ສຸສານຈີນ ທີ່ແຂວງອຸດົມໄຊ ແລະ ຊຽງຂວາງ: ສັນຍາລັກແຫ່ງນ້ຳໃຈສາກົນກຳມາຊີບຂອງນັກຮົບວິລະຊົນຈີນ ທີ່ມີຕໍ່ພາລະກິດຕໍ່ສູ້ກູ້ຊາດຂອງປະເທດຊາດ ແລະ ປະຊາຊົນລາວຢ່າງບໍ່ມີວັນລືມ

ເວົ້າສະເພາະທີ່ ສປປ ລາວ, ເພື່ອຈາລຶກບຸນຄຸນ ແລະ ຄຸນງາມ ຄວາມດີຂອງບັນດາວິລະຊົນ ແລະນັກຮົບຈີນທີ່ໄດ້ເສຍສະຫຼະຊີວິດຢູ່ຜືນແຜ່ນດິນລາວ ແລະ ໄດ້ຖືກຝັງ ໄວ້ທີ່ສຸສານນັກຮົບວິລະຊົນຈີນຢູ່ເມືອງໄຊ ແລະ ເມືອງນາໝໍ້ ແຂວງອຸດົມໄຊ, ການນຳລາວໄດ້ຈາລຶກ ຕົວໜັງສືສີຄຳຂຽນໄວ້ວ່າ: “ນັກຮົບວິລະຊົນຈີນຈະບໍ່ມີວັນເສົ້າສູນຊົ່ວກາລະນານ” ເປັນພາສາຈີນ ແລະ ພາສາລາວໄດ້ຕັ້ງສະຫງ່າຢູ່ສະໜາມ ຫຼວງອະນຸສອນສະຖານທີ່ກວ້າງ ຂວາງ. ປັດຈຸບັນສຸສານດັ່ງກ່າວຍັງຄົງເປັນສັນຍາລັກແຫ່ງນ້ຳໃຈສາກົນກໍາມາຊີບຂອງນັກຮົບວິລະຊົນຈີນທີ່ມີຕໍ່ພາລະກິດຕໍ່ສູ້ກູ້ຊາດຂອງປະເທດຊາດ ແລະ ປະຊາຊົນລາວຕະຫຼອດມາຢ່າງອະມະຕະທີ່ບໍ່ມີວັນລືມໄດ້. ສະຫາຍ ນາງ ຟາງຫົງ ເອກອັກຄະລັດຖະທູດ ສປ ຈີນ ປະຈຳລາວ ໄດ້ກ່າວ ໃນໂອກາດເຂົ້າວາງພວງມາລາທີ່ສຸສານນັກຮົບເສຍສະຫຼະຊີວິດຊາວຈີນຢູ່ແຂວງອຸດົມໄຊໃນວັນບຸນ ເຊັງເມັງຈີນ ເມື່ອຄັ້ງວັນທີ 5 ເມສາ 2026 ວ່າ: ແຕ່ລະປີ ເພື່ອຈາລຶກຄຸນ ງາມຄວາມດີຕໍ່ນັກຮົບວິລະຊົນຈີນ ການນຳຂັ້ນສູນກາງ, ແຂວງ, ເມືອງພ້ອມປະຊາຊົນລາວບັນດາເຜົ່າໄດ້ສົມທົບກັບສະຖານທູດຈີນປະຈຳລາວ, ກົງສູນຈີນປະຈຳແຂວງຫຼວງພະບາງ ແລະ ພາກສ່ວນຕ່າງໆຂອງລາວ-ຈີນ ໄດ້ເຂົ້າວາງພວງມາລາທີ່ ສຸສານນັກຮົບເສຍສະຫຼະຊີວິດຊາວຈີນທັງ 3 ແຫ່ງຄື: ຢູ່ເມືອງໄຊ, ເມືອງນາໝໍ້ ແຂວງອຸດົມໄຊ ແລະ ເມືອງແປກແຂວງຊຽງຂວາງ. ນີ້ເປັນການຢັ້ງຢືນວ່າ: ພັກ, ລັດ ແລະ ປະຊາຊົນລາວຍາມໃດກໍຈາລຶກບຸນຄຸນ ແລະ ຄຸນງາມຄວາມດີຢ່າງບໍ່ມີວັນລືມຂອງບັນດາວິລະຊົນ ແລະ ນັກຮົບຈີນທີ່ໄດ້ເສຍສະຫຼະຊີວິດຢູ່ຜືນແຜ່ນດິນ ລາວ ໃນໄລຍະປະເທດລາວດຳເນີນການຕໍ່ສູ້ກູ້ຊາດຕ້ານການຮຸກຮານຂອງພວກລ່າຫົວເມືອງຂຶ້ນທັງເກົ່າ ແລະ ໃໝ່ຢ່າງອົງອາດກ້າຫານ ໂດຍສະເພາະໃນຊຸມປີ 1960-70 ເພື່ອສະໜັບສະໜູນການປະຕິວັດລາວ, ຈີນໄດ້ສົ່ງກອງທັບວິສະວະກຳ, ກອງ ທັບປ້ອງກັນພາກພື້ນດິນ, ກອງທັບປ້ອງກັນອາກາດ ແລະ ພະລາທິການພ້ອມດ້ວຍກອງກຳລັງທະຫານບົກລວມທັງໝົດ 110,000 ຄົນ ມາປະ ເທດລາວ. ຕະຫຼອດໄລຍະ 11 ປີ,

