ທ່ານ ຈະເລີນ ເຢຍປາວເຮີ ກ່າວປະກອບຄໍາເຫັນໂດຍໃຫ້ຮູ້ວ່າ: ໃນໄລຍະຜ່ານມາ, ສປສສ ແລະ ອອປສ ໄດ້ປະກອບສ່ວນຢ່າງຕັ້ງໜ້າ ເຂົ້າໃນການຜັນຂະຫຍາຍ ຈັດຕັ້ງປະຕິບັດແນວທາງຂອງພັກ, ລັດຖະທໍາມະນູນ ແລະ ກົດໝາຍຂອງລັດ, ປົກປ້ອງສິດ ແລະ ຜົນປະໂຫຍດຂອງລັດ, ລວມໝູ່, ບຸກຄົນ, ການຈັດຕັ້ງຕ່າງໆ ປະກອບສ່ວນສ້າງລັດປະຊາທິປະໄຕປະຊາຊົນໃຫ້ເຕີບໃຫຍ່ຂະຫຍາຍຕົວ ເປັນລະບົບນັບມື້ນັບຄົບຖ້ວນ ເຮັດໃຫ້ອົງການສິດອໍານາດແຫ່ງລັດ ນັບມື້ນັບແຂງແກ່ນ. ພ້ອມນີ້, ກໍໄດ້ສະເໜີຕໍ່ ສປສສ ແລະ ອອປສ ໂດຍເນັ້ນບັນຫາສຳຄັນ ຄື: ຂໍໃຫ້ກວດກາວ່າ ສານ ແລະ ໄອຍະການ ເວົ້າລວມ, ຜູ້ພິພາກສາ ແລະ ພະນັກງານຂອງສານນັ້ນ ແມ່ນແລ້ວຫຼືບໍ່ ວ່າເປັນອໍານາດຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ ຊຶ່ງຢູ່ບ່ອນນີ້ທັງສອງອົງການ, ສອງຫົວໜ້າ ແມ່ນເອົາໃຈໃສ່ກວດຄືນຕັ້ງແຕ່ຄວາມຮູ້, ຄວາມເຂົ້າໃຈ, ທັດສະນະ, ວິໄສທັດ, ການປະພຶດ, ການປະຕິບັດໜ້າທີ່ ແມ່ນແລ້ວຫຼືບໍ່ເປັນອໍານາດຂອງປະຊາຊົນໂດຍປະຊາຊົນແລະເພື່ອປະຊາຊົນ ຫຼື ມີອັນອື່ນແຊກຊ້ອນເຂົ້າມາ. ອັນນີ້, ກໍຂໍໃຫ້ສອງອົງການນີ້ ກວດກາແທ້ໆ.
ທ່ານຈະເລີນເຢຍປາວເຮີເຫັນວ່າ: ໃນສະພາບການປັດຈຸບັນ, ເນື່ອງຈາກພວກເຮົານໍາໃຊ້ກົນໄກເສດຖະກິດຕະຫຼາດ ເພື່ອພັດທະນາປະເທດ; ສະນັ້ນ, ຂໍ້ຂັດແຍ່ງໃນສັງຄົມ ແມ່ນນັບມື້ນັບເພີ່ມຂຶ້ນ ມັນຮຽກຮ້ອງໃຫ້ຄວາມເດັດຂາດ ແລະ ເດັດດ່ຽວທາງດ້ານກົດໝາຍ ຕ້ອງສູງຂຶ້ນ ຊຶ່ງສະແດງວ່າ ສານ ແລະ ໄອຍະການ ກໍຕ້ອງເຮັດບົດບາດໜັກຂຶ້ນ ນີ້ກໍບໍ່ແມ່ນສະເພາະສອງອົງການນີ້ ແຕ່ລວມທັງໝົດຂະບວນຍຸຕິທໍາ. ສະນັ້ນ, ຈຶ່ງສະເໜີວ່າ ຖ້າທາດແທ້ຂອງອໍານາດລັດ, ຂອງສານ, ໄອຍະການ ບໍ່ຈະແຈ້ງ ບໍ່ໜັກແໜ້ນ ມັນກໍຈະມີຜົນກະທົບ ເຖິງການພິຈາລະນາຕັດສິນ, ປະຕິບັດໜ້າທີ່ການເມືອງຂອງສອງອົງການນີ້. ໃນໄລຍະຜ່ານມາ, ສ່ວນຫຼາຍແມ່ນເຮັດໄດ້ດີແລ້ວ ແຕ່ກໍຍັງມີຫຼາຍປະກົດການ ທີ່ຍັງບໍ່ທັນສ່ອງແສງໃຫ້ເຫັນວ່າ ທາດແທ້ອັນດີເລີດຂອງລະບອບໃໝ່ ຢູ່ນໍາສານ ຢູ່ນໍາໄອຍະການ, ທາດແທ້ຂອງອໍານາດຂອງປະຊາຊົນໂດຍປະຊາຊົນແລະເພື່ອປະຊາຊົນຢູ່ນໍາສານຢູ່ນໍາໄອຍະການ ຍັງບໍ່ທັນພົ້ນເດັ່ນເທື່ອ, ບໍ່ທັນຈະແຈ້ງເທື່ອ.
