 |
ທ່ານ ວິລະກອນ ຕ່ອມມະນີ ຮອງຫົວໜ້າສ່ວຍສາອາກອນແຂວງ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານໃນໄລຍະ 1 ປີຜ່ານມາ ໂດຍໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ ແລະ ວຽກງານດ້ານທີ່ພົ້ນເດັ່ນໃນການເຄື່ອນໄຫວຈັດຕັ້ງປະຕິບັດວຽກງານໄລຍະທີ່ຜ່ານມາ. ຊຶ່ງໃນປີ 2025 ສ່ວຍສາອາກອນແຂວງຄໍາມ່ວນ ມີແຜນການຈັດເກັບລາຍຮັບເຂົ້າງົບປະມານຈໍານວນ 2,715 ຕື້ກີບ, ຜ່ານການຈັດຕັ້ງປະຕິບັດໝົດປີ ສາມາດຈັດເກັບໄດ້ທັງໝົດ 4,279 ຕື້ກີບ ເທົ່າກັບ 157.62% ຂອງແຜນການ, ທຽບໃສ່ປີ 2024 ເພີ່ມຂຶ້ນ 152.87% ຫຼື ເທົ່າກັບ 1,480 ຕື້ກີບ. ໃນນັ້ນ, ລາຍຮັບສ່ວຍສາອາກອນປະຕິບັດໄດ້ 2,417 ຕື້ກີບ ເທົ່າກັບ 148.71% ຂອງແຜນການປີ, ລາຍຮັບຊັບພະຍາກອນ ແລະ ພາກຫຼວງ ປະຕິບັດໄດ້ 1,806 ຕື້ກີບ ເທົ່າກັບ 168.39%, ລາຍຮັບຄຸ້ມຄອງຊັບສິນຂອງລັດ 55.75 ຕື້ກີບ ເທົ່າກັບ 329.19% ແລະ ການຄຸ້ມຄອງລັດວິສາຫະກິດ ແລະ ປະກັນໄພ ປະຕິບັດໄດ້ 242 ລ້ານກີບ ເທົ່າກັບ 80.75%.
 |
ສໍາລັບແຜນການຈັດເກັບລາຍຮັບຂອງສ່ວຍສາອາກອນແຂວງຄໍາມ່ວນ ປະຈໍາປີ 2026 ຈໍານວນທັງໝົດ 2,934 ຕື້ກີບ, ເພື່ອເຮັດໃຫ້ການຈັດເກັບລາຍຮັບໃຫ້ບັນລຸຕາມຕົວເລກຄາດໝາຍ ສ່ວຍສາອາກອນປະຈໍາແຂວງຄໍາມ່ວນ ຈະເພີ່ມທະວີການຄຸ້ມຄອງຈັດເກັບລາຍຮັບ ແລະ ຂະຫຍາຍຖານລາຍຮັບ, ສຸມໃສ່ການຈັດເກັບພັນທະຕ່າງໆ ເປັນຕົ້ນ ອາກອນມູນຄ່າເພີ່ມ, ອາກອນລາຍໄດ້ຕ່າງໆ, ຕິດຕາມ, ກວດກາ ການເຄື່ອນໄຫວຂອງບັນດາຫົວໜ່ວຍທຸລະກິດໃຫ້ແຈ້ງມອບພັນທະອາກອນຢ່າງເປັນປົກກະຕິ, ເອົາໃຈໃສ່ວຽກງານການຫັນເປັນທັນສະໄໝ ໂດຍການຂະຫຍາຍເປົ້າໝາຍ ລົງເຖິງບັນດາຮ້ານອາຫານ, ໂຮງແຮມ, ບ້ານພັກ, ຮ້ານມິນິມາກ ແລະ ອື່ນໆ. ໃນການນໍາໃຊ້ໃບເກັບເງິນແບບເອເລັກໂຕຼນິກ (E-Tax Invoice), ປະສານສົມທົບກັບບັນດາພະແນກການອ້ອມຂ້າງ ແລະ ບັນດາພະແນກການຂອງລັດ ໃນການຈັດເກັບລາຍຮັບຄ່າທໍານຽມ, ຄ່າເຊົ່າ-ສໍາປະທານ, ຄ່າຊັບພະຍາກອນ, ຄ່າພາກຫຼວງ ແລະ ອື່ນໆ.
(ຂ່າວ-ພາບ: ກອງຄໍາ)
ຄໍາເຫັນ