 |
ທ່ານ ນາງ ວົງອາກອນ ເພັງດາລິດ ຮອງຫົວໜ້າກົມຈັດຕັ້ງ ສສຍລ ໄດ້ຂຶ້ນລາຍງານແຜນຊຸດອົບຮົມຍົກລະດັບທິດສະດີ-ແນວທາງຂອງພັກ ໃຫ້ແກ່ສະມາຊິກພັກ, ພະນັກງານສູນກາງສະພັນແມ່ຍິງລາວ ຊຸດທີ I ຊຶ່ງຈະໄດ້ດໍາເນີນ ແຕ່ວັນທີ 14-25 ກັນຍາ 2026 (ເປັນເວລາ 9 ວັນ) ແລະ ມີນັກສໍາມະນາກອນ ທັງໝົດ 41 ສະຫາຍ ຍິງ 36 ສະຫາຍ. ເນື້ອໃນເອກະສານຝຶກອົບຮົມ ມີ 14 ບົດ (ຫຼື 14 ຫົວຂໍ້) ຄື: ໜຶ່ງ, ຄວາມຮູ້ພື້ນຖານກ່ຽວກັບລັດທິມາກ-ເລນິນ. ສອງ, ວິທີວັດຖຸນິຍົມສັດຈະວິພາກ. ສາມ, ການກໍາເນີດພັກປະຊາຊົນ ປະຕິວັດລາວ. ສີ່, ສ້າງ ແລະ ບູລະນະລະບອບປະຊາທິປະໄຕ. ຫ້າ, ແນວທາງປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ. ຫົກ, ຝຶກຝົນຄຸນທາດການເມືອງ ແລະ ຄຸນສົມບັດສິນທໍາປະຕິວັດ. ເຈັດ, ສ້າງການຫັນປ່ຽນວຽກງານພະນັກງານ ໃນເງື່ອນໄຂປັດຈຸບັນ. ແປດ, ສັງຄົມສາມັກຄີປອງດອງ ແມ່ນບໍ່ເກີດແຫ່ງກໍາລັງແຮງຂອງການປົກປັກຮັກສາ ແລະ ສ້າງສາພັດທະນາປະເທດຊາດ. ເກົ້າ, ແນວທາງເສດຖະກິດຂອງພັກ ຕິດພັນກັບການພັດທະນາວັດທະນະທໍາ ແລະ ສິ່ງແວດລ້ອມ. ສິບ, ສ້າງລັດແຫ່ງກົດໝາຍເທື່ອລະກ້າວ ພາຍໃຕ້ການນໍາພາຂອງພັກ. ສິບເອັດ, ແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ. ສິບສອງ, ການຫັນເປັນອຸດສະຫະກໍາ ແລະ ທັນສະໄໝຢູ່ປະເທດເຮົາ. ສິບສາມ, ແນວທາງການຕ່າງປະເທດທີ່ສ້າງສັນ, ການພົວພັນເພື່ອນມິດຍຸດທະສາດ. ສິບສີ່, ການຈັດຕັ້ງປະຕິບັດແນວທາງ ແລະ ແຜນນະໂຍບາຍຂອງພັກເຂົ້້າສູ່ຊີວິດຕົວຈິງ.
