 |
ໂອກາດນີ້ ທ່ານ ສຸກດາວັນ ພັນຈັກຂັນ ກໍາມະການພັກແຂວງ ເລຂາບໍລິຫານງານພັກ ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ ຊຽງເງິນ ໄດ້ລາຍງານສະພາບ ການຈັດຕັ້ງປະຕິບັດວຽກງານຮອບດ້ານ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2026 ຂອງເມືອງ, ເຊີ່ງຄະນະບໍລິຫານງານພັກເມືອງ ໄດ້ເອົາໃຈໃສ່ຍົກສູງຄວາມສາມາດນໍາພາຂອງອົງຄະນະພັກ, ພັດທະນາກະສິກໍາ ຕິດພັນກັບການທ່ອງທ່ຽວ ບືນຕົວຂຶ້ນກຸ້ມຕົນເອງ ທາງດ້ານງົບປະມານ, ສູ້ຊົນກ້າວຂຶ້ນເປັນເມືອງເຂັ້ມແຂງຮອບດ້ານ, ພ້ອມນັ້ນ ທ່ານໄດ້ມີຄໍາສະເໜີ ໃຫ້ການນຳແຂວງ ຊ່ວຍຊຸກຍູ້ບັນຫາການສ້ອມແປງເສັ້ນທາງເລກທີ 13 ເໜືອ (ໄລຍະທາງແຕ່ 3 ແຍກບ້ານກົກງິ້ວ ຫາ 3 ແຍກ ບ້ານປາກແວດ-ສາມັກຄີໄຊ); ໂຄງການກໍ່ສ້າງ ແລະ ປັບປຸງເສັ້ນທາງ ແຕ່ ບ້ານຊຽງເງິນ ເຂົ້າຫາບ້ານດອນໂມ; ໂຄງການກໍ່ສ້າງຕາຄ່າຍໄຟຟ້າ ເຂົ້າບ້ານຫ້ວຍຝ້າຍ ແລະ ກໍ່ສ້າງລະບົບສັນຍານໂທລະສັບໃຫ້ກັບ ບັນດາບ້ານທີ່ຍັງບໍ່ທັນມີສັນຍານ ຈໍານວນ 9 ບ້ານ.
ຈາກນັ້ນ, ຜູ້ຕາງໜ້າພະແນກການຂອງແຂວງ ໄດ້ຜັດປ່ຽນກັນຂຶ້ນມີຄໍາເຫັນ ກ່ຽວກັບວຽກງານວິຊາສະເພາະຂອງແຕ່ລະພະແນກການ ໃຫ້ຜູ້ເຂົ້າຮ່ວມໄດ້ຮັບຮູ້ເຂົ້າໃຈ.
ທ່ານ ບຸນເລື່ອມ ມະນີວົງ ໄດ້ເຜີຍແຜ່ເນື້ອໃນ ຜົນສໍາເລັດຂອງກອງປະຊຸມຄັ້ງປະຖົມມະລືກຂອງ ສະພາແຫ່ງຊາດ ຊຸດທີ X ແລະ ສະພາປະຊາຊົນແຂວງ ຊຸດທີ V ພ້ອມທັງເປີດໂອກາດໃຫ້ຜູ້ເຂົ້າຮ່ວມ ມີຄໍາເຫັນ, ຄໍາສະເໜີ ຕໍ່ກັບບັນຫາປະກົດການຫຍໍ້ທໍ້, ຂໍ້ສະດວກ, ຂໍ້ຫຍຸ້ງຍາກ ທີ່ຕິດພັນກັບການດໍາລົງຊີວິດຂອງປະຊາຊົນ, ທັງໄດ້ອະທິບາຍ-ຊີ້ແຈງ ບາງຄຳເຫັນ ໃຫ້ປະຊາຊົນຮັບຮູ້, ເຂົ້າໃຈ, ທັງຮັບເອົາບາງຄໍາສະເໜີ ເພື່ອໄປປະສານສົມທົບກັບ ພາກສ່ວນທີ່ກ່ຽວຂ້ອງ ຫາວິທີທາງແກ້ໄຂໃຫ້ເໝາະສົມ.
ພ້ອມນັ້ນ ທ່ານໄດ້ຕາງໜ້າໃຫ້ ສະພາປະຊາຊົນ ແລະ ການນໍາຂັ້ນແຂວງ ມອບເງິນຊຸກຍູ້ວຽກງານຢູ່ເມືອງຊຽງເງີນ ຈໍານວນ 50 ລ້ານກີບ, ພ້ອມດ້ວຍຄອມພິວເຕີ ຈໍານວນ 2 ຊຸດ ເພື່ອນໍາໃຊ້ເຂົ້າໃນວຽກງານ ສະພາປະຊາຊົນປະຈໍາເມືອງຊຽງເງິນ, ທັງມອບເງິນສົດອີກ 15 ລ້ານກີບ ໃຫ້ຄະນະກຳມະການປົກຄອງ 3 ບ້ານ ທີ່ເຂົ້າຮ່ວມ ເພື່ອນຳໃຊ້ເຂົ້າໃນການພັດທະນາວຽກງານລວມຂອງບ້ານໃນຕໍ່ໜ້າ.
ພາຍຫຼັງສຳເລັດການ ພົບປະຜູ້ມີສິດປ່ອນບັດເລືອກຕັ້ງ, ທ່ານ ບຸນເລື່ອມ ມະນີວົງ ປະທານສະພາປະຊາຊົນແຂວງ, ພ້ອມດ້ວຍຄະນະ ໄດ້ເຄື່ອນໄຫວຕິດຕາມ ກວດກາ ໂຄງການກໍ່ສ້າງ ແລະປັບປຸງເສັ້ນທາງ ແຕ່ບ້ານຊຽງເງິນ ເຂົ້າຫາ ບ້ານດອນໂມ ໃນໄລຍະທາງ 3 ກິໂລແມັດ, ເປັນເສັ້ນທາງທີ່ມີຄວາມຈຳເປັນຫຼາຍ ເພື່ອນຳໃຊ້ເຂົ້າໃນການສັນຈອນຂອງປະຊາຊົນຫຼາຍບ້ານ, ເຊິ່ງຜ່ານມາໄດ້ຮັບການປະມູນສໍາເລັດແລ້ວ ແຕ່ບໍ່ທັນໄດ້ຮັບການຈັດຕັ້ງປະຕິບັດ, ເຮັດໃຫ້ການສັນຈອນຂອງປະຊາຊົນ ພົບຄວາມຫຍຸ້ງຍາກ ແລະ ມີຄວາມສ່ຽງ ຕໍ່ການເກີດອຸບັດເຫດ, ໂອກາດນີ້ ທ່ານ ບຸນເລື່ອມ ມະນີວົງ ໄດ້ໂອ້ລົມກັບພາກສ່ວນກ່ຽວຂ້ອງ ເພື່ອຊອກຫາວິທີແກ້ໄຂ ໃຫ້ເພື່ອຄວາມສະດວກ ໃນການເດີນທາງຂອງປະຊາຊົນ.
ຂ່າວ-ພາບ: ທະນູສີນ ອິດທິພົນ
ຄໍາເຫັນ