ກອງກຳລັງອາສາສະໝັກຈີນໄດ້ກໍ່ສ້າງເສັ້ນທາງຍຸດທະສາດ 7 ສາຍ ລວມຄວາມຍາວ 822 ກິໂລ ແມັດ, ເພື່ອປະກອບສ່ວນຢ່າງຫ້າວຫັນໃນໄຊຊະນະການຕໍ່ສູ້ກູ້ຊາດ ແລະ ການພັດທະນາເສດຖະກິດຫຼັງສົງຄາມຂອງປະຊາຊົນລາວ. ໃນໄລຍະນີ້, ມີວິລະຊົນຈີນທີ່ເສຍ ຊີວິດຖືກຝັງໄວ້ທີ່ສຸສານເມືອງໄຊແຂວງອຸດົມໄຊ 129 ຄົນ, ລວມທັງ 24 ຄົນ ທີ່ເສຍຊີວິດໃນການສູ້ຮົບທາງອາກາດ. ສ່ວນທີ່ສຸສານທີ່ເມືອງນາໝໍ້ ແຂວງອຸດົມໄຊ ມີວິລະຊົນຈີນຖືກຝັງໄວ້ 81 ຄົນ, ລວມທັງວິລະຊົນທີ່ເສຍຊີວິດໃນກຳລັງທະຫານຊຸດທຳອິດທີ່ເຂົ້າມາປະເທດລາວ ແລະ ທີ່ເມືອງແປກ ແຂວງຊຽງຂວາງໄດ້ຝັງສົບນັກຮົບວິລະຊົນຈີນ ລວມທັງໝົດ 269 ສະຫາຍ.

