ສສຊ ສະເໜີ ລັດຖະບານວາງມາດຕະການເຂັ້ມງວດຕໍ່ການບໍລິການດ່ານທ່າບົກ 

ບັນດາສະມາຊິສະພາແຫ່ງຊາດ(ສສຊ) ຈາກເຂດເລືອກຕັ້ງຕ່າງໆ ໄດ້ສຸມໃສ່ປະກອບຄຳເຫັນກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມທຸກຍາກດ້ານເສດຖະກິດ-ການເງິນ ໄລຍະ 3 ປີຜ່ານມາ ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ໃນວັນທີ 3 ພະຈິກນີ້, ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານ ສັນຍາ ປະເສີດ ສສຊ ເຂດເລກຕັ້ງທີ 13 ແຂວງສະຫວັນນະເຂດ ມີບາງຄຳເຫັນວ່າ: ກ່ອນອື່ນສະແດງຄວາມຊົມເຊີຍຕໍ່ລັດຖະບານທີ່ສາມາດປະຕິບັດໄດ້ຕໍ່ວຽກງານດັ່ງກ່າວໃນຕະຫຼອດໄລຍະຜ່ານມາ ແຕ່ມີຄຳເຫັນຕື່ມໂດຍສະເພາະທ່າແຮງການໃນການເຊື່ອມຈອດ-ເຊື່ອມໂຍງ ຍັງຂັດກັນຢູ່ໂດຍສະເພາະດຳລັດວ່າດ້ວຍດ່ານຊາຍແດນ ແລະ ສະໜາມບິນ, ທາງທ່າບົກ ແລະ ກົດໝາຍພາສີ ຈະອຳນວຍຄວາມສະດວກແນວໃດໃຫ້ສິນຄ້າສົ່ງອອກຜ່ານດ່ານດັ່ງກ່າວມີຄວາມສະດວກ. ສະເໜີໃຫ້ລັດຖະບານວາງມາດຕະະການ, ມາດຕະຖານການການບໍລິການຕ່າງໆເຂັ້ມງວດ ເພື່ອເຮັດແນວໃດໃຫ້ດ່ານທ່າບົກດີຂຶ້ນ ພ້ອມໃຫ້ຮີບຮ້ອນປັບປຸງບັນດາເອກະສານ, ນິຕິກຳທີ່ຂັດຕໍ່ກັບການບໍລິການຕ່າງໆ. ໃນນັ້ນ, ເລື່ອງສິນເຊື່ອໂດຍສະເພາະແຂວງສະຫວັນນະເຂດ ຍັງເຫັນຫຼາຍວິສາຫະກິດຂະໜາດນ້ອຍ, ຂະໜາດກາງ, ຕ້ອງການແຫຼ່ງເພື່ອເຂົ້າສູ່ສິນເຊື່ອ. ພ້ອມນັ້ນ, ຢາກຮູ້ວ່າຜູ້ທີ່ປ່ອຍເງິນກູ້ໃຫ້ແກ່ທຸລະກິດຂະໜາດນ້ອຍຂະໜາດກາງຢູ່ໃນແຕ່ລະແຂວງມີຫຼາຍປານໃດແມ່ນບໍລິສັດໃດມີຈຳນວນເທົ່າໃດເພື່ອຈະໄດ້ລົງຕິດຕາມກວດກາການຜະລິດນັ້ນມີແທ້ບໍ, ມີປະສິດທິຜົນຄືແນວໃດ. ສະນັ້ນ, ຈະມີວິທີທາງແນວໃດໃຫ້ວິສາຫະກິດດັ່ງກ່າວໃຫ້ສາມາດເຂົ້າເຖິງເງິນໃຫ້ໄດ້ໃຫ້ລັດຖະບານພິຈາລະນາຕື່ມ. ຄຽງຄູ່ກັນນັ້ນ ສປປ ລາວ ຍັງມີຫຼາຍເຂື່ອນໄຟຟ້ານຳສົ່ງຂາຍອອກໄປຕ່າງປະເທດແຕ່ເງິນຢູ່ຕ່າງປະເທດຫຼາຍ ຄວນໃຫ້ມາຊໍາລະສະສາງຢູ່ພາຍໃນປະເທດ, ຖ້າຫາກໄດ້ເງິນຈາກຕ່າງປະເທດໃນການຂາຍໄຟຟ້ານີ້ ເຊື່ອແນວ່າພວກເຮົາຈະບໍ່ຂາດແຫຼ່ງງົບປະມານການເງິນ, ເງິນຕາຕ່າງປະເທດ ເພື່ອນຳມາຊຳລະສະສາງຕ່າງໆ ແລະ ຂໍໃຫ້ຊໍາລະຜ່ານລະບົບທະນາຄານ. ໃນນັ້ນ, ລັດຖະບານຄວນເຂັ້ມງວດກວດກາສິນຄ້າກ່ອນຈະສົ່ງອອກ ໂດຍໃຫ້ມີການຊໍາລະເງິນກ່ອນ ຈຶ່ງອານຸຍາດໃຫ້ນຳສິນຄ້າສົ່ງອອກໄປຕ່າງປະເທດ. 
(ຂ່າວ-ພາບ: ວັນເພັງ)