ສະຫາຍ ພັນເອກ ອຸດົມໄຊ ພົມປັນຍາ ຫົວໜ້າຫ້ອງການ ແລະ ບໍລິຫານ ກອງບັນຊາການທະຫານແຂວງກ່າວວ່າ: ໃນໄລຍະຜ່ານມາ ກອງບັນຊາການທະຫານແຂວງມີຄວາມສະຫງົບປອດໄພ 100%, ພະນັກງານນາຍ ແລະ ພົນ ທະຫານມີຄວາມຫ້າວຫັນວ່ອງໄວ, ມີນໍ້າໃຈຮັກຊາດຢ່າງສູງສົ່ງຕ້ານ ແລະ ສະກັດກັ້ນທຸກກົນອຸບາຍ ແລະ ບັນດາປະກົດການຫຍໍ້ທໍ້ຂອງພວກອິດທິກຳລັງປໍລະປັກ, ຈັດຕັ້ງກໍາລັງປ້ອງກັນເວນຍາມຄ້າຍຄູ່ ແລະ ຂອບເຂດຄວາມຮັບຜິດຊອບທົ່ວເທດສະບານແຂວງໃຫ້ມີຄວາມສະຫງົບ ແລະ ປອດໄພ. ໂດຍປະຕິບັດຕາມ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດວາງອອກໃຫ້ປະກົດຜົນເປັນຈິງ. ກອງປະຊຸມໄດ້ມີການປະກອບຄຳຄິດເຫັນ, ແລກປ່ຽນບົດຮຽນດ້ວຍບັນກາດຟົດຟື້ນ ແລະ ມີຄວາມໝາຍສຳຄັນຢ່າງເລິກເຊິ່ງ ເພື່ອປັບປຸງແກ້ໄຂວຽກງານປ້ອງກັນຊາດຮອບດ້ານ ກໍຄືປັບປຸງກໍ່ສ້າງພັກ-ພະນັກງານ, ກໍ່ສ້າງກຳລັງປະກອບອາວຸດທ້ອງຖິ່ນແຂວງໃນທຸກດ້ານຕາມແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ຮັບປະກັນເຮັດໃຫ້ກຳລັງປະກອບອາວຸດທົ່ວແຂວງມີຄວາມສະຫງົບໂດຍພື້ນຖານ.
 |
ໂອກາດນີ້, ສະຫາຍ ພົນຈັດຕະວາ ບຸນມີ ພາມີໄຊ ໄດ້ໃຫ້ກຽດໂອ້ລົມເນັ້ນໜັກໃຫ້ຄະນະພັກ-ຄະນະບັນຊາ ແຕ່ລະຂັ້ນ ຈົ່ງພ້ອມກັນສຶກສາອົບຮົມຮອບດ້ານການເມືອງ-ນໍາພາແນວຄິດໃຫ້ເປັນບັນຫາສໍາຄັນ, ຈັດຕັ້ງປະຕິບັດເຮັດສຳເລັດໜ້າທີ່ວຽກງານຕາມພາລະບົດບາດຂອງຕົນ ເຂົ້າໃນການຊີ້ນຳ-ນຳພາ, ບັນຊາພະນັກງານ-ນັກຮົບ, ປະຕິບັດລະ ບອບປະຊຸມ ແລະ ລະບົບສ່ອງແສງລາຍງານ ພ້ອມກັບຕິດຕາມກວດກາສະພາບການໃຫ້ໜັກແໜ້ນເຂັ້ມແຂງ ແລະ ວ່ອງໄວທັນເວລາ, ເປັນເຈົ້າການເພີ່ມທະວີ ມີສະຕິລະວັງຕົວທັບມ້າງທຸກກົນອຸບາຍຫັນປ່ຽນໂດຍສັນຕິຂອງສັດຕູ, ສືບຕໍ່ປັບປຸງແບບແຜນວິທີການເຮັດວຽກ, ຄົ້ນຄວ້າສຶກສາອົບຮົມດ້ານທິດສະດີການເມືອງຂອງພັກ ແນໃສ່ກໍ່ສ້າງພັກ-ກໍ່ສ້າງພະນັກງານ ກໍຄືປັບປຸງກຳລັງປະກອບອາວຸດໃຫ້ມີຄວາມເຕີບໃຫຍ່ໜັກແໜ້ນເຂັ້ມແຂງກ້າວຂຶ້ນຢ່າງບໍ່ຢຸດຢັ້ງ.
ຂ່າວ: ວໍລະສິດ ພິດສະຫາຍ, ພາບ: ນາງ ນີ່ ທໍາມະວົງ
ຄໍາເຫັນ