ໃນຂະນະ, ສະຫາຍ ບຸນຄົງ ຫຼ້າຈຽມພອນ ເລຂາຄະນະພັກແຂວງອຸດົມໄຊ ກໍໄດ້ກ່າວວ່າ: ປະຊາຊົນລາວຈະບໍ່ລືມຜົນງານອັນໃຫຍ່ຫຼວງ ຂອງຊາວຈີນຫຼາຍຮ້ອຍຄົນທີ່ເສຍ ສະຫຼະຊີວິດໄດ້ຖືກຝັງໄວ້ໃນແຜ່ນ ດິນລາວ. ນີ້ແມ່ນ “ມິດຕະພາບທີ່ຫຼໍ່ຫຼອມດ້ວຍເລືອດເນື້ອຮ່ວມແຮງຮ່ວມໃຈສືບສານບົດເພງແຫ່ງສາຍພົວພັນຈີນ-ລາວ”. ສ່ວນສະຫາຍ ຈ່າງເຊີ້ຜິງ ຫົວໜ້າກົງສູນ ສປ ຈີນ ປະຈຳແຂວງຫຼວງພະບາງ ໃນເວລາ ນັ້ນ ໄດ້ກ່າວວ່າ: ນີ້ແມ່ນລູກຫຼານຜູ້ດີເດັ່ນຂອງຈີນ ໄດ້ລ່ວງລັບຢູ່ແຜ່ນ ດິນຂອງປະເທດລາວຕະຫຼອດໄປ ເພື່ອຊ່ວຍປະຊາຊົນລາວຍາດເອົາເອກະລາດ ແລະ ປົດປ່ອຍປະເທດຊາດອັນໄດ້ຂຽນບົດກອນວິລະກຳດ້ວຍເລືອດເນື້ອ ແລະ ໄດ້ເສີມສ້າງໄມຕີຈິດມິດຕະພາບ ລາວ-ຈີນ ໃຫ້ຍືນຍົງດ້ວຍຊີວິດຂອງຕົນ. ວິລະກຳຂອງພວກເຂົາເຈົ້າຈະຈາລຶກໄວ້ຢູ່ ໃນດວງໃຈຂອງປະຊາຊົນສອງຊາດ ລາວ-ຈີນຕະຫຼອດຊົ່ວກາລະນານ.ສ່ວນສະຫາຍ ພັນເອກພິເສດ Zhu Ting chuan ຫົວໜ້າຄະນະຜູ້ແທນ ຫົວໜ້າຫ້ອງການຄົ້ນຄວ້າວຽກງານການເມືອງກອງທັບວິທະຍາຄານວິທະຍາສາດການທະຫານຈີນ ໄດ້ກ່າວຄຳປາໄສຕໍ່ໜ້າເວທີ ເພື່ອສະ ແດງຄວາມລະນຶກເຖິງຄຸນງາມ ຄວາມດີຂອງຜູ້ເສຍສະຫຼະຊີວິດຢ່າງເລິກເຊິ່ງ ແລະ ເຄົາລົບນັບຖືຢ່າງສູງຕໍ່ບັນດານັກຮົບວິລະຊົນຈີນທີ່ເສຍສະຫຼະຊີວິດໃນປາງສົງ ຄາມຊ່ວຍເຫຼືອລາວຕ້ານຈັກກະ ພັດຫຼ່າເມືອງຂຶ້ນແບບໃໝ່ວ່າໃນຖານະເປັນອົງການຄົ້ນຄວ້າປະ ຫວັດສາດການທະຫານຂອງກອງ ທັບຈີນ ແລະ ລາວ, ວິທີທີ່ດີທີ່ສຸດ ເພື່ອລະນຶກເຖິງວິລະຊົນຜູ້ເສຍສະ ຫຼະຊີວິດແມ່ນສືບທອດມູນເຊື້ອ ແລະ ເສີມຂະຫຍາຍຈິດໃຈຂອງນັກຮົບວິລະຊົນຜູ້ເສຍສະຫຼະຊີວິດ, ຂຽນປະຫວັດສາດຄວາມສາມັກຄີມິດຕະພາບ ຈີນ-ລາວ ໃຫ້ດີ ແລະ ສືບທອດສາຍພົວພັນມິດຕະພາບທີ່ເປັນມູນເຊື້ອລະຫວ່າງຈີນ-ລາວໃຫ້ດີທີ່ສຸດ.

