄອບຄົວຂອງ ທ່ານ ປັນຈາ ລາດຊະວົງ ຕົວແບບການປູກພືດເປັນສິນຄ້າຂອງເມືອງທຸລະຄົມ ແຂວງວຽງຈັນ ກໍເປັນໜຶ່ງຕົວແບບໃນການປູກໝາກຖົ່ວລຽນເປັນສິນຄ້າ ສ້າງລາຍຮັບໄດ້ຫຼາຍຮ້ອຍລ້ານກີບ; ຂະນະທີ່ຕະຫຼາດຈີນ ກໍໄດ້ໃຫ້ຄວາມສົນໃຈ ແລະເພື່ອຈະສົ່ງອອກໄດ້ນັ້ນ ກໍຍັງຕ້ອງການການຊຸກຍູ້ຂອງພັກ-ລັດ ແລະ ພາກສ່ວນກ່ຽວຂ້ອງຕື່ມອີກ.
ສວນຖົ່ວລຽນພູຖໍ້າຄໍາ ຂອງ ທ່ານ ປັນຈາ ລາດຊະວົງ ຕັ້ງຢູ່ບ້ານນາເພີຍ ຊຶ່ງໃນໂອກາດທີ່ຜູ້ຂຽນ ໄປເຄື່ອນໄຫວວຽກງານຢູ່ແຂວງວຽງຈັນ ໄດ້ໄປສຳພາດຄອບຄົວຕົວແບບນີ້ ໃນວັນທີ 4 ເມສາຜ່ານມາ ຊຶ່ງ ທ່ານ ປັນຈາ ລາດຊະວົງ ກໍໄດ້ໃຫ້ຮູ້ວ່າ: ຜ່ານມາຕົນເອງເຄີຍເຮັດວຽກນໍາບັນດາອົງການຈັດຕັ້ງສາກົນ ແລະ ໃນປີ 2006 ໄດ້ມາຊື້ທີ່ດິນຈໍານວນ 51 ເຮັກຕາ ຢູ່ບ້ານນາເພີຍນີ້ ເພື່ອເຮັດສວນ ປູກຝັງ-ລ້ຽງສັດ ຊຶ່ງພາຍຫຼັງບຸກເບີກສຳເລັດ ໃນປີ 2007 ກໍໄດ້ເລີ່ມການປູກຝັງ-ລ້ຽງສັດ ໂດຍເບື້ອງຕົ້ນແມ່ນໄດ້ລ້ຽງງົວ 40 ກວ່າໂຕ, ປູກໄມ້ເກດສະໜາ 3.000 ກວ່າຕົ້ນ, ປູກໄມ້ສັກ ແລະ ມີໜອງປາຈໍານວນໜຶ່ງ. ມາຮອດປີ 2008, ກໍໄດ້ປູກຢາງພາລາ ແລະ ໄດ້ປູກຕົ້ນໄມ້ກິນໝາກຫຼາຍຊະນິດ; ໃນນັ້ນ, ມີຕົ້ນໝາກຖົົ່ວລຽນ 3 ຕົ້ນ ພາຍຫຼັງ 7-8 ປີ ຈຶ່ງໄດ້ນໍາໝາກຖົ່ວລຽນມາກິນ ກໍຮູ້ສຶກວ່າມີລົດຊາດທີ່ແຊບຄືກັນກັບຂອງປະເທດເພື່ອນບ້ານ. ສະນັ້ນ, ຈຶ່ງມີຄວາມຄິດວ່າຢາກ “ປູກໝາກຖົ່ວລຽນ ເປັນສິນຄ້າ” ແລະ ໃນປີ 2017 ຈຶ່ງໄດ້ລາອອກວຽກ ເພື່ອຜັນໂຕມາເຮັດສວນຖົ່ວລຽນໝອນທອງ.
