ໃນວາລະ, ທ່ານ ຄໍາແພງ ວິລະພັນ ປະທານກໍາມາທິການກົດໝາຍ ລາຍງານຜົນການຄົ້ນຄວ້າໜັງສືສະເໜີ ຂອງລັດຖະບານ ກ່ຽວກັບ ສະເໜີຂໍການພິຈາລະນາ ອະນຸມັດໃຫ້ສະພາປະຊາຊົນຂັ້ນແຂວງພິຈາລະນາຮັບຮອງ ແລະ ອະນຸມັດໂຄງການລົງທຶນຂອງລັດ ທີ່ມີມູນຄ່າ 50ຕື້ກີບລົງມາ.ບົດລາຍງານ ເລື່ອງການສະເໜີປັບປຸງມາດຕາ ຂອງກົດໝາຍວ່າດ້ວຍການລົງທຶນຂອງລັດ ສະບັບເລກທີ 72/ສພຊ, ລົງວັນທີ 15ທັນວາ 2015, ອີງຕາມການສະເໜີຂອງນາຍົກລັດຖະມົນຕີ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ຄັ້ງວັນທີ 28 ພະຈິກ 2024 ແລະ ການຄົ້ນຄວ້າ, ປະກອບຄໍາເຫັນຂອງບັນດາທ່ານສະມາຊິກສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ກຳມາທິການກົດໝາຍ ຂໍມີທັດສະນະທາງດ້ານກົດໝາຍວ່າ ການທີ່ລັດຖະບານສະເໜີໃຫ້ປັບປຸງ ມາດຕາ 38 ແລະ 39 ຂອງກົດໝາຍວ່າດ້ວຍການລົງທຶນຂອງລັດ ເພື່ອຍົກບົດບາດໃນການພິຈາລະນາຮັບຮອງໂຄງການລົງທຶນຂອງລັດ ໃຫ້ແກ່ສະພາປະຊາຊົນຂັ້ນແຂວງ ຂຶ້ນຕື່ມ ເພື່ອໃຫ້ສອດຄ່ອງ ກັບສະພາບການຂະຫຍາຍຕົວ ຂອງເສດຖະກິດ-ສັງຄົມໃນປັດຈຸບັນນັ້ນ ເຫັນວ່າມີຄວາມສົມເຫດສົມຜົນ ແຕ່ຜ່ານການຄົ້ນຄວ້າຂອງກຳມາທິການກົດໝາຍ ເຫັນວ່າຄວນປັບປຸງແຕ່ມາດຕາ 18 ຂອງກົດໝາຍວ່າດ້ວຍການລົງທຶນຂອງລັດ ໂດຍຍົກລະດັບມູນຄ່າການລົງທຶນ ປະເພດທີ V ຈາກ 20,000,000 ເປັນ 50,000,000 ກີບ, ສ່ວນມາດຕາ 38 ແລະ 39 ທີ່ລັດຖະບານ ມິຄໍາເຫັນໃນກອງປປະຊຸມສະໄໝສາມັນ ເທື່ອທີ 8 ນັ້ນ ບໍ່ປັບປຸງກໍໄດ້ ເນື່ອງຈາກວ່າ 2 ມາດຕາດັ່ງກ່າວ ແມ່ນສະໜັບສະໜູນໃຫ້ແກ່ມາດຕາ 18.
ຕາມຫຼັກການແລ້ວ ຖ້າກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ຮັບຮອງເອົາຕາມການສະເໜີຂອງລັດຖະບານ ແລະ ການຄົ້ນຄວ້າຂອງກຳມາທິການທີ່ກ່ຽວຂ້ອງ ຂອງສະພາແຫ່ງຊາດແລ້ວ ລັດຖະບານຕ້ອງເປັນເຈົ້າການຊີ້ນໍາກະຊວງທີ່ກ່ຽວຂ້ອງ ດໍາເນີນການຄົ້ນຄວ້າປັບປຸງເນື້ອໃນຂອງມາດຕາ 18 ຂອງກົດໝາຍວ່າດ້ວຍການລົງທຶນຂອງລັດ ແລ້ວສະເໜີຫາຄະນະປະຈຳສະພາແຫ່ງຊາດ ເພື່ອພິຈາລະນາ ນໍາເຂົ້າກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX.