ໃນພິທີປາຖະກະຖາສະເຫຼີມ ສະຫຼອງວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 65 ປີ ໃນວັນທີ 24 ເມສາ 2026 ທີ່ນະຄອນ ຫຼວງວຽງຈັນ. ສະຫາຍ ຫວັງ ຢົງເຈີງ ອະດີດນັກຮົບຈີນ ຊ່ວຍລາວຕ້ານ ຈັກກະພັດຫຼ່າເມືອງຂຶ້ນແບບໃໝ່ ໄດ້ຕາງໜ້າໃຫ້ນັກຮົບເກົ່າຈີນຂຶ້ນກ່າວໃນພິທີ ເພື່ອຫວນຄືນບັນທຶກຄວາມຊົງຈຳໂດຍມີເນື້ອໃນວ່າ: ແຕ່ປີ 1962 ຫາ 1978, ເພື່ອສະ ໜັບສະໜູນພາລະກິດປະຕິວັດຂອງປະຊາຊົນລາວໃນການປົກປັກຮັກສາເອກະລາດແຫ່ງຊາດ ແລະ ຕ້ານການຮຸກຮານຈາກພາຍນອກ ແລະ ອີງຕາມຂໍ້ຕົກລົງຂອງສອງປະ ເທດ, ຈີນໄດ້ສົ່ງກອງພັນທະຫານ ຊ່າງແສງ 18 ກອງພັນ ແລະ ກອງພັນກຳມະກອນ 3 ກອງພັນເຂົ້າສູ່ປະເທດລາວ ເພື່ອປະຕິບັດໜ້າທີ່ກໍ່ສ້າງທາງ ໂດຍກໍ່ສ້າງສຳເລັດຍາວ 822 ກິໂລແມັດ ຊຶ່ງກໍຄືເສັ້ນທາງເລກ 13 ເໜືອທີ່ຍັງນຳໃຊ້ຢູ່ລາວໃນປັດຈຸບັນ. ນີ້ຄືເສັ້ນທາງແຫ່ງມິດຕະ ພາບ ແລະ ເສັ້ນທາງແຫ່ງຊີວິດທີ່ ກອງທັບ ແລະ ປະຊາຊົນ ຈີນ-ລາວໄດ້ຄຽງບ່າຄຽງໄຫຼ່ກັນກໍ່ສ້າງຂຶ້ນດ້ວຍເລືອດ ແລະ ເຫື່ອແຮງ. ໃນວັນທີ 6 ກັນຍາ 1968, ໜ່ວຍງານຊຸດທຳອິດທີ່ເຂົ້າສູ່ລາວ ເພື່ອປະຕິບັດໜ້າທີ່ສຳຫຼວດເສັ້ນທາງໄດ້ຖືກເຮືອ ບິນສັດຕູໂຈມຕີຢູ່ເຂດເມືອງຮຸນພ້ອມຍິງໝາກກະໂພກສັນຍານບອກ ເປົ້າໝາຍ.

ສະຫາຍ ຈາງ ຊູຊຸ້ນ ແລະ ສະ ຫາຍອື່ນໆ ລວມ 13 ສະຫາຍ ໄດ້ ເສຍສະຫຼະຊີວິດຢ່າງອົງອາດກ້າ ຫານ, ມີພຽງ 5 ສະຫາຍ ເທົ່ານັ້ນທີ່ ຮູ້ຊື່, ສ່ວນວິລະຊົນອີກ 8 ສະຫາຍແມ່ນໄດ້ເສຍສະຫຼະຊີວິດຢູ່ດິນແດນ ແຫ່ງນີ້ຕະຫຼອດການ, ກາຍເປັນນັກ ຮົບນິລະນາມ ແຕ່ໄດ້ໃຊ້ຊີວິດເປີດທາງໃຫ້ແກ່ກອງກຳລັງໃຫຍ່ທີ່ຈະຕາມມາ. ໃນເດືອນກັນຍາ 1977, ຢູ່ຈຸດ 270 ກິໂລແມັດຂອງເສັ້ນທາງສາຍໃໝ່ຕາເວັນອອກ, ໄດ້ພົບກັບຮ່ອມພູເລິກຍາວ 200 ແມັດ. ຢູ່ເທິງໜ້າຜາອັນສູງຊັນ, ຄະນະກໍ່ສ້າງຂອງຝ່າຍຈີນໄດ້ໃຊ້ເຊືອກມັດແອວຫ້ອຍໂຕຢູ່ກາງເວຫາ ເພື່ອລະເບີດໜ້າຜາ, ທຸກບາດກ້າວລ້ວນແຕ່ເຕັມ ໄປດ້ວຍຄວາມອັນຕະລາຍແຕ່ບໍ່ມີໃຜທໍ້ຖອຍຈາກການກໍ່ສ້າງນີ້. ເຂົາ

ເຈົ້າໄດ້ຜັດປ່ຽນກັນເຮັດວຽກທັງກາງ ເວັນ ແລະ ກາງຄືນຈົນສາມາດເປີດທາງ ແລະ ສຳເລັດການກໍ່ສ້າງໄດ້ຕາມກຳນົດ. ກອງຮ້ອຍ 13 ຂອງກອງພັນ 727 ທີ່ຮັບຜິດຊອບວຽກນີ້ໄດ້ຮັບນາມມະຍົດເປັນກອງຮ້ອຍດີເດັ່ນປະເພດ 3 ແລະ ສະຫາຍ ໄກສອນ ພົມວິຫານ ນາຍົກລັດຖະມົນຕີລາວ ໃນເວລານັ້ນໄດ້ໃຫ້ກຽດປະ ດັບຫຼຽນໄຊແຮງງານ ຊັ້ນ I ໃຫ້ແກ່ ກອງຮ້ອຍ 13 ດ້ວຍຕົນເອງ. ໃນນັ້ນ

