 |
ຈຸດປະສົງຂອງພິທີລົງນາມໃນຄັ້ງນີ້,ແມ່ນເພື່ອພັດທະນາແລະສົ່ງເສີມວຽກງານຫັນເປັນດີຈີຕອນຂອງຂະແໜງການບໍລິການໂລຈິສຕິກແລະໄປສະນີຂອງສປປລາວໃຫ້ມີຄວາມທັນສະໄໝ, ວ່ອງໄວແລະມີປະສິດທິພາບຫຼາຍຂຶ້ນ.ເນື່ອງຈາກພວກເຮົາອາໄສຢູ່ໃນຍຸກທີ່ເສດຖະກິດນັບມື້ນັບໄດ້ຮັບການຊຸກຍູ້ຈາກການຄ້າເອເລັກໂຕຣນິກ, ການຄ້າລະຫວ່າງປະເທດ, ການໄຫຼເຂົົ້າຂອງສິນຄ້າແລະຂໍ້ມູນຂ່າວສານຢ່າງບໍ່ຢຸດຢັ້ງ. ສຳລັບສປປລາວກໍຄືກະຊວງເຕັກໂນໂລຊີແລະການສື່ສານທີ່ຕ້ອງການຜັນຂະຫຍາຍຍຸດທະສາດການຫັນເສດຖະກິດຕາມວິໄສທັດການພັດທະນາເສດຖະກິດດີຈີຕອນແຕ່ປີ 2021-2040 ແລະຍຸດທະສາດການພັດທະນາເສດຖະກິດດີຈີຕອນໄລຍະ 10 ປີແຕ່ປີ 2021-2030 ບວກກັບຈຸດທີ່ຕັ້ງພູມມີສາດຂອງປະເທດລາວທີ່ເປັນຈຸດໃຈກາງຂອງອະນຸພາກພື້ນແມ່ນ້ຳຂອງທີ່ສຳຄັນໃນການເຊື່ອມໂຍງ, ເຊື່ອມຈອດທາງດ້ານໂລຈິສຕິກແລະຂໍ້ມູນຂ່າວສານທີ່ເປັນທ່າແຮງ ສໍາຄັນໃນການພັດທະນາເສດຖະກິດ-ສັງຄົມໃນຍຸກແຫ່ງດີຈີຕອນ.
ການເຊັນບົດບັນທຶກຄວາມເຂົ້າໃຈໃນຄັ້ງນີ້ແມ່ນບາດກ້າວທີ່ສໍາຄັນໃນການວາງພື້ນຖານສໍາລັບການສຶກສາຄວາມເປັນໄປໄດ້ເພື່ອຄົ້ນຫາທ່າແຮງທີ່ບົ່ມຊ້ອນຂອງລະບົບບໍລິການຂົນສົ່ງໄປສະນີແບບດີຈີຕອນທີ່ທັນສະໄໝ. ດ້ວຍເຫດນັ້ນ, ການຮ່ວມມືນີ້ຈຶ່ງໄດ້ຖືກອອກແບບເພື່ອບັນລຸເປົ້າໝາຍທີ່ສຳຄັນຄື: 1. ຮ່ວມກັນສຶກສາຄວາມເປັນໄປໄດ້ໃນການພັດທະນາລະບົບການບໍລິການໄປສະນີແບບດີຈີຕອນທີ່ສົມບູນແລະເສີມຂະຫຍາຍຄຸນນະພາບການບໍລິການໃຫ້ດີຂຶ້ນ. ລະບົບນີ້ຈະຖືກອອກແບບເພື່ອເຊື່ອມຕໍ່ລະຫວ່າງສປປລາວກັບບັນດາຄູ່ຮ່ວມມືທີ່ສຳຄັນໃນພາກພື້ນຄື: ໄທ, ຫວຽດນາມ, ກຳປູເຈຍແລະສາທາລະນະລັດປະຊາຊົນຈີນ, 2. ຈະດໍາເນີນການສໍາຫຼວດຢ່າງລະອຽດກ່ຽວກັບໂຄງລ່າງພື້ນຖານຂອງສປປລາວ, ການລົງເກັບກຳຂໍ້ມູນລະບຽບຫຼັກການທີ່ກ່ຽວຂ້ອງແລະສຶກສາສິ່ງທ້າທາຍຕ່າງໆໃນປັດຈຸບັນ.ໂດຍສະເພາະຄວາມເຂົ້າໃຈກ່ຽວກັບທີ່ຕັ້ງພູມສັນຖານທີ່ມີຄວາມຈໍາເປັນສໍາລັບການສ້າງອະນາຄົດທີ່ເຂັ້ມແຂງແລະຍືນຍົງ, 3. ຄົ້ນຄວ້າແລະສ້າງແຜນຜັງສໍາລັບລະບົບການບໍລິການທີ່ທັນສະໄໝທີ່ລວມມີແພັດຟອມການຄ້າe-commerceແລະe-tradingແບບປະສົມປະສານ, ລະບົບການຄຸ້ມຄອງການຂົນສົ່ງແບບພິເສດ, ການຕິດຕາມຍານພາຫະນະຕົວຈິງ, ສິ່ງເຫຼົ່ານີ້ແມ່ນການບໍລິການທີ່ຈະສ້າງຄວາມເຂັ້ມແຂງໃຫ້ທຸລະກິດSMEs, ສະໜັບສະໜູນຊາວກະສິກອນໃຫ້ເຂົ້າເຖິງຕະຫຼາດພ້ອມກັບສະໜອງຄວາມສະດວກສະບາຍໃຫ້ກັບຜູ້ບໍລິໂພກ.ການຮ່ວມມືໃນຄັ້ງນີ້ຖືວ່າເປັນບາດກ້າວທີ່ສໍາຄັນຂອງການພັດທະນາຂະແໜງການໂລຈິສຕິກໄປສະນີເປັນດີຈີຕອນ,ສ້າງທ່າແຮງທີ່ສຳຄັນໃນການຕິດຕາມ,ຄຸ້ມຄອງດ້ານໄປສະນີໃຫ້ລວມສູນແລະ ການນຳໃຊ້ເຄື່ອງມືທີ່ທັນສະໄໝເຂົ້າມາຊ່ວຍໃນການບໍລິຫານຈັດການຂອງລັດ ໃຫ້ມີປະສິດທະພາບສູງ.
ຂ່າວ ແລະ ພາບ: ກົມໄປສະນີ
ຄໍາເຫັນ