ຈາກນັ້ນ, ທ່ານ ນາງ ອໍາໄພວອນ ລ້ອມບຸນແພງ ກໍາມະການສໍາຮອງສູນກາງພັກ ຄະນະປະຈໍາສະພາແຫ່ງຊາດ, ລາຍງານການປັບປຸງຮ່າງມະຕິສະພາແຫ່ງຊາດ 2 ສະບັບ ຄື: 1. ມະຕິວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2024 ແລະ ແຜນການ ປະຈຳປີ 2025; ແຜນການລົງທຶນຂອງລັດ ປະຈຳປີ 2025; 2. ມະຕິ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບ ການຈັດຕັ້ງປະຕິບັດແຜນງົບປະມານແຫ່ງລັດ, ແຜນເງິນຕາ ປະຈຳປີ 2024 ແລະ ແຜນການ ປະຈຳປີ 2025; ແຜນຈັດສັນງົບປະມານແຫ່ງລັດ ໃຫ້ກະຊວງ, ອົງການຂັ້ນສູນກາງ ແລະ ບັນດາແຂວງ ປະຈໍາປີ 2025. ຈາກນັ້ນ, ບັນດາທ່ານຜູ້ຕາງໜ້າກອງເລຂານຸການກອງປະຊຸມ ໄດ້ຜັດປ່ຽນກັນຂຶ້ນລາຍງານປັບປຸງຮ່າງມະຕິສະພາແຫ່ງຊາດ9 ສະບັບ ຄື:
-ລາຍງານການປັບປຸງຮ່າງມະຕິສະພາແຫ່ງຊາດ ວ່າດ້ວຍການຮັບຮອງເອົາບົດລາຍ ງານຂອງລັດຖະບານ ກ່ຽວກັບການຈັດຕັ້ງປະຕິບັດວຽກງານສາມສ້າງ ຕາມມະຕິ ສະພາແຫ່ງຊາດ ສະບັບເລກທີ 02/ສພຊ, ລົງວັນທີ 28 ມັງກອນ 2016.
-ລາຍງານການປັບປຸງຮ່າງມະຕິສະພາແຫ່ງຊາດ ວ່າດ້ວຍການຮັບຮອງເອົາ ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດຍຸດທະສາດ ການປະຕິຮູບລະບົບການສຶກສາ, ການພັດທະນາຊັບພະຍາກອນມະນຸດແຫ່ງຊາດ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ.
-ລາຍງານການປັບປຸງຮ່າງມະຕິສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການປະເມີນຜົນການຈັດຕັ້ງປະຕິບັດກົດໝາຍຂົງເຂດວັດທະນະທຳ-ສັງຄົມ 4 ສະບັບ.
-ລາຍງານການປັບປຸງຮ່າງມະຕິສະພາແຫ່ງຊາດ ວ່າດ້ວຍການຮັບຮອງເອົາບົດ ລາຍງານຂອງລັດຖະບານ ກ່ຽວກັບຮ່າງວິໄສທັດ ຮອດປີ 2040, ແຜນຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2030.
-ລາຍງານການປັບປຸງຮ່າງມະຕິສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງອົງການກວດກາແຫ່ງລັດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະ ແຜນການປະຈຳປີ 2025; ບົດລາຍງານຜົນການກວດກາ ຕາມຜົນການກວດສອບ ປີ 2022.
-ລາຍງານການປັບປຸງຮ່າງມະຕິສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງອົງການກວດສອບແຫ່ງລັດກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະແຜນການປະຈຳປີ 2025; ບົດສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດ ປະຈຳປີ 2023.
-ລາຍງານການປັບປຸງຮ່າງມະຕິສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງສານປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວ ວຽກງານປະຈຳປີ 2024 ແລະ ແຜນການ ປະຈຳປີ 2025.
-ລາຍງານການປັບປຸງຮາງມະຕິສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະແຜນການປະຈຳປີ 2025.
-ລາຍງານການປັບປຸງຮ່າງມະຕິສະພາແຫ່ງຊາດ ວ່າດ້ວຍການຮັບຮອງບົດລາຍງານ ຂອງສະພາແຫ່ງຊາດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະແຜນການ ປະຈຳປີ 2025.
(ຂ່າວ-ພາບ: ແສງຈັນ, ວັນເພັງ)
ຄໍາເຫັນ