 |
ການປະກອບຄໍາເຫັນຂອງ ສສຊ ໃນວາລະດັ່ງກ່າວນີ້, ສສຊ ຫຼາຍທ່ານ ຕາງກໍໄດ້ລົງເລິກໃນຫຼາຍບັນຫາ ໂດຍສະເພາະບັນຫາເຄັ່ງຮ້ອນທີ່ກະທົບຕໍ່ຊີວິດການເປັນຢູ່ຂອງປະຊາຊົນ ລວມເຖິງພະນັກງານ, ທະຫານ, ຕໍາຫຼວດ ແລະ ບັນດາທຸລະກິດຕ່າງໆ ນັ້ນກໍຄືບັນຫາລາຄາໄຟຟ້າ ທີ່ເພີ່ມຂຶ້ນໃນທຸກເດືອນ ຊຶ່ງໃນນີ້ມີ ທ່ານ ໄຊຍະເດດຜຸຍຍະວົງ ສສຊ ປະຈຳເຂດເລືອກຕັ້ງ13 ແຂວງສະຫວັນນະເຂດ ໄດ້ປະກອບຄໍາເຫັນ ໂດຍເນັ້ນໃສ່ການປະຕິຮູບລັດວິສາຫະກິດ ຊຶ່ງຕິດພັນກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນບັນຫານີ້ກຳລັງສົ່ງຜົນກະທົບຕໍ່ຊີວິດສັງຄົມຂອງປວງຊົນລາວທັງຊາດ; ທ່ານ ໄຊຍະເດດຜຸຍຍະວົງໄດ້ກ່າວວ່າ:ຕໍ່ກັບບັນຫາທີ່ຕິດພັນກັບການປະຕິຮູບລັດວິສາຫະກິດສະເໜີໃຫ້ເລີ່ມຈາກມາດຕະການຮັດສາຍແອວພາຍໃນບໍລິສັດເສຍກ່ອນ, ການປະຕິບັດລະບອບອຸດໜູນນະໂຍບາຍຕ່າງໆພາຍໃນຄວນໃຫ້ສົມເຫດສົມຜົນໃນສະພາບທີ່ວິສາຫະກິດຍັງຂາດທຶນບໍ່ໃຫ້ແຕກໂຕນກັບພະນັກງານລັດເກີນໄປ. ສຳລັບລັດວິສາຫະກິດໄຟຟ້າລາວຄວນໃຫ້ເບິ່ງຄືນພາກລາຍຈ່າຍອັນໃດພໍຕັດຮອນລົງໄດ້ກໍຄວນຕັດລົງເພື່ອຫຼີກລ້ຽງຄວາມແບກຫາບຂອງສັງຄົມກ່ຽວກັບການຂຶ້ນລາຄາກະແສໄຟຟ້າກໍຄວນພິຈາລະນາຄືນເນື່ອງຈາກສົ່ງກະທົບຕໍ່ຊີວິດການເປັນຢູ່ຂອງປະຊາຊົນແລ້ວຍັງສົ່ງຜົນກະທົບຕໍ່ພາກທຸລະກິດເປັນຕົ້ນເພີ່ມຕົ້ນທຶນການຜະລິດສົ່ງຜົນໃຫ້ລາຄາສິນຄ້າຜະລິດພາຍໃນຈະຖີບຕົວຂຶ້ນສູງໂດຍສະເພາະຫົວໜ່ວຍທຸລະກິດທີ່ບໍ່ສາມາດຄົງຕົວຢູ່ໄດ້ກໍຈະສົ່ງຜົນຕໍ່ຖານລາຍຮັບງົບປະມານ.
 |
ໃນວາລະດຽວກັນ, ທ່ານ ນາງ ມີນາພອນໄຊສົມພູສສຊປະຈຳເຂດເລືອກຕັ້ງ 17ແຂວງອັດຕະປື ກໍໄດ້ປະກອບຄໍາເຫັນວ່າ: ເຖິິງອັດຕາເງິນເຟີ້ສະເລ່ຍ 5ເດືອນຕົ້ນປີຢູ່ໃນລະດັບ11.76% ກໍຕາມແຕ່ລາຄາສິນຄ້າຍັງສືບຕໍ່ເພີ່ມຂຶ້ນ, ຜົນຜະລິດຂອງປະຊາຊົນຫຼຸດລົງ, ຄ່າໄຟຟ້າຍັງສືບຕໍ່ສູງຂຶ້ນ ຊຶ່ງສົ່ງຜົນກະທົບຕໍ່ຊິວິດການເປັນຢູ່ຂອງພໍ່ແມ່ປະຊາຊົນ;ສະເໜີໃຫ້ລັດຖະບານເລັ່ງແກ້ໄຂບັນຫາດັ່ງກ່າວຢ່າງຮີບດ່ວນເນື່ອງຈາກບັນຫາດັ່ງກ່າວແມ່ນຕິດພັນກັບການດຳລົງຂອງປະຊາຊົນແທ້ໆ.
