ສພຂ ແລະ ອົງການປົກຄອງແຂວງອຸດົມໄຊ ສ່ອງແສງວຽກງານຊຶ່ງກັນ ແລະ ກັນ

ເມື່ອບໍ່ດົນມານີ້ ທີ່ຫ້ອງປະຊຸມ ຫ້ອງວ່າການແຂວງອຸດົມໄຊ ໄດ້ຈັດກອງປະຊຸມສ່ອງແສງວຽກງານ ລະຫວ່າງ ສະພາປະຊາຊົນແຂວງ (ສພຂ) ແລະ ອົງການປົກຄອງແຂວງອຸດົມໄຊ ຂຶ້ນ ໂດຍມີ ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ, ທ່ານ ຄຳດີ ວົງລ້ອມ ປະທານ ສພຂ ອຸດົມໄຊ ພ້ອມດ້ວຍຄະນະ ແລະ ພະແນກການທີ່ກ່ຽວຂ້ອງ ເຂົ້າຮ່ວມ.
ຈຸດປະສົງຂອງກອງປະຊຸມ ເພື່ອເປັນການສ່ອງແສງລາຍງານວຽກພົ້ນເດັ່ນ ໄລຍະ 9 ເດືອນຜ່ານມາ, ສະຫຼຸບຖອດຖອນບົດຮຽນໃນການກະກຽມດໍາເນີນກອງປະຊຸມສະໄໝສາມັນຜ່ານມາ ແລະ ພ້ອມທັງເປັນການປຶກສາຫາລືການກະກຽມບັນດາຂໍ້ມູນຕ່າງໆທີ່ຈະນໍາເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງອຸດົມໄຊ ຊຸດທີ II. ກອງປະຊຸມໄດ້ຮັບຟັງການລາຍງານການຈັດຕັ້ງປະຕິບັດວຽກງານທີ່ພົ້ນເດັ່ນຂອງອົງການປົກຄອງແຂວງ ປະຈຳ 9 ເດືອນ ແລະ ທິດທາງວຽກງານຈຸດສຸມ 3 ເດືອນທ້າຍປີ 2023 ຕິດພັນວາລະເຄັ່ງຮ້ອນຂອງລັດຖະບານ. ຜ່ານມາ ໄລຍະ 9 ເດືອນ ພາຍໄຕ້ການ ຊີ້ນຳ-ນຳພາ ຂອງອົງການປົກຄອງແຂວງ ມີຫຼາຍດ້ານທີ່ພົ້ນເດັ່ນ ຄື: ສຸມໃສ່ເຮັດວຽກງານການເມືອງ-ນຳພາແນວຄິດໃຫ້ພະນັກງານ ສະມາຊິກພັກ ຕະຫຼອດຮອດປະຊາຊົນບັນດາເຜົ່າພາຍໃນແຂວງ ຮັບຮູ້ ແລະ ເຂົ້າໃຈ, ສຸມໃສ່ຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ຕິດພັນກັບການຈັດຕັ້ງປະຕິບັດວາລະແຫ່ງຊາດ, ສຸມໃສ່ຜັນຂະຫຍາຍການຈັດຕັ້ງປະຕິບັດບັນດາມະຕິ, ຄຳສັ່ງ ແລະ ນິຕິກຳທີ່ເລັ່ງດ່ວນຂອງລັດຖະບານຢ່າງຕັ້ງໜ້າ, ສຸມໃສ່ວຽກງານເສດຖະກິດ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເປັນຕົ້ນ ເອົາໃຈໃສ່ດຶງດູດການລົງທຶນຂອງ ພາກລັດ, ເອກະຊົນ ແລະ ຕ່າງປະເທດ ເຂົ້າໃນການພັດທະນາແຂວງ ໃນນີ້ ແຜນການລົງທຶນຂອງລັດ 45.549,92 ລ້ານກີບ, ການລົງທຶນຂອງພາກເອກະຊົນ 30.774.671,35 ລ້ານກີບ ແລະ ຜົນງານດ້ານອື່ນໆ, ພ້ອມນີ້ ຍັງໄດ້ຮັບຟັງການລາຍງານຫຍໍ້່ ການຕິດຕາມ ກວດກາ ການເຄື່ອນໄຫວຈັດຕັ້ງປະຕິບັດວຽກງານຂອງອົງການປົກຄອງແຂວງ ຕິດພັນກັບການແກ້ໄຂຄຳຮ້ອງທຸກຂອງປະຊາຊົນ, ບົດສະຫຼຸບຖອດຖອນບົດຮຽນການຈັດກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ຊຸດທີ II ແລະ ຜ່ານທິດທາງແຜນການຈັດກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II, ກອງປະຊຸມ ຍັງໄດ້ເປີດກ້ວາງໃຫ້ແຕ່ລະພາກສ່ວນໄດ້ປະກອບຄວາມຄິດເຫັນເຂົ້າໃນວຽກງານຕ່າງໆ ເພື່ອຊອກຫາວິທີແກ້ໄຂທີ່ຖືກຕ້ອງ ແລະ ສອດຄ່ອງ. 
(ຂ່າວ: ແສງອາທິດ)