ສສຊປະກອບຄຳເຫັນລົງເລິກບັນຫາເງິນຕາ ແລະ ລາຄາສິນຄ້າ

ບັນດາສະມາຊິກສະພາແຫ່ງຊາດ(ສສຊ)ໄດ້ປະກອບຄຳເຫັນຕໍ່ບົດລາຍງານຂອງລັດຖະບານກ່ຽວກັບແຜນພັດທະນາເສດຖະກິດ-ສັງຄົມ,ແຜນງົບປະມານແຫ່ງລັດ ແລະ ແຜນເງິນຕາ ໃນວັນທີ 1 ພະຈິກ ໂດຍການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ໃນຂະນະການປະກອບຄຳເຫັນຂອງ ສສຊ ເຂດເລືອກຕັ້ງຕ່າງໆ ໄດ້ລົງເລິກການແກ້ໄຂບັນຫາສະພາບການປັ່ນປ່ວນຂອງເງິນຕາຕ່າງປະເທດ,ບັນຫາເງິນກີບອ່ອນຄ່າ ແລະ ລາຄາສິນຄ້າແພງ,ບັນຫາພື້ນຖານໂຄງລ່າງແລະ ອື່ນໆ; ທ່ານ ພອນສານ ວິໄລເມັ້ງ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ໄດ້ສະເໜີກ່ຽວກັບການແກ້ໄຂບັນຫາເງິນເຟິີ້ ຫຼື ທາງດ້ານການເງິນ ຊຶ່ງທີ່ຜ່ານມາສະພາບການແກ້ໄຂບັນຫາເງິນເຟີ້ຕະຫຼອດ 1ປີຜ່ານມາ ພາຍຫຼັັງທີ່ມີການປັບປຸງກົງຈັກຂອງລັດຖະບານ ກໍເຫັນວ່າມີຄວາມຕັ້ງໜ້າເອົາໃຈໃສ່,ໃນນັ້ນກໍຍັງເຫັນວ່າສະພາບການດັ່ງກ່າວຍັງບໍ່ທັນແກ້ໄຂບັນຫາດັ່ງກ່າວລົງໄດ້ເທື່ອ ສະພາບການຜັນຜວນແລກປ່ຽນເງິນຕາຕ່າງປະເທດ,ລາຄາສິນຄ້າແພງ ແລະ ອື່ນໆແມ່ນຍັງຢູ່ໃນສະພາບເດີມ ແລະ ຍັງມີຄວາມເພີ່ມຂຶ້ນ ສະນັ້ນຕໍ່ກັບບັນຫາດັ່ງກ່າວ ຍາກສະເໜີໃຫ້ເອົາໃຈໃສ່ເພີ່ມທະວີການບັງຄັບໃຊ້ກົດໝາຍ,ລະບຽບການຕ່າງໆທີ່ລັດຖະບານໄດ້ວາງອອກແລ້ວນັ້ນໃຫ້ມີຄວາມເຂັມງວດກວ່າເກົ່າ ໂດຍສະເພາະແມ່ນບັນດາກົງຈັກການຈັດຕັ້ງທີ່ເຮັດໜ້າທີ່ໃນການຄຸ້ມຄອງ ການເງິນ,ຄຸ້ມຄອງລາຄາສິນຄ້າ ແມ່ນຢາກໃຫ້ມີການກວດກາເບິ່ງຄືນຄວາມຮັບຜິດຊອບທາງດ້ານການເມືອງ,ຄວາມເອົາໃຈໃສ່ໃນການຈັດຕັ້ງປະຕິບັດໜ້າທີ່ທີ່ໄດ້ຮັບການມອບໝາຍ,ຖ້າຫາກພວກເຮົາບໍ່ເອົາໃຈໃສ່ເຖິງວ່າຈະມີກົດໝາຍ,ມະຕິ,ຄຳສັ່ງດີປານໃດກໍຕາມ ແຕ່ຜູ້ຈັດຕັ້ງປະຕິບັດແມ່ນຊັບພະຍາກອນມະນຸດ ແມ່ນບຸກຄະລາກອນ ແມ່ນພໍ່ຄ້າຊາວຂາຍຂອງພວເຮົາ ຊຶ່ງພວກເຮົາສັງເກດເຫັນຢ່າງຈະແຈ້ງວ່າ ບັນດາສິນຄ້າຕ່າງໆຢູ່ໃນຫ້າງຮ້ານລ້ວນແຕ່ຮຽກຂາຍເປັນເງິນຕາຕ່າງປະເທດ,ສະນັ້ນຕໍ່ບັນຫານີ້ສະເໜີກະຊວງທີ່ກ່ຽວຂ້ອງ,ທະນາຄານ,ກະຊວງອຸດສາຫະກຳ ແລະ ການຄ້້າ ແລະ ພາກສ່ວນກ່ຽວຂ້ອງຕ່າງໆທົບທວນເບິ່ງຄືນວ່າມາດຕະການຂອງພວກເຮົາເຮັດໃດ້ດີຫຼື