“ຂົວຂ້າມນ້ຳອູແມ່ນໂຄງການທີ່ສຳ ຄັນຂອງເສັ້ນທາງສາຍໃໝ່ຕາເວັນອອກ. ຂົວແຫ່ງນີ້ຕັ້ງຢູ່ຈຸດ 200 ກິ ໂລແມັດ ໂດຍມີນ້ຳອູຂັ້ນກາງ, ສອງຝັ່ງເປັນພູສູງຊັນທີ່ມີຄວາມແຕກຕ່າງລະດັບສູງກວ່າ 900 ແມັດ. ລະ ດັບນ້ຳໃນລະດູແລ້ງ ແລະ ລະດູຝົນ ມີຄວາມແຕກຕ່າງກັນຫຼາຍ, ກະແສນ້ຳໄຫຼແຮງ, ການກໍ່ສ້າງມີຄວາມ ຫຍຸ້ງຍາກທີ່ສຸດ”. ແຕ່ຝ່າຍຈີນໄດ້ນຳໃຊ້ເຕັກນິກໃໝ່ຫຼ້າສຸດ ເພື່ອຜ່ານຜ່າອຸປະສັກ ແລະ ສ້າງຂົວສຳເລັດກ່ອນກຳນົດໃນເດືອນມີນາ ປີ 1978.

ໃນປັດຈຸບັນ, ຂົວທີ່ມີຄວາມຍາວ 256 ແມັດ ແຫ່ງນີ້ຍັງຄົງເດັ່ນສະ ຫງ່າຢູ່ເທິງນ້ຳອູ.

ເພື່ອຮັບປະກັນໃຫ້ການກໍ່ສ້າງທາງດຳເນີນໄປຢ່າງສະດວກ ແລະ ຮັບປະກັນຄວາມປອດໄພຂອງຜູ້ຄະນະກໍ່ສ້າງ, ກອງທັບປືນໃຫຍ່ຕ້ານອາກາດຍານຂອງຈີນໄດ້ເຂົ້າຮ່ວມສູ້ຮົບທັງໝົດ 95 ຄັ້ງ, ຍິງຍົນຮົບຈັກກະພັດຕົກ 35 ລຳ ແລະ ເຮັດໃຫ້ໄດ້ຮັບຄວາມເສຍຫາຍ 24 ລຳ.

ໃນນັ້ນ, ກອງພັນ 707 ແລະ 710 ທີ່ເຂົ້າມາຊຸດທຳອິດໄດ້ສ້າງຜົນງານດີເດັ່ນດ້ວຍຍຸດທະວິທີດັກຍິງ ໂດຍຍິງຍົນຕົກ 9 ລຳ ແລະ ເສຍຫາຍ 8 ລຳ. ໃນວັນທີ 14 ພຶດສະພາ 1971, ກອງທັບຈັກກະພັດໄດ້ສົ່ງຍົນສູ້ຮົບ F-4 ຈຳນວນ 3 ຊຸດ ລວມ 7 ລຳ

