ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ໃຫ້ຮູ້ເຫດຜົນ ແລະ ຄວາມຈໍາເປັນໃນການປັບປຸງບາງມາດຕາຂອງກົດໝາຍດັ່ງກ່າວວ່າ: ໃນປີ 2018 ຄະນະບໍລິຫານງານສູນກາງພັກໄດ້ອອກມະຕິ ສະບັບເລກທີ 037/ຄບສພ, ລົງວັນທີ 18 ມິຖຸນາ 2018 ວ່າດ້ວຍການຍົກສູງປະສິດທິພາບການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ ແລະ ກົມການເມືອງສູນກາງພັກໄດ້ອອກມະຕິສະບັບເລກທີ 112/ກມສພ, ລົງວັນທີ 2 ມິຖຸນາ 2020 ວ່າດ້ວຍການຍົກສູງຄຸນນະພາບການດໍາເນີນຄະດີຕາມຂະບວນຍຸຕິທຳ;ສານປະຊາຊົນສູງສຸດໄດ້ກໍານົດແຜນພັດທະນາລະບົບສານປະຊາຊົນ 5 ປີ ຄັ້ງທີ IV (2021-2025) ໂດຍໄດ້ກຳນົດແຜນງານ, ໂຄງການໃນການຄຸ້ມຄອງ ແລະການເຄື່ອນໄຫວການປະຕິບັດໜ້າທີ່ຂອງຜູ້ພິພາກສາ ໃຫ້ມີຄວາມໂປ່ງໃສໃນທຸກຂັ້ນຕອນຂອງການດໍາເນີນຄະດີ ແລະ ຮັບປະກັນໃຫ້ການຕັດສິນຄະດີຖືກຕ້ອງກັບກົດໝາຍ ແລະ ຄວາມເປັນຈິງໄປຄຽງຄູ່ກັນ;ຮັບປະກັນການຄຸ້ມຄອງມະຫາພາກຂອງສານປະຊາຊົນສູງສຸດ ຕໍ່ສານປະຊາຊົນທ້ອງຖິ່ນ ແລະ ສານທະຫານຢ່າງມີປະສິດທິພາບ ໂດຍສະເພາະການແຕ່ງຕັ້ງ, ຍົກຍ້າຍ, ປົດຕຳແໜ່ງ ແລະ ການຕິດຕາມກວດກາ ການປະຕິບັດໜ້າທີ່ຂອງສານປະຊາຊົນໃຫ້ມີຄວາມວ່ອງໄວ ແລະ ທັນສະພາບການຕົວຈິງ;ການຄຸ້ມຄອງສໍານວນຄະດີຂອງສານສາມຂັ້ນບໍ່ທັນມີກົນໄກຊັດເຈນເຮັດໃຫ້ການຄຸ້ມຄອງກວດກາການຕັດສິນຂອງສານບໍ່ສາມາດຮູ້ໄດ້ຂັ້ນຕອນການສິ້ນສຸດ, ການດໍາເນີນຄະດີຕາມຂະບວນຍຸຕິທຳ. ສະນັ້ນ, ຈຶ່ງຕ້ອງໄດ້ກຳນົດກົນໄກຄຸ້ມຄອງບັນຫາດັ່ງກ່າວໃຫ້ລະອຽດ.