ໃນເບື້ອງຕົ້ນ, ທ່ານ ປັນຈາ ລາດຊະວົງ ແລະ ຄອບຄົວ ໄດ້ປູກຖົ່ວລຽນຈໍານວນປະມານ 200 ຕົ້ນ, ພໍມາຮອດປີທີ 3-4 ຂອງການປູກ ກໍໄດ້ເລີ່ມມີໝາກໃຫ້ລອງຊີມ ແລະ ມາຮອດປີທີ 5 ເລີ່ມໄດ້ມີຜົນຜະລິດຂາຍ ພ້ອມທັງຂະຫຍາຍການປູກໄປນໍາ ໂດຍມາຮອດປັດຈຸບັນແມ່ນມີຕົ້ນຖົ່ວລຽນ 500 ກວ່າຕົ້ນ ແລະ ປີນີ້ກໍເລີ່ມຂະຫຍາຍໄປແລ້ວ 1.000 ຕົ້ນ ພ້ອມທັງກຳລັງລົງດິນເພື່ອຈະຂະຫຍາຍອີກ 3.000 ຕົ້ນ ຊຶ່ງລວມແລ້ວ ຈະສູ້ຊົນຂະຫຍາຍການປູກໃຫ້ໄດ້ອີກ 4.000 ຕົ້ນໃນປີນີ້. ຂະນະດຽວກັນນີ້, ເນື້ອທີ່ຂອງສວນ ທີ່ໃຊ້ປູກຖົ່ວລຽນໃນປັດຈຸບັນມີທັງໝົດ 25 ເຮັກຕາ, ທົ່ວສວນມີຕົ້ນຖົ່ວລຽນທີ່ໃຫ້ໝາກໄດ້ ມີ 110 ກວ່າຕົ້ນ. ການຈໍາໜ່າຍແມ່ນໄດ້ຂາຍໄປແລ້ວ 2 ງວດ ຄື: ງວດທໍາອິດແມ່ນປີ 2022, ມີຜົນຜະລິດຈາກຕົ້ນຖົ່ວລຽນ ພຽງປະມານ 50-60 ຕົ້ນ, ມີ 2 ໂຕນກວ່າ ຊຶ່ງສ້າງລາຍຮັບໄດ້ 200-300 ລ້ານກີບ; ສົກປີ 2023, ຜົນຜະລິດເລີ່ມໄດ້ດີ ເກັບກ່ຽວໄດ້ປະມານ 5 ໂຕນ, ສາມາດຂາຍສ້າງລາຍຮັບໄດ້ 475 ລ້ານກວ່າກີບ; ສ່ວນປີນີ້, ກໍມີຄວາມຫວັງວ່າຈະມີຜົນຜະລິດສູງເຖິງ 10 ໂຕນ ແຕ່ທັງນີ້ທັງນັ້ນ ກໍຍັງຕ້ອງໄດ້ເບິ່ງຕົວຈິງ ທັງເງື່ອນໄຂຂອງສະພາບອາກາດ, ການຫົດນໍ້າທີ່ຍັງຕ້ອງໄດ້ເບິ່ງຄວາມຕ້ອງການຂອງໝາກຖົ່ວລຽນ ແລະ ດອກທີ່ຍັງບໍ່ທັນເປັນໝາກ ທີ່ມີຄວາມຕ້ອງການນໍ້າທີ່ຕ່າງກັນ ແລະ ອື່ນໆ; ນອກນີ້, ກໍມີສະພາບຂອງຕົ້ນຖົ່ວລຽນ ທີ່ໄດ້ປູກມີຫຼາຍຮຸ່ນ ເຮັດໃຫ້ໄລຍະການເກີດໝາກແຕກຕ່າງກັນ. ຢ່າງໃດກໍດີ, ກໍຍັງສາມາດຄາດການວ່າ ຜົນຜະລິດປີນີ້ ບໍ່ຫຼຸດ 6-7 ໂຕນ ຊຶ່ງລາຍຮັບອາດຈະໄດ້ບໍ່ຫຼຸດ 600 ລ້ານກວ່າກີບ.
