 |
ທ່ານ ພົວ ຄອນສະຫວັນ ສົມພາໄຊ ຄະນະພັກກະຊວງ ຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 528/ຄລສພ; ດໍາລັດຂອງນາຍົກລັດຖະມົນຕີ ສະບັບເລກທີ 297/ນຍ; ວ່າດ້ວຍການອະນຸມັດໃຫ້ນາຍຕໍາຫຼວດອອກພັກການ ຮັບອຸດໜູນບໍານານ ໂດຍອະນຸມັດໃຫ້ ທ່ານ ພົວ ທິບພະຈັນ ໂພໄຊ ກໍາມະການພັກແຂວງ ຫົວໜ້າກອງບັນຊາການ ປກສ ແຂວງຄໍາມ່ວນ ອອກພັກການຮັບອຸດໜູນບໍານານ ແລະ ຜ່ານດໍາລັດ ສະບັບເລກທີ 311/ນຍ ວ່າດ້ວຍການແຕ່ງຕັ້ງ ຫົວໜ້າກອງບັນຊາການ ປກສ ແຂວງຄໍາມ່ວນ ໂດຍເຫັນດີແຕ່ງຕັ້ງ ທ່ານ ພັອ ຈັນໄຊ ນັນທະວົງ ເປັນຫົວໜ້າກອງບັນຊາການ ປກສ ແຂວງຄໍາມ່ວນ ຜູ້ໃໝ່. ພ້ອມນີ້ຍັງໄດ້ຜ່ານຂໍ້ຕົກລົງ ສະບັບເລກທີ 1451/ປກສ ວ່າດ້ວຍການແຕ່ງຕັ້ງນາຍຕໍາຫຼວດທີ່ຂຶ້ນກັບກອງບັນຊາການ ປກສ ແຂວງຄໍາມ່ວນ, ເຫັນດີຕົກລົງແຕ່ງຕັ້ງ ທ່ານ ພັທ ຄໍາ ນັນທະວົງ ແລະ ທ່ານ ພັທ ແກ້ວມະນີ ຈິດຕະນາພັນ ເປັນຮອງຫົວໜ້າກອງບັນຊາການ ປກສ ແຂວງຄໍາມ່ວນ.
ໂອກາດນີ້, ທ່ານ ພົອ ວິໄລ ຫຼ້າຄໍາຟອງ ໄດ້ເນັ້ນໜັກໃຫ້ບັນດາທ່ານທີ່ໄດ້ຮັບການແຕ່ງຕັ້ງໃໝ່ເອົາໃຈໃສ່ເປັນຄັນທຸງຮັກສາຄວາມສາມັກຄີໃຫ້ມີຄວາມໜັກແໜ້ນ, ມີການແບ່ງວຽກ, ແບ່ງງານ ແລະ ຄວາມຮັບຜິດຊອບໃນໝູ່ຄະນະ, ຍຶດໝັ້ນຫຼັກການລວມສູນປະຊາທິປະໄຕ ການຕັດສິນວຽກງານເປັນໝູ່ຄະນະ ພ້ອມກັນສູ້ຊົນຈັດຕັ້ງປະຕິບັດໜ້າທີ່ຄວາມຮັບຜິດຊອບເດັດຂາດຕໍ່ໜ້າທີ່ວຽກງານຂອງຕົນ, ຍົກສູງສະຕິຊາດເອກະລາດເປັນເຈົ້າຕົນເອງ ເສຍສະຫຼະເພື່ອຊາດເພື່ອປະຊາຊົນ, ສ້າງກົມກອງໃຫ້ມີຄວາມເຂັ້ມແຂງຮອບດ້ານ. ເອົາໃຈໃສ່ທີ່ສຸດໃນການກໍ່ສ້າງພັກ-ກໍ່ສ້າງພະນັກງານ ໃຫ້ມີຄວາມຈົ່ງຮັກພັກດີ, ມີນໍ້າໃຈຮັກຊາດ ຮັກມູນເຊື້ອຄວາມສາມັກຄີ, ເປັນເຈົ້າການປະຕິບັດໜ້າທີ່ຕາມພາລະບົດບາດ, ມີກົນໄກເຮັດວຽກທີ່ມີປະສິດທິຜົນ ແລະ ຮັບໃຊ້ປະຊາຊົນຢ່າງແທ້ຈິງ, ຄຽງຄູ່ກັນນັ້ນໃຫ້ເປັນເຈົ້າການແກ້ໄຂປະກົດການຫຍໍ້ທໍ້ໃນສັງຄົມ, ແກ້ໄຂບັນຫາຢາເສບຕິດ ແລະ ຕິດຕາມກວດກາບັນຫາຄວາມບໍ່ສະຫງົບຮຽບຮ້ອຍຕາມຊາຍແດນລະຫວ່າງປະເທດ ໃຫ້ຄຸ້ມຄອງຢ່າງເຂັ້ມງວດ, ເຊື່ອມຊຶມແນວທາງການເມືອງຂອງພັກໃຫ້ຖືກຕ້ອງ ໄປພ້ອມກັບການປັບປຸງພັດທະນາພື້ນຖານໂຄງລ່າງທີ່ຈໍາເປັນ, ພ້ອມທັງໄດ້ສະເໜີໃຫ້ເອົາໃຈໃສ່ ກະກຽມດໍາເນີນກອງປະຊຸມໃຫຍ່ຂອງພັກເພື່ອຮັບປະກັນທາງດ້ານເນື້ອໃນ, ຂະບວນການ ແລະ ດ້ານບຸກຄະລາກອນ ໃຫ້ມີຜົນສໍາເລັດທີ່ດີ.
(ຂ່າວ: ມະນີວັນ)
ຄໍາເຫັນ