ສື່ມວນຊົນຕ່າງປະເທດເຂົ້າພົບຮອງລັດຖະມົນຕີກະຊວງການຕ່າງປະເທດ ສສ ຫວຽດນາມ

ໃນໂອກາດດັ່ງກ່າວ, ທ່ານ ນາງ ເລ ທິ ທູ ຮັງ ໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບບັນດາສື່ມວນຊົນຕ່າງປະເທດ ທີ່ໄດ້ໃຫ້ຄວາມສຳຄັນມາເຂົ້າຮ່ວມເກັບກຳຂ່າວກອງປະຊຸມໃຫຍ່ດັ່ງກ່າວໃນຄັ້ງນີ້, ພ້ອມນັ້ນ ທ່ານຍັງໄດ້ຍົກໃຫ້ເຫັນໝາກຜົນແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ໂດຍສະເພາະການປະຕິບັດແນວທາງການຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ການຮ່ວມມື ແລະ ການພັດທະນາ ຢ່າງສະເໝີຕົ້ນສະເໝີປາຍ, ຫັນເປັນຫຼາຍທິດ ແລະ ຫຼາຍຝ່າຍໃນການພົວພັນຕ່າງປະເທດ ຊຶ່ງວຽກງານການຕ່າງປະເທດ ໄດ້ເສີມຂະຫຍາຍບົດບາດບຸກທະລຸ, ປະກອບສ່ວນເຂົ້າໃນການຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ ແລະ ເປີດກວ້າງທ່າສະໜາມແຫ່ງການພັດທະນາໃໝ່ ຢ່າງທີ່ບໍ່ເຄີຍມີມາກ່ອນໃຫ້ແກ່ປະເທດຊາດ. ວຽກງານການຕ່າງປະເທດຂອງພັກ, ການທູດຂອງລັດ ແລະ ການທູດປະຊາຊົນ ໄດ້ຮັບການຜັນຂະຫຍາຍຢ່າງຮອບດ້ານ ແລະ ກົມກຽວ, ບັນລຸໄດ້ໝາກຜົນທີ່ພົ້ນເດັ່ນຫຼາຍປະການ, ການພົວພັນກັບບັນດາປະເທດ ແລະ ຄູ່ຮ່ວມມື ໂດຍສະເພາະແມ່ນບັນດາປະເທດມະຫາອຳນາດ, ຄູ່ຮ່ວມມືຍຸດທະສາດທີ່ສຳຄັນ ແລະ ເພື່ອນມິດທີ່ມີມູນເຊື້ອແມ່ນນັບມື້ນັບເຂົ້າສູ່ລວງເລິກ, ມີຄວາມສະຖຽນລະພາບ ແລະ ຍືນຍົງ.

ທ່ານ ນາງ ເລ ທິ ທູ ຮັງ ຍັງໃຫ້ຮູ້ອີກວ່າ: ດ້ານເສດຖະກິດ ສສ ຫວຽດນາມ ຍັງຮັກສາສະຖຽນລະພາບເສດຖະກິດມະຫາພາກ, ຄວບຄຸມອັດຕາເງິນເຟີ້, ໜີ້ສາທາລະນະ ແລະ ການຂາດດຸນງົບປະມານ; ຊ່ວຍດຸນການຄ້າເກີນດຸນໃນລະດັບສູງຢ່າງຕໍ່ເນື່ອງ. ອັດຕາການເຕີບໂຕລວມຍອດຜະລິດຕະພັນພາຍໃນ (GDP) ສະເລ່ຍໄລຍະ 2021-2025 ບັນລຸປະມານ 6.3% ຕໍ່ປີ, ຈັດຢູ່ໃນກຸ່ມສູງອັນດັບຕົ້ນໆຂອງໂລກ. ຂອບເຂດ GDP ໃນປີ 2025 ບັນລຸໄດ້ກວ່າ 510 ຕື້ໂດລາ (ເພີ່ມຂຶ້ນ 1.47 ເທົ່າທຽບໃສ່ 2020), ລາຍຮັບສະເລ່ຍຕໍ່ຫົວຄົນປະມານ 5.000 ໂດລາ, ເຮັດໃຫ້ ຫວຽດນາມເປັນປະເທດທີ່ມີລາຍຮັບສະເລ່ຍສູງ.

ຂ່າວ: ຕຸໄລເພັດ