ພ້ອມນີ້, ທ່ານຈະເລີນເຢຍປາວເຮີກໍໄດ້ສະເໜີໃຫ້ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຄົ້ນຄວ້າມາດຕາ 97 ຂອງລັດຖະທໍາມະນູນປີ 1991, ປີ 2003, ປີ 2015, ປີ 2025 ກໍລ້ວນແຕ່ກໍານົດວ່າ “ຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດແລ້ວນັ້ນ ທຸກອົງການຈັດຕັ້ງພັກ, ອົງການຈັດຕັ້ງລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ອົງການຈັດຕັ້ງສາກົນ ແລະ ພົນລະເມືອງທຸກຄົນຕ້ອງເຄົາລົບ” ຂໍຢໍ້າຄືນ “ຕ້ອງເຄົາລົບ, ຄໍາວ່າເຄົາລົບ ກໍຂໍໃຫ້ຕີຄວາມໝາຍຄືນວ່າມັນແມ່ນແນວໃດ?” ຢູ່ໃນບ່ອນນີ້ຢາກໃຫ້ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຄົ້ນຄວ້າ ຕີຄວາມໃຫ້ຈະແຈ້ງ ແລະ ບຸກຄົນ, ນິຕິບຸກຄົນ, ອົງການຈັດຕັ້ງທີ່ມີສ່ວນກ່ຽວຂ້ອງ ຕ້ອງປະຕິບັດຢ່າງເຂັ້ມງວດ. ປັດຈຸບັນ, ຍັງປະຕິບັດມາດຕາ 97 ຂອງລັດຖະທໍາມະນູນ ບໍ່ໄດ້; ຄໍາຕັດສິນທີ່ໃຊ້ໄດ້ຢ່າງເດັດຂາດ ທີ່ມີຢູ່ໃນອົງການປະຕິບັດຄໍາຕັດສິນ ທີ່ມີຢູ່ໃນກະຊວງຍຸຕິທໍາ, ຢູ່ກະຊວງປ້ອງກັນຄວາມສະຫງົບ, ໂດຍສະເພາະ ກະຊວງຍຸຕິທໍາ ລາຍງານແມ່ນ 68,000 ເລື່ອງ ໃນນີ້ປະຕິບັດສໍາເລັດຈໍານວນໜຶ່ງ ແລະ ບໍ່ສໍາເລັດຈໍານວນໜຶ່ງ ຊຶ່ງປີໜຶ່ງສາມາດປະຕິບັດໄດ້ແຕ່ 1,000 ເລື່ອງ; ອັນນີ້, ຍິ່ງບໍ່ທັນສະແດງອອກເຖິງທາດແທ້ດີເລີດຂອງລະບອບໃໝ່ ລະບອບທີ່ປະຊາຊົນເປັນເຈົ້າ ລະບອບທີ່ມີການນໍາພາຂອງພັກໃນແນວທາງທີ່ຖືກຕ້ອງ ລະບອບທີ່ມີລັດ ສາທາລະນະລັດ ປະຊາທິປະໄຕ ປະຊາຊົນ ຄຸ້ມຄອງລັດດ້ວຍກົດໝາຍ. ສະນັ້ນ, ຂໍໃຫ້ຕັ້ງໃຈສ້າງ, ຝຶກຜູ້ພິພາກສານ ແລະ ພະນັກງານສານ, ໄອຍະການ ຕື່ມອີກ.
(ຂ່າວ-ພາບ: ສຸກສະຫວັນ)
ຄໍາເຫັນ