 |
ງານດັ່ງກ່າວແມ່ນໄດ້ຮັບການຊີ້ນຳໂດຍກົງຈາກກົມໂຄສະນາຂອງຄະນະພັກເມືອງປາວຊານ ແລະ ຈັດຂຶ້ນໂດຍສູນການແລກປ່ຽນການສື່ສານຕ່າງປະເທດຂອງເມືອງປາວຊານ ໂດຍການເຂົ້າຮ່ວມຂອງທ່ານ ຈາງເກີຊິງ ຄະນະກຳມະການພັກເມືອງ ແລະ ຮອງເຈົ້າເມືອງປາວຊານ ແລະ ທ່ານ ດຸນເທັດລິນ ກົງສຸນໃຫຍ່ມຽນມາປະຈຳນະຄອນຄຸນໝິງ, ງານດັ່ງກ່າວຈະດໍາເນີນເປັນເວລາ 6 ວັນ ບັນດານັກຂ່າວຈະໄດ້ສໍາຜັດກັບບັນຍາກາດທີ່ເມືອງປາວຊານ ໂດຍສະເພາະແມ່ນກາເຟທີ່ມີຊື່ສຽງ,ມໍລະດົກທາງວັດທະນະທຳ ແລະ ວິຖີຊີວິດໃນເມືອງເກົ່າ.ໃນໄລຍະການຢ້ຽມຢາມ ຄະນະນັກຂ່າວຈະເດີນທາງໄປຍັງເຂດລົງຢາງ, ເມືອງຫຼົງຫຼິງ ແລະ ເມືອງເທີງຊົງ ເພື່ອສຳຜັດກັບອຸດສາຫະກຳກາເຟ, ຢ້ຽມຢາມຫັດຖະກຳມໍລະດົກ ເຊັ່ນ “ຫຍົງຈື” ແລະ ສິນລະປະການເຮັດທອງດຳຝັງເງິນ ພ້ອມທັງສຶກສາການປູກພືດສະຫມຸນໄພ ແລະ ສວນຊາໃນເຂດພູສູງກ໋າວຫຼີກົງ.
 |
ໃນພິທີເປີດ, ທ່ານ ຈາງເກີຊິງ ຄະນະກຳມະການພັກເມືອງ ແລະ ຮອງເຈົ້າເມືອງ ໄດ້ກ່າວວ່າ;ເມືອງປາວຊານເປັນປະຕູສຳຄັນຂອງເສັ້ນທາງສາຍໄໝໃຕ້ ແລະ ເປັນສູນກາງການເຊື່ອມຕໍ່ໄປສູ່ອາຊຽນ ແລະ ອາຊີໃຕ້. ດ້ວຍພູມສັນຖານທີ່ຕິດກັບມຽນມາ ແລະ ການແລກປ່ຽນຊຸມຊົນທີ່ໃກ້ຊິດ ເມືອງປາວຊານກຳລັງເພີ່ມພູນການຮ່ວມມືໃນພາກພື້ນແມ່ນ້ຳລ້ານຊ້າງ-ແມ່ນ້ຳຂອງ ແລະ ເປີດກວ້າງສູ່ສາກົນຫຼາຍຂຶ້ນ.
 |
ແລະ ທ່ານ ດຸນເທັດລິນ ກົງສຸນໃຫຍ່ມຽນມາປະຈຳນະຄອນຄຸນໝິງ ໄດ້ກ່າວວ່າ; ມຽນມາ ແລະ ຢຸນນານເປັນເພື່ອນບ້ານທີ່ໃກ້ຊິດ ແລະ ການແລກປ່ຽນລະຫວ່າງປະຊາຊົນແມ່ນມີຄວາມສຳຄັນ. ສື່ມວນຊົນຈຶ່ງມີບົດບາດເປັນຂົວຕໍ່ເພື່ອເຊື່ອມໂຍງຄວາມເຂົ້າໃຈ ແລະ ຫວັງວ່າ ນັກຂ່າວຈະນຳສະເໜີຂໍ້ມູນການພັດທະນາຂອງປາວຊານໃນຫຼາຍຮູບແບບ.
ນອກຈາກການຢ້ຽມຢາມແລ້ວ ຍັງມີການສຳມະນາໃນຫົວຂໍ້ “ໂອກາດ ແລະ ສິ່ງທ້າທາຍຂອງການສື່ສານໃນຍຸກ AI” ເພື່ອແລກປ່ຽນທັດສະນະລະຫວ່າງນັກຂ່າວຈາກ 4 ປະເທດ. ຜູ້ເຂົ້າຮ່ວມເຫັນພ້ອມກັນວ່າ ເທັກໂນໂລຊີ AI ຊ່ວຍໃນການຄົ້ນຫາ ແລະ ວິເຄາະຂໍ້ມູນ ແຕ່ບໍ່ສາມາດແທນປະສົບການຈາກການປະຕິບັດຕົວຈິງໄດ້.
 |
ນອກຈາກນີ້ສື່ມວນຊົນ ສປປລາວຍັງໄດ້ກ່າວວ່າ; ສື່ມວນຊົນບໍ່ແມ່ນພຽງແຕ່ຖ່າຍທອດຂໍ້ມູນ ແຕ່ເປັນຂົວຕໍ່ທີ່ສຳຄັນໃນການເຊື່ອມໂຍງຈິດໃຈລະຫວ່າງປະຊາຊົນ ແລະ ການນຳສະເໜີເລື່ອງລາວທຳມະດາຢ່າງອົບອຸ່ນ ຈະຊ່ວຍສ້າງຄວາມເຂົ້າໃຈ ແລະ ຄວາມຝັນຮ່ວມກັນໃນສັນຕິພາບ ແລະ ຊີວິດທີ່ດີກວ່າ.
ຂ່າວ: ໄມຕຣີ
ຄໍາເຫັນ