ສສ​ຊ ສະເໜີຫຼາຍບັນຫາໃຫ້ລັດຖະບານແກ້ໄຂ

ທ່ານ ສຸວັນນີ ໄຊຊະນະ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 7 ແຂວງ ບໍລິຄຳໄຊໄດ້ກ່າວວ່າ: ການເຕີບໂຕທາງດ້ານເສດຖະກິດໃນໄລຍະ 5 ປີຜ່ານນັ້ນເກີດຄວາມບໍ່ສົມດຸນສອງຢ່າງຄື:ບໍ່ສົມດຸນການພັດທະນາເສດຖະກິດກັບຜົນກະທົບຕໍ່ສິ່ງແວດລ້ອມ ແລະ ການພັດທະນາເສດຖະກິດກັບການພັດທະນາວັດທະນາທຳສັງຄົມບໍ່ໄປສົມຄູ່ກັນ, ສະນັ້ນການພັດທະນາ 5 ປີ ຕໍ່ໜ້ານີ້ຄວນໄດ້ສ້າງຄວາມເຂັ້ມແຂງໃຫ້ເສດຖະກິດຮາກຖານຢ່າງແຂງແຮງ ແລະ ສະເໜີວ່າການຈັດບູລິມະສິດອັນດັບໜຶ່ງຈະປ່ຽນແທນໃຫ້ຂະແໜງການອື່ນຄວນຈະແມ່ນຂົງເຂດກະສິກຳ ແລະ ອຸດສາກະກຳປຸງແຕ່ງ ເຮົາຈຶ່ຶງຈະສາມາດມີພູມຕ້ານທານໃນກໍລະນີສະພາບແວດລ້ອມທາງນອກມີຜົນກະທົບ,ຊຶ່ງຜ່ານມາພວກເຮົາກໍມີບົດຮຽນມາແລ້ວ ໃນປີ 1997 ວິກິດເສດຖະກິດການເງິນ ແລະ ປີ 2022-2023 ອັດຕາເງິນເຟີ້ເພີ່ມຂຶ້ນຮອດ 40% ເນື່ອງວ່າເສດຖະກິດພວກເຮົາບອບບາງ, SME ກວມ 90%, ເມື່ອທຽບໃສ່ການສົ່ງອອກສິນຄ້າກະສິກຳກັບແຮ່ທາດ, ການສົ່ງອອກແຮ່ທາດມູນຄ່າຫຼາຍກວ່າແລະໃນ3-4ປີຜ່ານມາ ເພີ່ມຂຶ້ນສອງເທົ່າ,ແຕ່ການສົ່ງອອກຜະລິດຕະພັນກະສິກຳບັນລຸປະມານ 1,500 ລ້ານໂດລາ ເຫັນວ່າຍັງຕໍ່າ,ສະນັ້ນແນວທາງເສດຖະກິດເອກກະລາດເປັນເຈົ້າຕົນເອງແມ່ນເພິ່ງພາຊັບພະຍາກອນ ແລະ ເພິ່ງພາຮາກຖານເສດຖະກິດນີ້ເປັນຫຼັກ,ຕໍ່ບັນຫານີ້ ຈຶ່ງຢາກສະເໜີ ໃຫ້ລັດຖະບານພິຈາລະນາຢ່າງແຂງແຮງເພື່ອຊ່ວຍໜູນແຫຼ່ງທຶນໃນການຊຸກຍູ້ໃຫ້ບັນດາ SME ໄດ້ເຂົ້າເຖິງຕາມດຳລັດ 93/ນຍ ຊຶ່ງປັດຈຸບັນມີ ປະມານ 600 ຕື້ກີບເທົ່ານັ້ນ ແລະ ມີເທົ່າໃດຫົວໜ່ວຍທີ່ເຂົ້າເຖິງແຫຼ່ງທຶນ, ສະນັ້ນ ຈຶ່ງຢາກໃຫ້ເພີ່ມຂຶ້ນ 10 ພັນຕື້ ເພື່ອຕອບສະໜອງໃຫ້ພາກທຸລະກິດຮາກຖານເຫຼົ່ານີ້ໄດ້ເຂົ້າເຖິງແຫຼ່ງທຶນຕ່າງໆ, ອັນທີສອງ ສະເໜີໃຫ້ລັດຖະບານພິຈາລະນາຄືນບັນຫາຂໍ້ຄົງຄ້າງກຽ່ວກັບການສ້າງສະພາບແວ້ດລ້ອມການດຳເນີນທຸລະກິດ ຕໍ່ບັນຫານີ້ແມ່ນຢາກໃຫ້ເອົາຫົວຂໍ້ດັ່ງກ່າວມາລາຍງາສະເພາະ ແລະ ເພື່ອໃຫ້ຮູ້ວ່າການແກ້ໄຂຫົວຂໍ້ນີ້ ແຕ່ລະປີໄດ້ແກ້ໄຂຈັກຂໍ້ແລ້ວ ແລະ ຈະຕໍ່ສືບແກ້ໄຂແແນວໃດຕື່ມ.

