ໂດຍ: ສຳນານ ພົມພັກດີ
ເປົ້າໝາຍທີ 11 ຂອງແຜນພັດທະນາພະລັງງານ ແລະ ບໍ່ແຮ່ (2021-2025) ສ້າງຄວາມເຂັ້ມແຂງໃຫ້ບັນດາລັດວິສາຫະກິດອ້ອມຂ້າງກະຊວງ ພບ ຊຶ່ງໃນເປົ້າໝາຍນີ້ລັດວິສາຫະກິດໄຟຟ້າລາວ (ຟຟລ) ຜ່ານມາໄດ້ສຸມໃສ່ປະຕິບັດ 4 ມາດຕະການແກ້ໄຂໜີ້ສິນ ກໍຄືການປະຕິຮູບການດຳເນີນທຸລະກິດ ໃຫ້ມີປະສິດທິຜົນ. ໃນຂະນະດຽວກັນເປົ້າໝາຍທີ 10 ສົ່ງເສີມການມີສ່ວນຮ່ວມໃນການຄຸ້ມຄອງ ແລະ ພັດທະນາຊັບພະຍກອນແຮ່ທາດ, ການຈັດຕັ້ງປະຕິບັດເປົ້າໝາຍດັ່ງກ່າວ ໃນປີ 2021 ຂະແໜງບໍ່ແຮ່ນຳໃຊ້ແຮງງານທັງໝົດ 19.777 ຄົນ, ປີ 2022 ຈຳນວນ 20.871 ຄົນ ແລະ ມາຮອດເດືອນ 6 ປີ 2023 ໂຄການບໍ່ແຮ່ມີພະນັກງານປະຕິບັດວຽກງານທັງໝົດ 25.047 ຄົນ.
ທ່ານ ໂພໄຊ ໄຊຍະສອນ ລັດຖະມົນຕີ ກະຊວງພະລັງງານ ແລະ ບໍ່ແຮ່ (ພບ) ໄດ້ລາຍງານຕໍ່ກອງປະຊຸມກາງສະໄໝຂອງອົງຄະນະພັກ ກະຊວງພະລັງງານ ແລະ ບໍ່ແຮ ເມື່ອບໍ່ດົນມານີ້ວ່າ: ເປົ້າໝາຍທີ 10 ສົ່ງເສີມການມີສ່ວນຮ່ວມ ໃນການຄຸ້ມຄອງ ແລະ ພັດທະນາຊັບພະຍາກອນແຮ່ທາດໄດ້ສຳເລັດການສ້າງວິໄສທັດຮອດ ປີ 2040 ແລະ ແຜນຍຸດທະສາດການພັດທະນາແຮ່ທາດ ຮອດປີ 2030 ໄດ້ຊຸກຍູ້ໃຫ້ບັນດາບໍລິສັດລົງທຶນດ້ານບໍ່ແຮ່ ເອົາໃຈໃສ່ສົ່ງເສີມໃຫ້ມີການພັດທະນາຊຸມຊົນທີ່ໂຄງການຕັ້ງຢູ່ໃນການບູລະນະ ແລະ ກໍ່ສ້າງໂຄງລ່າງພື້ນຖານ ເປັນຕົ້ນການກໍ່ສ້າງຖະໜົນຫົນທາງ, ສຸກສາລາ, ໂຮງຮຽນ ຊຶ່ງໃນ 2021 ຂະແໜງບໍ່ແຮ່ນຳໃຊ້ແຮງງານທັງໝົດ 19.777 ຄົນ (ລາວ 15.585 ຄົນ ຕ່າງປະເທດ 4.192ຄົນ ), ປີ 2022 ມີ 21.871 ຄົນ (ລາວ 17.048 ຄົນ, ຕ່າງປະເທດ 4.823 ຄົນ) ມາຮອດເດືອນ 6 ປີ 2023 ໂຄງການບໍ່ແຮ່ມີພະນັກງານທີ່ປະຕິບັດວຽກງານທັງໝົດຈຳນວນ 25.047 ຄົນ ຍິງ 3.445 ຄົນ ໃນນັ້ນມີແຮງງນລາວ 18.824 ຄົນ ແລະ ແຮງງານຕ່າງປະເທດ 6.223 ຄົນ, ຍິງ 622 ຄົນ (ແຮງງານລາວກວມເອົາ 75% ຂອງແຮງງານທັງໝົດ).