ເຂົ້າໂຈມຕີຄ້າຍຂອງກອງພັນ 712 ກອງຮ້ອຍ 2 ຢູ່ຈຸດ 106 ກິໂລແມັດຂອງເສັ້ນທາງສາຍຕາເວັນອອກ. ກອງທັບປືນໃຫຍ່ຕ້ານອາກາດຍານຂອງຈີນໄດ້ຕອບໂຕ້ຢ່າງອົງອາດ, ຍິງຍົນສັດຕູຕົກທັນທີ 2 ລຳ ແລະ ເສຍຫາຍ 1 ລຳ. ຍົນສັດຕູໄດ້ລອບໂຈມຕີຈາກທາງຫຼັງ, ຖິ້ມລະເບີດໃຫຍ່, ລະເບີດກະຈາຍ ແລະ ລະເບີດລູກຫວ່ານເປັນຈຳນວນຫຼວງຫຼາຍ. ໃນສະໜາມຮົບເຕັມໄປດ້ວຍຄວັນໄຟ ແຕ່ນັກຮົບທຸກສະຫາຍໄດ້ຕໍ່ສູ້ຢ່າງສຸດຂີດ. ໃນການສູ້ຮົບຄັ້ງນີ້ມີຜູ້ເສຍສະຫຼະຊີວິດ 24 ສະຫາຍ ແລະ ບາດເຈັບກວ່າ 70 ສະຫາຍ; ວິລະຊົນຜູ້ອົງອາດເຫຼົ່ານີ້ຍັງຄົງຫຼັບໄຫຼຢູ່ດິນແດນອັນອົບອຸ່ນຂອງປະເທດລາວ, ວິລະກຳຂອງເຂົາເຈົ້າປະຊາ ຊົນສອງຊາດ ຈີນ-ລາວ ຈະບໍ່ມີວັນລະລືມ ແລະ ຈະຈົດຈຳໄວ້ໃນດວງໃຈຕະຫຼອດໄປ.

ສຸພາສິດລາວກ່າວໄວ້ວ່າ: “ຢາກໄປໜ້າຕ້ອງເບິ່ງຫຼັງ” ຊຶ່ງມີຄວາມໝາຍວ່າ ການເປັນຄູ່ຮ່ວມຊາຕາກຳລາວ-ຈີນ ຫາກບໍ່ແມ່ນຕັ້ງຊື່ເອີ້ນແລະ ຄຳຂວັນຂຶ້ນມາ ເພື່ອຟັງແລ້ວໃຫ້ມ່ວນຫູເທົ່ານັ້ນ, ແຕ່ຍັງປັນຄຳເວົ້າທີ່ໄດ້ແລກມາດ້ວຍເຫື່ອແຮງແລະ ຢາດເລືອດຂອງປະຊາຊົນແລະ ນັກຮົບຂອງສອງຊາດລາວແລະ ຈີນຢ່າງພິລະອາດຫານຊານໄຊທີ່ບໍ່ມີສັດຕູໂຕໃດສາມາດເອົາໄຊຊະນະໄດ້. ການສະໜັບສະໜູນແລະ ໃຫ້ການຊ່ວຍເຫຼືອ ໃນໄລຍະຕໍ່ສູ້ກູ້ຊາດຂອງກອງທັບ ແລະ ປະຊາຊົນລາວຂອງພັກ ແລະ ລັດຖະ ບານຈີນໃນເວລານັ້ນ, ບໍ່ພຽງແຕ່ສົ່ງທະຫານ ແລະ ວັດຖຸອຸປະກອນ ແລະ ອາວຸດເຂົ້າມາຊ່ວຍເຫຼືອເທົ່ານັ້ນ, ຫາກຍັງໄດ້ມາຕັ້ງສະຖານທູດຈີນປະຈຳປະເທດລາວແຫ່ງທຳອິດຢູ່ ທີ່ຖ້ຳແຫ່ງໜຶ່ງຂອງເມືອງວຽງໄຊແຂວງຫົວພັນ, ເພື່ອເປັນການຮັບຮູ້ລັດຖະບານຂອງຝ່າຍປະເທດ ລາວພາຍໃຕ້ການຊີ້ນຳ ແລະ ນຳພາຂອງພັກ ປປ ລາວ ໃນເວລານັ້ນ ຊຶ່ງພວກເຮົາພາກັນເອີ້ນວ່າ: “ຖ້ຳຈີນ ເພື່ອຢັ້ງຢືນວ່າ ພັກ ແລະ ລັດຖະບານຈີນ ຮັບຮູ້ການປະຕິວັດລາວຢ່າງເປັນ ທາງການ ນັບແຕ່ເວລານັ້ນເປັນຕົ້ນມາ. ປັດຈຸບັນຖ້ຳຈີນ ພວມໄດ້ຮັບ ການອອກແບບ ເພືີ່ອບູລະນະສ້ອມ ແປງຈາກກົມວິທະຍາສາດ-ປະ ຫວັດສາດການທະຫານກະຊວງ ປ້ອງກັນປະເທດ ແຫ່ງ ສປປ ລາວ, ເພື່ອປະກອບສ່ວນເຂົ້າໃນການຂຽນໜ້າປະຫວັດມູນເຊື້ອ ລາວ-ຈີນ ເວົ້າລວມ, ເວົ້າສະເພາະແມ່ນສອງ ກອງທັບ ລາວ-ຈີນ ໃນສະໄໝຕໍ່ສູ້ປົດປ່ອຍຊາດກໍຄືການພົວພັນຮ່ວມມືໃນແຕ່ລະໄລຍະໃຫ້ເປັນອະນຸ ສອນທາງປະຫວັດສາດ, ທັງເປັນການສ້າງເຂດແຫຼ່ງທ່ອງທ່ຽວທາງປະຫວັດສາດແຫ່ງໃໝ່ໃຫ້ຄົນຮຸ່ນໃໝ່ໄດ້ຮຽນຮູ້ຕື່ມອີກ”.