ບໍ່,ຖ້າບໍ່ໄດ້ດີຕ້ອງໃຫ້ມີຄວາມເຂັ້ມງວດ ແລະ ເພີ່ມທະວີຂຶ້ນຕື່ມ, ໃນນັ້ນບັນດາສິນຄ້າຕ່າງປະເທດທີ່ລົງທຶນຢູ່ໃນລາວກໍເຊັ່ນດຽວກັນກໍຍັງຮຽກເກັບເປັນເງິນຕາຕ່າງປະເທດເຊັ່ນກັນຕໍ່ບັນຫານີ້ກໍໃຫ້ເອົາໃຈໃສ່ເຊັ່ນກັນ;ທ່ານກ່າວຕື່ມວ່າ:ຕໍ່ກັບການຊຸກຍູ້ກະຕຸ້ນການລົງທຶນຊຶ່ງຕໍ່ກັບບັນຫານີ້ປັດຈຸບັນພົບຄວາມຫຍຸ້ງຍາກແມ່ນບໍ່ມີນັກລົງທຶນເຂົ້າມາລົງທຶນຊຶ່ງສາເຫດແມ່ນບັນຫາເລື່ອງເສັ້ນທາງຄົມມະນຄົມບໍ່ອຳນວຍຄວາມສະດວກ ສະນັ້ນຈຶ່ງຢາກໃຫ້ລັດຖະບານ ກໍຄືກະຊວງໂຍທາທິການ ແລະ ຂົນສົ່ງຄວນມີການປະຕິຮູບໃນການສ້າງເສັ້ນທາງ ແລະ ລວມທັງການຄຸ້ມຄອງເລື່ອງນໍ້າໜັກ ຕໍ່ກັບການຄຸ້ມຄອງເລື່ອງນໍ້າໜັກແມ່ນຍາກໃຫ້ເປັນຄວາມຮັບຜິດຊອບຂອງໂຊເຟີລົດຖ້າຫາກລົດຜູ້ໃດມີນໍ້າໜັກເກີນຕ້ອງປັບໃໝໂຊເຟີລົດ ແລະປະຕິບັດຕາມລະບຽບການຕ່າໆ
ທ່ານ ສາຍທອງ ໄຊຍະວົງ ສສຊ ປະຈຳເຂດເລືອຕັ້ງທີ 15 ແຂວງຈຳປາສັກ ສະເໜີລັດຖະບານ ກຳນົດໂຄງສ້າງລາຄາສິນຄ້າ ເປັນຕົ້ນ, ລາຄາເຂົ້າ, ຊີ້ນງົວ, ຄວາຍ, ໝູ, ໄຂ່  ທີ່ສາມາດຜະລິດຢູ່ພາຍໃນປະເທດ ໃຫ້ມີຄວາມຊັດເຈນ, ເໝາະສົມ, ມີລາຄາເປັນເອກະພາບກັນ, ຫຼີກລ່ຽງການນຳເຂົ້າສິນຄ້າ, ອັນໃດທີ່ສາມາດຜະລິດໄດ້ຢູ່ພາຍໃນ ລັດຖະບານຕ້ອງສຸມໃສ່ຊຸກຍູ້ສົ່ງເສີມ, ຄວນມີນະໂຍບາຍເພື່ອເຮັດໃຫ້ການຜະລິດມີຕົ້ນທຶນໜ້ອຍ ລວມເຖິງການເຂົ້າເຖິງແຫຼ່ງທຶນ ໃຫ້ມີຄວາມສະດວກສະບາຍ, ໂດຍສະເພາະຕ້ອງຊຸກຍູ້ສົ່ງເສີມການຜະລິດເປັນສິນຄ້າທົດແທນການນຳເຂົ້າ, ໄປພ້ອມກັບການຜະລິດເພື່ອສົ່ງອອກ.ທ່ານ ກ່າວຕື່ມວ່າ:ຄຽງຄູ່ກັບບັນຫາລາຄາສິນຄ້າ ກໍແມ່ນບັນຫາອັດຕາເງິນເຟິ້, ອັດຕາແລກປ່ຽນ ສະເໜີໃຫ້ລັດຖະບານເລັ່ງແກ້ໄຂ ເພື່ອເຮັດໃຫ້ສະພາບການດັ່ງກ່າວ, ກັບຄືນສູ່ສະພາບປົກກະຕິໂດຍໄວ, ພ້ອມທັງໃຫ້ຄຸ້ມຄອງເງິນຕາຕ່າງປະເທດ ຕິດພັນກັບການນຳເຂົ້າ-ສົ່ງອອກ ສິນຄ້າ ຕ້ອງຜ່ານລະບົບທະນາຄານ ລັດຕ້ອງຊຸກຍູ້ສົ່ງເສີມໃຫ້ມີການຈັດຕັ້ງປະຕິບັດຢ່າງເຂັ້ມງວດ, ບໍລິສັດໃດທີ່ນຳເຂົ້າ-ສົ່ງອອກ ໂດຍບໍ່ຜ່ານລະບົບທະນາຄານ  ຕ້ອງໃສ່ລະບຽບຢ່າງເດັດຂາດ ເພື່ອເຮັດໃຫ້ບັນຫາດັ່ງກ່າວ,ໄດ້ຮັບການຈັດຕັ້ງປະຕິບັດເປັນເອກະພາບກັນໃນທົ່ວປະເທດ. 
(ຂ່າວ-ພາບ:ສຳນານ)