 |
ທ່ານ ນາງ ທໍາມາ ເພັດວິໄຊ ໄດ້ກ່າວວ່າ: ການເປີດຊຸດອົບຮົມໃນຄັ້ງນີ້ ເພື່ອຜັນຂະຫຍາຍມະຕິກອງປະຊຸມໃຫຍ່ຜູ້ແທນແມ່ຍິງທົ່ວປະເທດ ກໍຄືແຜນພັດທະນາແມ່ຍິງແຫ່ງຊາດ 5 ປີ ຄັ້ງທີ IX (2026-2030) ໃນການສ້າງຄວາມເຂັ້ມແຂງ ໃຫ້ພະນັກງານ-ລັດຖະກອນຂອງສູນກາງສະພັນແມ່ຍິງລາວ ໃນການຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ທິດສະດີ-ແນວທາງຂອງພັກ ໃນແຕ່ລະໄລຍະ ເພື່ອດັດປັບເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຕົນ ຕາມພາລະບົດບາດ ແລະ ການຈັດຕັ້ງມອບໝາຍໃຫ້ ນອກນັ້ນ, ເຮັດໃຫ້ພະນັກງານ, ສະມາຊິກພັກ ກໍຄືນັກສໍາມະນາກອນມີຄວາມຮັບຮູ້ ແລະ ເຂົ້າໃຈ ກ່ຽວກັບການສ້າງ ແລະ ການບູລະນະລະບອບປະຊາທິປະໄປະຊາຊົນ ຕາມທິດສັງຄົມນິຍົມ ໂດຍສະເພາະ ແມ່ນແນວທາງປ່ຽນແປງໃໝ່ຮອບດ້ານທີ່ມີຫຼັການຂອງພັກ, ການປົກປັກຮັກສາ ແລະ ການສ້າງສາພັດທະນາປະເທດຊາດ ແລະ ຍັງເປັນການເປີດໂອກາດແລກປ່ຽນບົດຮຽນ, ປະສົບການຕົວຈິງ ນໍາບັນດານັກວິທະຍາກອນ ທີ່ມີປະສົບການ ແລະ ມີບົດຮຽນຫຼາກຫຼາຍ ຊຶ່ງເປັນຂໍ້ມູນພື້ນຖານອັນສໍາຄັນ ແລະ ຄວາມຮູ້ອັນລໍ້າຄ່າ ທີ່ສາມາດນໍາໄປໝຸນໃຊ້ເຂົ້າໃນການເຄື່ອນໄຫວວຽກງານຂະແໜງການຂອງຕົນຮອບຜິດຊອບ ທັງເປັນການຍົກລະດັບຄວາມຮັບຮູ້, ເຂົ້າໃຈ ຕໍ່ທິດສະດີມາກ-ເລນິນ, ຕໍ່ແນວທາງນະໂຍບາຍຂອງພັກ-ລັດ ໃຫ້ແກ່ນັກຝຶກອົບຮົມ, ເປັນການເພີ່ມຄວາມເຊື່ອໝັ້ນ, ຄວາມຫ້າວຫັນໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍ ແລະ ສືບຕໍ່ອົດທົນ, ສູ້ຊົນຜ່ານຜ່າຄວາມຫຍຸ້ງຍາກ ສ້າງບາດກ້າວບຸກທະລຸໃນວຽກງານຕ່າງໆ ທີ່ຖືກມອບໝາຍໃຫ້ສໍາເລັດ. ອີກດ້ານໜຶ່ງຈະເປັນການຊ່ວຍໃຫ້ບັນດາສະຫາຍທີ່ເຂົ້າຮ່ວມການຝຶກອົບຮົມ ໄດ້ປັບປຸງທັດສະນະຫຼັກໝັ້ນຊົນຊັ້ນກໍາມະກອນ, ຄຸນທາດການເມືອງ ແລະ ຄຸນ ສົມບັດສິນທໍາປະຕິວັດຂຶ້ນຕື່ມອີກ ເປັນຕົ້ນແມ່ນຄວາມເຊື່ອໝັ້ນຕໍ່ການນໍາພາຂອງພັກເຮົາໃນເງື່ອນໄຂໃໝ່ ແລະ ເພື່ອນໍາພາປະເທດຊາດໄປສູ່ຈຸດໝາຍທີ່ກໍານົດໄວ້ ກໍຄືສັງຄົມນິຍົມ.
(ຂ່າວ-ພາບ: ພະແນກອົບຮົມພະນັກງານ ແລະ ສະມ າຊິກພັກ)
ຄໍາເຫັນ