ທ່ານ ແດງ ປະທຸມທອງ ສະມາຊິກສະພາແຫ່ງຊາດ ປະຈຳເຂດເລືອກຕັ້ງ 18 ແຂວງ ໄຊສົມບູນ ໄດ້ກ່າວວ່າ: ໃນໄລຍະຜ່ານມາ, ການລົງທຶນ ແລະ ການຄຸ້ມຄອງການລົງທຶນຍັງບໍ່ທັນເຮັດໄດ້ດີເທົ່າທີ່ຄວນຊຶ່ງບັນຫານີ້ ເປັນບັນຫາທີ່ສຳຄັນ ເພາະວ່າການລົງທຶນ ຂອງລັດຜ່ານມາກໍມີບັນຫາ ນັບແຕ່ການຈັດຊື້-ຈັດຈ້າງ,ການປະເມີນ ແລະ ອື່ນໆ ແມ່ນມີຄວາມຫຍຸ້ງຍາກ, ຜ່ານມາກໍມີການຄ້າງຄາຫຼາຍໂຄງການ,ໃນຂະນະດຽວກັນການລົງທຶນຂອງພາກເອກກະຊົນກໍເຊັ່ນກັນ ມີຫຼາຍໂຄງການບໍ່ປະຕິບັດຕາມລະບຽບການ ເຮັດໃຫ້ເກີດມີຫາງສຽງຈົ່ມວ່າຈາກສັງຄົມ,ສ່ວນການລົງທຶນຈາກເງິນຊ່ວຍເຫຼືອລ້າ ກໍເປັນບັນຫາສຳຄັນ,ທັງໆທີ່ພວກເຮົາຂາດແຄນທຶນເພື່ອມາພັດທະນາ,ແຕ່ໃນເວລາມີໂອກາດໄດ້ຮັບທຶນຊ່ວຍເຫຼືອລ້າພວກເຮົາຊ້ຳພັດເຮັດບໍ່ໄດ້ດີເທົ່າທີ່ຄວນ,ສະນັ້ນຕໍ່ບັນຫານີ້ ສະເໜີໃຫ້ລັດຖະບານເບິ່ງຄືນແລະພິຈາລະນາຢ່າງລະອຽດຕື່ມ ແລະ ໃຫ້ຈັດສັນໃຫ້ດີຂຶ້ນຕື່ມ.

ໃນຂະນະທີ່ ການລົງທຶນໂຄງການແຮ່ທາດ, ຕໍ່ວຽກງານນີ້ລັດຖະບານໄດ້ມີຄຳສັ່ງໄປແລ້ວ ແລະ ໄດ້ມີການປະເມີນປະເພດໂຄງການ ດີ,ກາງ,ອອ່ນ ແລະ ອອ່ນຫຼາຍ ແຕ່ພາຍຫຼັງໄດ້ປະເມີນໄປແລ້ວ ໂດຍສະເພາະໂຄງການທີ່ເຮັດບໍ່ໄດ້ດີຍັງບໍ່ໃຫ້ຢຸດເຊົາ, ຕໍ່ກໍລະນີ້ແມ່ນເປັນບັນຫາທີ່ແກ່ຍາວ,ສະນັ້ນສະເໜີໃຫ້ລັດຖະບານເບິ່ງຄືນເຊັ່ນດຽວກັນ.

(ຂ່າວ:ສຳນານ,ພາບ:ບຸນຕອມ)