ພາຍຫຼັງທີ່ກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍສານປະຊາຊົນໄດ້ຮັບຮອງໃນປີ 2022ໄດ້ມີການນໍາໃຊ້ມາເປັນເວລາ 3 ປີ; ຈົນມາຮອດປີ 2024 ສະພາແຫ່ງຊາດໄດ້ຮັບຮອງເອົາກົດໝາຍວ່າດ້ວຍການດໍາເນີນຄະດີແພ່ງສະບັບປັບປຸງ ແລະ ໃນຕົ້ນປີ 2025 ກໍໄດ້ປະກາດໃຊ້ລັດຖະທໍາມະນູນສະບັບປັບປຸງ.ພ້ອມດຽວກັນນັ້ນ, ອີງໃສ່ສະພາບການຈັດຕັ້ງປະຕິບັດແຜນພັດທະນາລະບົບສານປະຊາຊົນ 5 ປີ ຄັ້ງທີ IV (2021-2025) ແລະແຜນການເຄື່ອນໄຫວວຽກງານຮອບດ້ານຂອງສານປະຊາຊົນ ຊຶ່ງມີຄວາມຈໍາເປັນໃນການປັບປຸງບາງມາດຕາຂອງກົດໝາຍວ່າດ້ວຍສານປະຊາຊົນໂດຍອີງໃສ່ສະພາບຄວາມຫຍຸ້ງຍາກໃນການຈັດຕັ້ງປະຕິບັດຕົວຈິງຈຶ່ງມີຄວາມຈໍາເປັນຕ້ອງໄດ້ປັບປຸງບາງມາດຕາຂອງກົດໝາຍວ່າດ້ວຍສານປະຊາຊົນໃຫ້ມີຄວາມສອດຄ່ອງ ແລະ ກົມກຽວກັນ;ການແຕ່ງຕັ້ງ, ຍົກຍ້າຍ ຫຼືປົດຕຳແໜ່ງຂອງພະນັກງານສານປະຊາຊົນຍັງມີກົນໄກທີ່ບໍ່ລະອຽດ, ຈະແຈ້ງ, ມີບາງອັນຊໍ້າຊ້ອນ ເຮັດໃຫ້ມີປະກົດການ ການແກ້ໄຂບຸກຄະລາກອນມີຄວາມຊັກຊ້າ, ແກ່ຍາວ;ການຄຸ້ມຄອງ, ການຕິດຕາມກວດກາການປະຕິບັດໜ້າທີ່ ແລະ ການປະພຶດຂອງພະນັກງານສານປະຊາຊົນ ຍັງບໍ່ທັນຮັດກຸມ ແລະ ຜ່ານຫຼາຍຂັ້ນຕອນ ໂດຍບໍ່ສົມເຫດສົມຜົນ. ສໍາລັບໂຄງປະກອບ ແລະ ເນື້ອໃນຂອງກົດໝາຍສະບັບນີ້ປະກອບມີ 4 ມາດຕາຕາມຮູບແບບ ແລະ ໂຄງປະກອບຂອງການປັບປຸງບາງມາດຕາ. ສ່ວນເນື້ອໃນການປັບປຸງແມ່ນໄດ້ປັບປຸງທັງໝົດ 6 ມາດຕາ.
ທ່ານ ນາງ ວຽງທອງ ສີພັນດອນ ກ່າວຕື່ມວ່າ: ຄາດຄະເນຜົນໄດ້ຮັບພາຍຫຼັງກົດໝາຍສະບັບນີ້ໄດ້ຮັບການຮັບຮອງ ແລະ ປະກາດໃຊ້ແລ້ວຈະກາຍເປັນເຄື່ອງມືສໍາຄັນໃຫ້ສານປະຊາຊົນສູງສຸດ ແລະ ສານປະຊາຊົນ ທ້ອງຖິ່ນນໍາໃຊ້ເຂົ້າໃນການຄຸ້ມຄອງ, ຕິດຕາມ, ກວດກາ ການປະຕິບັດໜ້າທີ່ຂອງສານປະຊາຊົນໄດ້ຢ່າງມີປະສິດທິພາບ, ຮັບປະກັນໃຫ້ການຕັດສິນ, ພິພາກສາຄະດີມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ເປັນທໍາຍິ່ງຂຶ້ນ;ການແຕ່ງຕັ້ງ, ຍົກຍ້າຍ ຫຼືປົດຕຳແໜ່ງຂອງພະນັກງານສານປະຊາຊົນມີຄວາມໂປ່ງໃສ, ຖືກຕ້ອງກັບສະພາບການຕົວຈິງ.(ຂ່າວ: ວັນເພັງ, ພາບ: ພອນປະເສີດ)
ຄໍາເຫັນ