ທ່ານຄໍາສິງ ໄຊສົມແພງ ສສຊ ປະຈໍາເຂດເລືອກຕັ້ງທີ 14 ແຂວງສາລະວັນ ມີຄໍາເຫັນວ່າ: ກ່ອນອື່ນເຫັນດີເປັນເອກະພາບບົດລາຍງານຂອງລັດຖະບານ ຊຶ່ງໄດ້ຕີລາຄາໃຫ້ເຫັນເຖິງຄວາມເອົາໃຈໃສ່ໃນການຈັດຕັ້ງປະຕິບັດສິດໜ້າທີ່ຂອງຕົນ ໂດຍສະເພາະບັນຫາດ້ານເສດຖະກິດ, ແຜນງົບປະມານການ, ລົງທຶນຕ່າງໆເຫັນວ່າມີການພັດທະນາຫຼາຍຂຶ້ນ. ແຕ່ຂໍມີຄໍາເຫັນບາງບັນຫາໃນການຂຶ້ນແຜນງົບປະມານ, ການວາງຖານລາຍຮັບ ມາເບິ່ງຕາມກົດໝາຍວ່າດ້ວຍງົບປະມານ ໂດຍສະເພາະແຫຼ່ງລາຍຮັບງົບປະມານ ແມ່ນມາຈາກ 4 ແຫຼ່ງຄື: ພາສີ-ອາກອນ, ບໍ່ແມ່ນພາສີ-ອາກອນ, ການຊ່ວຍເຫຼືອ, ການຊ່ວຍເຫຼືອຈາກສັງຄົມ. ແຕ່ຢາກເນັ້ນ 2 ບັນຫາຄື: ພາສີ-ອາກອນ ແລະ ບໍ່ມີພາສີ-ອາກອນ ເພາະພາສີ-ອາກອນມີ: ອາກອນກໍາໄລ, ລາຍໄດ້ມອບເໝົາ ແລະ ບໍ່ແມ່ນພາສີ-ອາກອນ: ຄ່າເຊົ່າ-ສໍາປະທານ, ຄ່າປັນຜົນ,ເງິນກູ້, ຄ່າປັບໄໝ ແລະ ການຂາຍຊັບສິນທີ່ສັ່ງຢຶດເປັນຂອງລັດ. ຜ່ານມາລັດຖະບານໄດ້ເອົາແຫຼ່ງລາຍຮັບດັ່ງກ່າວມາເຂົ້າເປັນຖານຂໍ້ມູນລາຍຮັບແລ້ວບໍ. ບັນຫານີ້ຄວນກວດກາເບິ່ງຄືນຊຶ່ງລັດຖະບານຄວນໄດ້ເອົາໃຈໃສ່ແທ້ໆ ຖ້າເຮົາສະຫຼຸບຕີລາຄາຖານລາຍຮັບທີ່ມີຕົວຈິງ, ຂ້າພະເຈົ້າຄິດວ່າອາດຍາກຈະໄດ້ລາຍຮັບງົບປະມານເກີນແຜນ ເພາະຜ່ານການລາຍງານຂອງອົງການກວດສອບແຫ່ງລັດ, ກວດກາລັດແຫ່ງລັດ ໃນກອງປະຊຸມຜ່ານມາ ກໍເຫັນວ່າຍັງມີຂໍ້ຫຍຸ້ງຍາກໃນການເກັບພາສີ-ອາກອນຍາກຂຶ້ນ,ບາງບໍລິສັດບໍ່ໃຫ້ການຮ່ວມມື, ບາງບ່ອນເກັບບໍ່ໄດ້ເຕັມເມັດເຕັມໜ່ວຍ ເຮັດແນວໃດຈະໄດ້ຮັບງົບປະມານເກີນແຜນ. ສະນັ້ນ, ຕ້ອງສັງລວມເກັບກໍາຂໍ້ມູນຖານລາຍຮັບໃຫ້ຄົບຖ້ວນ. ທ່ານຍັງສະເໜີໃຫ້ລັດຖະບານໃຫ້ເບິ່ງຄືນການອອກໃບຕາດິນ ໃຫ້ບຸກຄົນ ຫຼື ນິຕິບຸກຄົນຕື່ມ ໃຫ້ມີການສັງລວມລະອຽດຄັກແນ່ ເພື່ອໃຫ້ປະຊາຊົນສາມາດນໍາໃຊ້ທີ່ດິນຢ່າງຖືກຕ້ອງຕາມກົດໝາຍ.
ຂ່າວ: ວັນເພັງ
ຄໍາເຫັນ