ການສະເໜີໃຫ້ແກ້ໄຂບັນຫາລາຄາໄຟຟ້າທີ່ເພີ່ມສູງຂຶ້ນ ໄດ້ມີສສຊ ຫຼາຍທ່ານ ທີ່ໄດ້ສະເໜີຊຶ່ງໄດ້ເລີ່ມຕົ້ນໃນການປະກອບຄໍາເຫັນຂອງ ສສຊ ໃນວັນທີ 9 ມິຖຸນາຜ່ານມານີ້ ຊຶ່ງໃນນີ້ ກໍມີ ທ່ານ ມາຍຟອງ ມາຍຊາຍ ສສຊ ເຂດເລືອກຕັ້ງ 12 ແຂວງຄໍາມ່ວນ, ຊຶ່ງທ່ານ ໄດ້ກ່າວວ່າ: ເຖິງວ່າອັດຕາການເຕີບໂຕດ້ານເສດຖະກິດໃນໄຕມາດທີ1 ຂອງປີ2025ແມ່ນສູງເຖິງ4.5%ແລະອັດຕາເງິນເຟີ້ຫຼຸດລົງເລື້ອຍໆຈາກ24.77%ໃນໄລຍະດຽວກັນຂອງປີ2024 ລົງເປັນ11,1%ໃນປີ2025,ແຕ່ປະກົດວ່າຊີວິດການເປັນຢູ່ຂອງພະນັກງານ-ລັດຖະກອນ, ທະຫານ-ຕໍາຫຼວດ, ປະຊາຊົນບັນດາເຜົ່າຍັງຫຍຸ້ງຍາກຝືດເຄືອງ, ລາຄາສິນຄ້າທຸກຢ່າງນັບມື້ແພງຂຶ້ນເລື້ອຍໆລວມທັງຄ່າໄຟຟ້າກໍແພງຂຶ້ນບໍ່ສົມຄູ່ກັບລາຍຮັບແລະລາຄາໄຟຟ້າຍັງມີທ່າອ່ຽງວ່າຈະເພີ່ມຂຶ້ນໄປເລື້ອຍໆໃນແຕ່ລະເດືອນ. ສະນັ້ນ, ສະເໜີໃຫ້ລັດຖະບານພິຈາລະນາເບິ່ງວ່າເປັນຫຍັງຈຶ່ງເປັນແນວນີ້ (ເສດຖະກິດມີການເຕີບໂຕ, ໄພເງີນເຟີ້ຫຼຸດລົງແຕ່ປະຊາຊົນຍັງພົບກັບຄວາມຫຍຸ້ງຍາກດ້ານການດຳລົງຊີວິດອັນເນື່ອງມາຈາກລາຄາສິນຄ້າແລະຄ່າໄຟທີ່ແພງຂຶ້ນເລື້ອຍໆ).ສຳລັບແຜນປະຕິຮູບລັດວິສະຫະກິດຂອງລັດຖະບານທີ່ກຳລັງສຸມໃສ່ປັບປຸງ4ລັດວິສະຫະກິດໃຫຍ່ເປັນຕົ້ນລັດວິສະຫະກິດໄຟຟ້າລາວ, ການບິນລາວ, ນໍ້າມັນເຊື້ອໄຟລາວແລະທະນະຄານນະໂຍບາຍສະເໜີໃຫ້ລັດຖະບານປະເມີນແລະສະຫຼຸບເປັນລາຍລັກອັກສອນເບິ່ງວ່າຜົນຂອງການປະຕິຮູບລັດວິສະຫະກິດໄຟຟ້າລາວທີ່ເລີ່ມຕົ້ນມາແຕ່ປີ2022 ເປັນຕົ້ນມານັ້ນມີຜົນສໍາເລັດຄືແນວໃດ?ໄດ້ຊ່ວຍປະຢັດລາຍຈ່າຍແລະສ້າງລາຍຮັບທີ່ສາມາດປະກອບສ່ວນເຂົ້າໃນການພັດທະນາເສດຖະກິດຂອງປະເທດຫຼາຍປານໃດ?.
(ຂ່າວ: ສຸກສະຫວັນ)
ຄໍາເຫັນ