ແຕ່ງຕັ້ງກົງສຸນໃຫຍ່ ແຫ່ງ ສປປ ລາວ ປະຈຳ ສສ ຫວຽດນາມ ທີ່ ນະຄອນດານັງ

ໃນພິທີ ທ່ານ ວັນດີ ບຸດສະດີ, ກໍາມະການປະຈໍາພັກກະຊວງ, ຫົວໜ້າກົມຈັດຕັ້ງ ແລະ ພະນັກ ງານ ໄດ້ຂຶ້ນຜ່ານຂໍ້ຕົກລົງ ວ່າດ້ວຍການແຕ່ງຕັ້ງ ທ່ານ ນ. ວອນຄຳ ເຈື່ອງມະນີວົງ ເປັນກົງສຸນໃຫຍ່ ແຫ່ງ ສປປ ລາວ ປະຈໍາ ສສ ຫວຽດນາມ ທີ່ ນະຄອນດານັງ ພ້ອມທັງຮັບຜິດຊອບເຂດພາກກາງ ຄື: ແຂວງຮ່າຕິ່ງ, ກວ້າງບິ່ງ, ກວ້າງຈິ, ເທື່ອທຽນເຫວ້, ກວ້າງນາມ, ກວ້າງຫງາຍ, ບິ່ງດິ້ງ, ຝູອຽນ, ກອນຕຸມ ຢາລາຍ ແລະ ດັກລັກ.

ໃນໂອກາດດັ່ງກ່າວ ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍຕໍ່ ສະຫາຍທີ່ໄດ້ຮັບການແຕ່ງຕັ້ງເປັນ ກົງສຸນໃຫຍ່ ແຫ່ງ ສປປ ລາວ ປະຈຳ ສສ ຫວຽດນາມ ທີ່ ນະຄອນດານັງ, ເປັນການມອບໝາຍໜ້າທີ່ການເມືອງ ແລະ ຄວາມຮັບຜິດຊອບອັນມີກຽດສະຫງ່າ ພ້ອມທັງສະແດງຄວາມເຊື່ອໝັ້ນຕໍ່ ກົງສຸນໃຫຍ່ ຈະນຳພາເຮັດສຳເລັດໜ້າທີ່ ທີ່ການຈັດຕັ້ງ ພັກ-ລັດ ມອບໝາຍໃຫ້ຢ່າງມີຜົນສຳເລັດ. ໂດຍສະເພາະ, ແມ່ນການບຸກທະລຸການທູດປ້ອງກັນເຫດ ເພື່ອປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເຊື່ອມໂຍງພາກພື້ນ ແລະ ສາກົນ ຂອງປະເທດເຮົາໃນໄລຍະໃໝ່, ລວມທັງການປະຕິ ບັດຄຳຂວັນ ບຸກທະລຸການທູດເສດຖະກິດ, ຫັນທິດເປັນທັນສະໄໝ, ວ່ອງໄວດ້ານເສນາທິການ, ອັນສໍາຄັນແມ່ນການເສີມຂະຫຍາຍສາຍພົວພັນມິດຕະພາບອັນຍິງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ໝັ້ນຄົງແໜ້ນແກ່ນ.

ໃນໂອກາດດຽວກັນ, ທ່ານ ນ. ວອນຄຳ ເຈື່ອງມະນີວົງ ກໍໄດ້ສະແດງຄວາມຂອບໃຈ ຕໍ່ຄະນະພັກ-ຄະນະນຳກະຊວງການຕ່າງປະເທດ ທີ່ໃຫ້ການໄວ້ເນື້ອເຊື່ອໃຈມອບໝາຍໜ້າທີ່ການເມືອງອັນສຳຄັນໃນຄັ້ງນີ້, ພ້ອມທັງໃຫ້ຄຳໝັ້ນສັນຍາວ່າ ຈະສືບຕໍ່ປະຕິບັດໜ້າທີ່ການເມືອງຂອງຕົນໃຫ້ມີຜົນສຳເລັດ, ຊຸກຍູ້ ແລະ ເສີມຂະຫຍາຍການພົວພັນຮ່ວມມືທີ່ດີ ລະຫວ່າງ ສອງຊາດ ລາວ-ຫວຽດນາມ ໃຫ້ນັບມື້ນັບແໜ້ນແຟ້ນ ແລະ ມີຜົນສຳເລັດເປັນກ້າວໆ. (ຂ່າວ: ກຕທ)