ທ່ານ ສົມພອນ ສີອຸດົມພັນ ມີຄໍາເຫັນວ່າ: ສໍາລັບພາກສະຫຼຸບແມ່ນເຫັນດີເປັນເອກະພາບ ແຕ່ຢູ່ໃນພາກທິດທາງແຜນການສະເໜີໃຫ້ເບິ່ງຄືນການກໍານົດທ່າແຮງບົ່ມຊ້ອນທາງດ້ານເສດຖະກິດຂອງປະເທດເຮົາ, ຢູ່ໃນແຜນພັດທະນາໄດ້ກໍານົດທ່າແຮງບົ່ມຊ້ອນນັ້ນ, ໄດ້ເອົາຂະແໜງຂຸດຄົ້ນ ແລະ ປຸງແຕ່ງແຮ່ທາດເປັນຂະແໜງເສດຖະກິດປາຍແຫຼມອັນດັບ3 ແຕ່ຢາກສະເໜີໃຫ້ຄົ້ນຄ້ວາຕື່ມ, ຖ້າກໍານົດການຂຸດຄົ້ນແຮ່ທາດ, ປຸງແຕ່ງແຮ່ທາດຢູ່ໃນອັນດັບທີ 3ຈະເຮັດໃຫ້ບໍ່ມີຄວາມຍືນຍົງ. ການຂຸດຄົ້ນແຮ່ທາດຂຸດແລ້ວໝົດໄປບໍ່ສາມາດເປັນພື້ນຖານໃຫ້ເສດຖະກິດຕໍ່ໄປໃນອະນາຄົດ. ສະນັ້ນ, ພວກເຮົາຄວນກໍານົດກ່ຽວກັບຂະແໜງຜະລິດກະສິກໍາ ແລະ ປຸງແຕ່ງຜະລິດຕະພັນກະສິກໍາເປັນບຸລິມະສິດອັນດັບ1 ເນື່ອງຈາກຂະແໜງດັັ່ງກ່າວຕິດພັນກັບການຜັນຂະຫາຍມະຕິ04 ຂອງກົມການເມືອງສູນກາງພັກ ກ່ຽວກັບເສດຖະກິດເອກະລາດເປັນເຈົ້າຕົນເອງ ແລະຍັງຕິດພັນກັບປາກທ້ອງພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ຖ້າເຮົາເອົາຂະແໜງນີ້ເປັນປາຍແຫຼມພວກເຮົາຈະໄດ້ວາງນະໂຍບາຍພັດທະນາຂະແໜງດັ່ງກ່າວໃຫ້ດີຂຶ້ນ ແລະ ຈະເປັນພື້ນຖານໃຫ້ເສດຖະກິດໃນອະນາຄົດ; ກ່ຽວກັບແຜນວຽກຈຸດສຸມໃນຂະແໜງພະລັງງານໄຟຟ້າ ແລະ ນໍ້າມັນເຊື່ອໄຟທິດທາງທີ່ໄດ້ກໍານົດຢູ່ໃນແຜນພັດທະນາເສດຖະກິດ-ສັງຄົມສະບັບນີ້ ດ້ານພື້ນຖານກໍເຫັນດີແຕ່ຢາກໃຫ້ກໍານົດແຜນວຽກໜຶ່ງທີ່ສໍາຄັນຊຶ່ງ ສສຊ ໄດ້ປະກອບຄໍາເຫັນໃນ 3 ມື້ມານີ້ກ່ຽວກັບບັນຫາແຜນວຽກຄົ້ນຄ້ວາຄືນກ່ຽວກັບໂຄງສ້າງລາຄາໄຟຟ້າໃຫ້ມີຢູ່ໃນແຜນດັ່ງກ່າວນີ້ອີກ. ການຄົ້ນຄວ້າໄລຍະຈໍ້ໆນີ້ກໍເຫັນດີແລ້ວແຕ່ຍັງບໍ່ທັນລະອຽດ. ສະນັ້ນ, ສະເໜີໃຫ້ມີແຜນວຽກດັ່ງກ່າວໃຫ້ຢູ່ໃນແຜນວຽກການພັດທະນາເສດຖະກິດ-ສັງຄົມ 5 ປີ (2026-2030) ໃຫ້ຄົ້ນຄວ້າລະອຽດເນື່ອງຈາກຕິດພັນກັບການດໍາລົງຊີວິດຂອງປະຊາຊົນບັນດາເຜົ່າກໍຄືພະນັກງານ, ທະຫານ, ຕໍາຫຼວດ; ກ່ຽວກັບແຜນພັດທະນາເຂດແຄວ້ນ ໂດຍສະເພາະຢູ່ພາກເໜືອຢູ່ໃນແຜນນີ້ກໍໄດ້ກໍານົດວ່າ:ສໍາຄັນຕ້ອງໄດ້ປັບປຸງທາງແຕ່ພວກເຮົາຍັງບໍ່ທັນໄດ້ລົງເລິກຢ່າງມີຈຸດສຸມຢູ່ໃນແຜນ. ສະນັ້ນ, ສະເໜີໃຫ້ກໍານົດຢ່າງຊັດເຈນເຮົາຊິປັບປຸງເສັ້ນທາງໃດແດ່ຢູ່ໃນພາກເໜືອໄລຍະ 5 ປີນີ້, ຖ້າບໍ່ມີເສັ້ນທາງຍາກທີ່ຈະພັດທະນາເສດຖະກິດ; ໃນມາດຕະການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມສະບັບນີ້ກໍມີຫຼາຍມາດຕະການເຫັນດີເປັນເອກະພາບ ແຕ່ຢາກໃຫ້ເບິ່ງຄືນກໍານົດຕື່ມໄດ້ບໍກ່ຽວກັບມາດຕະການດ້ານການເງິນ ຫຼືມາດຕະການດ້ານງົບປະມານເຖິງແມ່ນວ່າພວກເຮົາຈະມີແຜນວຽກ, ແຜນຄົນກໍຕາມ, ຖ້າບໍ່ມີເງິນເຮັດກໍຈະຍາກ.ພ້ອມນັ້ນ, ຖ້າບໍ່ມີໂຄງການຊ່ວຍເຫຼືອຂອງສາກົນວຽກພວກເຮົາກໍຈະເຮັດບໍ່ໄດ້ຫຼາຍ. ສະນັ້ນ, ຕ້ອງສຸມທຶນຮອນຕື່ມ, ຕ້ອງໄດ້ຄົ້ນຄວ້າສະໜອງງົບປະມານໃຫ້ແຕ່ລະຂະແໜງການດ້ວຍຄວາມຈໍາເປັນແທ້ໆ. ທຸກມື້ນີ້,ວຽກຫຼາຍແຕ່ເງິນໜ້ອຍການເຮັດວຽກດ້ວຍຄວາມຫຍຸ້ງຍາກ.
(ຂ່າວ: ວັນເພັງ, ພາບ: ສັງຄົມໄຊ)
ຄໍາເຫັນ