ໃນຂະນະທີ່ເປົ້າໝາຍທີ 11 ສ້າງຄວາມເຂັ້ມເເຂງໃຫ້ບັນດາລັດວິສາຫະກິດອ້ອມຂ້າງກະຊວງ ໂດຍສະເພາະ ຟຟລ ໄດ້ສຸມໃສ່ປະຕິບັດ 4 ມາດຕະການແກ້ໄຂໜີ້ສິນ ກໍຄືການປະຕິຮູບການດຳເນີນທຸລະກິດ ໃຫ້ມີປະສິດທິຜົນ ໂດຍສູ້ຊົນຈັດຕັ້ງປະຕິບັດແຜນງານຕ່າງໆ ໃຫ້ເປັນຮູບປະທຳຕາມການຮັບຮອງຂອງ ລັດຖະບານ ເປັນຕົ້ນແມ່ນການປັບປຸງໂຄງສ້າງບໍລິຫານອົງກອນ, ການປັບປຸງໂຄງສ້າງລາຄາໄຟຟ້າພາກຈຳໜ່າຍ ເພື່ອໃຫ້ແທດເໝາະກັບຕົວຈິງ. ການປັບປຸງສັນຍາຊື້ໄຟຟ້າກັບຜູ້ຜະລິດ, ການເຈລະຈາປັບໂຄງສ້າງໜີ້ສິນກັບທະນາຄານ ແລະ ສະຖາບັນການເງິນ, ສຳລັບການຊຸກຍູ້ ລັດວິສາຫະກິດຖືຮຸ້ນລາວ (ລຮລ) ໃຫ້ເຂົ້າຮ່ວມຖືຮຸ້ນກັບໂຄງການຂະໜາດໃຫຍ່ແມ່ນຢູ່ໃນຂັ້ນຕອນສຶກສາປະສິດທິຜົນທາງດ້ານເສດຖະກິດຂອງໂຄງການ, ໃນຂະນະທີ່ ລັດວິສາຫະກິດກໍ່ສ້າງ ແລະ ຕິດຕັ້ງໄຟຟ້າ (ກຕຟ) ກໍໄດ້ມອບຊັບສິນຈຳນວນໜຶ່ງເຂົ້າກັບ ຟຟລ ປັດຈຸບັນໄດ້ຫັນມາກຸ້ມຕົນເອງ, ສ່ວນລັດວິສາຫະກິດພັດທະນາແຮ່ທາດລາວ (ພຮລ) ໄດ້ຮ່ວມມືກັບບັນດາບໍລິສັດໃນການພັດທະນາໂຄງການບໍ່ແຮ່ ໂດຍໄດ້ຮ່ວມມືກັບ 21 ບໍລິສັດ, 37 ເຂດ ໃນເນື້ອທີ່ທັງໝົດ 7.452 ກິໂລຕາແມັດ ໂດຍໄດ້ແບ່ງອອກເປັນ 4 ກຸ່ມໃຫຍ່ຄື: ໂຄງການຂຸດຄົ້ນ-ປຸງແຕ່ງ, ໂຄງການຊອກຄົ້ນ-ສໍາຫຼວດ, ໂຄງການຢູ່ໃນຮູບແບບ MOU, PA ແລະ ໂຄງການຮ່ວມມືປະເພດກິດຈະການບໍລິການ.
ສຳລັບເປົ້າໝາຍທີ 12 ການເຊື່ອມສານເປົ້າໝາຍການພັດທະນາແບບຍືນຍົງ (SD G) ແລະ ການເຕີບໂຕສີຂຽວ (GG) ເຂົ້າໃນການຈັດຕັ້ງປະຕິບັດແຜນພັດທະນາຂະແໜງການ ໄດ້ສໍາເລັດການສ້າງ Roadmap ເພື່ອພັດທະນາຕົວຊີ້ວັດ SDG 7 ຂອງ ສປປ ລາວ ໃນການຈັດຕັ້ງປະຕິບັດເປົ້າໝາຍແຜນພັດທະນາແບບຍືນຍົງ SDG ເປັນຕົ້ນແມ່ນການເກັບກໍາຂໍ້ມູນສະຖິຕິ ພະລັງງານ, ສຳເລັດການສັງລວມ, ການຈັດພິມ ແລະ ແຈກຢາຍປຶ້ມສະຖິຕິດ້ານພະລັງງານ-ບໍ່ແຮ່ ແລະ ສຳເລັດການສ້າງແຜນງານ ວຽກສະຖິຕິ ຂອງຂະແໜງການພະລັງງານ ແລະ ບໍ່ແຮ່ ໃນໄລຍະປີ (2021- 2025) ແລະ ໄດ້ສຳເລັດການສ້າງຈຸດປະສານງານວຽການສະຖິຕິ ໃນຂະແໜງ ພບ ໃນຂອບເຂດທົ່ວປະເທດ.
ຄໍາເຫັນ