ເມື່ອຫວນຄືນເຖິງວັນເວລາແຫ່ງແປວໄຟສົງຄາມ, ພວກເຮົາຮູ້ ສຶກຕື້ນຕັນໃຈ; ແຕ່ເມື່ອເບິ່ງໄປຍັງ ອະນາຄົດ, ພວກເຮົາມີຄວາມເຊື່ອໝັ້ນຢ່າງແຮງກ້າວ່າ: ພາຍໃຕ້ການຊີ້ນຳຍຸດທະສາດຂອງຜູ້ນຳສູງສຸດຂອງສອງປະເທດ, ສາຍພົວພັນຄູ່ ຮ່ວມມືຍຸດທະສາດຮອບດ້ານ ລາວ-ຈີນ ສືບຕໍ່ນັບມື້ນັບແໜ້ນແຟ້ນ, ການສ້າງຄູ່ຮ່ວມຊາຕາກຳ ຈີນ-ລາວ ນັບມື້ໄດ້ກ້າວເຂົ້າສູ່ລວງເລິກ ແລະ ປະ ກົດຜົນເປັນຈິງ. ດອກໄມ້ແຫ່ງມິດ ຕະພາບທີ່ເຄີຍໄດ້ຮັບການຫົດສົງດ້ວຍເລືອດເນື້ອໃນມື້ນັ້ນ, ໃນມື້ນີ້ໄດ້ອອກດອກອອກຜົນຢ່າງງົດງາມ. ສັງລວມແລ້ວ, 65 ປີແຫ່ງການສືບ ສານ ແລະ 65 ປີແຫ່ງການຮ່ວມທຸກຮ່ວມສຸກໄດ້ສ້າງໃຫ້ການພົວພັນ ລາວ-ຈີນ ນັບມື້ແໜ້ນແຟ້ນ, ໜຽວ

ແໜ້ນທົນທານ ໂດຍສະເພາະພາຍຫຼັງຜົນສຳເລັດຂອງການຢ້ຽມຢາມ ລັດຖະກິດ ສປ ຈີນ ຂອງສະຫາຍທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ ປະທານປະເທດ ແຫ່ງ ສປປ ລາວ ລະຫວ່າງວັນທີ 2-6 ມິຖຸນາ ປີ 2026 ຜ່ານມາ, ການນຳສອງປະເທດໄດ້ມີຄວາມເອກະພາບສູງ ໃນການຍົກຖານະບົດບາດການພົວພັນຈາກການເປັນຄູ່ຮ່ວມຊາຕາກຳດຽວກັນກ້າວຂຶ້ນເປັນການສ້າງຄູ່ຮ່ວມຊາຕາກຳທີ່ເຂັ້ມແຂງໜຽວແໜ້ນໃນທຸກສະພາບການຂອງຍຸກໃໝ່ດ້ວຍມາດຕະຖານສູງ, ມີຄຸນນະພາບສູງ ແລະ ມີລະດັບສູງດ້ວຍການກະທຳຕົວຈິງ. ໂດຍ: ດວງຈິດ ສະຫວັດບຸນມີ

ຄຳຂວັນ: ຂໍ່ານັບຊົມເຊີຍວັນສະຖາປະນາສາທາລະນະລັດ ປະຊາຊົນຈີນ ຄົບຮອບ 77 ປີ (1/10/1949-1/10/2026) ຢ່າງສຸດໃຈ!