    ຜົນສຳເລັດຂອງການປູກຖົ່ວລຽນເປັນສິນຄ້າຂອງຄອບຄົວ ທ່ານ ປັນ ຈາ ລາດຊະວົງ ໄດ້ກາຍເປັນສິນຄ້າສຳຄັນຂອງເມືອງທຸລະຄົມ ຊຶ່ງໃນປີນີ້ ພາຍຫຼັງບຸນປີໃໝ່ລາວ ສວນຖົ່ວລຽນພູຖໍ້າຄໍາ ກໍຈະໄດ້ເລີ່ມເປີດການຈອງຜົນຜະລິດ ແລະ ກໍຈະໄດ້ດຳເນີນການເກັບກ່ຽວຜົນຜະລິດຂາຍ. ປັດຈຸບັນ, ສວນນີ້ກໍກຳລັງໄດ້ຮັບຄວາມສົນໃຈໂດຍສະເພາະນັກທຸລະກິດຈີນ ເພື່ອມາຊື້ໄປຈໍາໜ່າຍຕະຫຼາດຈີນ, ແຕ່ສວນກໍຍັງມີສິ່ງທ້າຍທ້າຍ ໂດຍສະເພາະການຕອບສະໜອງດ້ານປະລິມານ ແລະ ຄຸນນະພາບ ຊຶ່ງ ທ່ານ ປັນຈາ ລາດຊະວົງ ຈຶ່ງໄດ້ມີແນວຄິດລະດົມ ແລະ ຈັບກຸ່ມກັນ ຊຶ່ງປັດຈຸບັນນີ້ສາມາດຮວບຮວມກຸ່ມໄດ້ປະມານ 60 ສວນ ແລະ ມີຕົ້ນຖົ່ວລຽນປະມານ 30.000 ກວ່າຕົ້ນ ຊຶ່ງຄາດວ່ານີ້ຈະເປັນຂໍ້ລິເລີ່ມທີ່ດີ ເພື່ອຈະໃຫ້ການສົ່ງອອກຖົ່ວລຽນຂອງລາວ ເປັນອີກສິນຄ້າໄປຕ່າງປະເທດ.
    ສະນັ້ນ, ການຊຸກຍູ້ສົ່ງເສີມ ແລະ ການລົງມາຊ່ວຍດ້ານຕ່າງໆ ຂອງພັກ-ລັດ ແລະ ພາກສ່ວນກ່ຽວຂ້ອງ ຈຶ່ງເປັນສິ່ງສຳຄັນ ເພື່ອຊ່ວຍໃຫ້ບັນດາຄອບຄົວຕົວແບບ ໃນການປູກຖົ່ວລຽນເປັນສິນຄ້າ ມີບາດກ້າວຂະຫຍາຍຕົວ ແລະ ມີໃບໜ້າໃໝ່ໃນການເປັນສິນຄ້າສົ່ງອອກ ຊຶ່ງຫຼາຍບັນຫາທີ່ຕັ້ງຂຶ້ນ ເປັນຕົ້ນຄືການຊ່ວຍໃນການລະດົມສ້າງກຸ່ມປູກຖົ່ວລຽນເພື່ອໃຫ້ເຂົ້າໃຈກ່ຽວກັບການເຂົ້າກຸ່ມຈະມີຜົນດີແນວໃດ ໂດຍສະເພາະແມ່ນຜົນດີຂອງຕົນໃນເວລາສົ່ງອອກ; ການຊ່ວຍເຫຼືອດ້ານວິຊາການໃນການປູກ, ເບິ່ງແຍງຮັກສາ ໃຫ້ຜົນຜະລິດມີປະລິມານ ແລະ ຄຸນນະພາບ; ພ້ອມນີ້, ກໍຍັງຕ້ອງໄດ້ຊ່ວຍດ້ານເງື່ອນໄຂການເຂົ້າເຖິງແຫຼ່ງທຶນ ເພາະການປູກຖົ່ວລຽນແມ່ນໃຊ້ເວລາ ແລະ ໃຊ້ທຶນຮອນສູງຫຼາຍ. ທັງໝົດນີ້, ກໍແມ່ນຄໍາສະເໜີຂອງຄອບຄົວຕົວແບບ ປູກຖົ່ວລຽນເປັນສິນຄ້າ ຢູ່ບ້ານນາເພີຍ ເມືອງທຸລະຄົມ ແຂວງວຽງຈັນ.