ທ່ານ ຈັນທະວົງ ແສນອາມາດມົນຕີ ຕິດຕາມວຽກງານຮອບດ້ານ ການເລືອກຕັ້ງຢູ່ແຂວງອັດຕະປື

ໃຫ້ກຽດຕ້ອນຮັບ ໂດຍ ທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນຂັ້ນແຂວງ ທັງເປັນຮອງປະທານຄະນະກຳມະການເລືອກຕັ້ງຂັ້ນແຂວງ, ບັນດາຜູ້ລົງສະໝັກເປັນ ສສຊ ຊຸດທີ X -ຜູ້ລົງສະໝັກເປັນ ສສຂ ຊຸດທີ V, ບັນດາຄະນະຮັບຜິດຊອບ, ຄະນະກໍາມະການເລືອກຕັ້ງຂັ້ນແຂວງ, ຂັ້ນເມືອງ ແລະ ຂັ້ນບ້ານ ພ້ອມດ້ວຍປະຊາຊົນ ທັງ 4 ບ້ານ ຄື: ບ້ານຮົ່ມ, ບ້ານຈໍາປາວ, ບ້ານແຄມຊັງ ແລະ ບ້ານຕະມໍເລີຍ.

ທ່ານ ນາງ ມີນາພອນ ໄຊສົມພູ ລາຍງານວ່າ: ບັນດາທ່ານທີ່ອອກຮັບສະໝັກເປັນ ສສຊ - ສສຂ ຄັ້ງນີ້ ລ້ວນແຕ່ແມ່ນຜ່ານການຄັດເລືອກຂອງພັກ, ລັດ, ແມ່ນຜູ້ທີ່ມີມາດຕະຖານ, ເງື່ອນໄຂຄົບຖ້ວນ.

ຜູ້ອອກສະໝັກຮັບເລືອກຕັ້ງ ເປັນສະມາຊິກ ສສຊ ຊຸດທີ X ປະກອບມີ: 1. ທ່ານ ບຸນເຖິງ ດວງສະຫວັນ ກຳມະການສູນກາງພັກ ເລຂາຄະນະພັກແຂວງອັດຕະປື, 2. ທ່ານ ພົຈວ ສຸລິໄຊ ພິຈິດ ກຳມະການສໍາຮອງສູນກາງພັກ ຮອງຫົວໜ້າຫ້ອງວ່າການກະຊວງປ້ອງກັນປະເທດ, 3; ທ່ານ ລິດຕາ ຂັດທິຍະ ກຳມະການປະຈໍາກະຊວງ,ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ, 4. ທ່ານ ພູວັນ ພົມມະຈັນ ຄະນະປະຈຳພັກແຂວງ ຄະນະປະຈຳສະພາປະຊາຊົນແຂວງ ຮອງປະທານສະພາ ປະຊາຊົນແຂວງ (ສສຂ ຊຸດທີ IV),5) ທ່ານ ກົງໃຈ ສີດາວົງ ກຳມະການພັກແຂວງ ຫົວໜ້າພະແນກກະສິກຳ ແລະ ສິ່ງແວດລ້ອມແຂວງ, 6. ທ່ານ ນາງ ແສງອາລຸນ ວົງສາທິການ ຄະນະພັກຮາກຖານ ກຳມະການປະຈຳສະພາປະຊາຊົນແຂວງ ຫົວໜ້າຫ້ອງວ່າການສະພາປະຊາຊົນແຂວງ (ສສຂ ຊຸດທີ IV), 7. ທ່ານ ນາງ ອ່ອນໄສ ມຽງລາວັນ ກຳມະການພັກແຂວງ ຫົວໜ້າອໍານວຍການໂຮງຮຽນການເມືອງການປົກຄອງແຂວງ, 8. ທ່ານ ຄໍາໝັ້ນ ສີສະໝຸດ ກຳມະການພັກແຂວງ ຫົວໜ້າພະແນກສາທາລະນະສຸກແຂວງ, 9. ທ່ານ ພັອ ບຸນເລີດ ແກ້ວພຸດທະວົງ ຮອງເລຂາຄະນະພັກ ຮອງກອງບັນຊາການ ປກສ ແຂວງ ແລະ 10. ທ່ານ ໄຊພອນ ໄຊສະຫວ່າງ ຮອງຫົວໜ້າຫ້ອງວ່າການແຂວງ.

ຜູ້ສະໝັກເປັນ ສສຂ ຊຸດທີ V ປະກອບມີ: 1. ທ່ານ ອິນປັນ ອິນທິລາດ ກຳມະການພັກແຂວງ ເລຂາຄະນະບໍລິຫານງານພັກເມືອງ, 2. ທ່ານ ນາງ ຈັນທະລີ ສີສຸວົງ ຮອງເລຂາຄະນະພັກຮາກຖານ ປະທານຄະນະກຳມະການຍຸຕິທໍາ ແລະ ປກຊ-ປກສ ສະພາປະຊາຊົນແຂວງ, 3. ທ່ານ ສຸດໃຈ ມາໄຊຍະວົງ ກຳມະການພັກເມືອງ ຫົວໜ້າຄະນະໂຄສະນາອົບຮົມເມືອງ, 4. ທ່ານ ພູວົງ ດວງພູໄຊ ກຳມະການພັກເມືອງ ຫົວໜ້າຫ້ອງການຍຸຕິທໍາເມືອງ, 5. ທ່ານ ຂັນອາສາ ພິມມະສອນ ຮອງເລຂາໜ່ວຍພັກ ຫົວໜ້າຂະແໜງນິຕິກຳ ແລະ ຍຸຕິທຳ ສະພາປະຊາຊົນແຂວງ, 6. ທ່ານ ນາງ ມະນີລອນ ຫຼວງອາໄພ ຄະນະພັກຮາກຖານ ຮອງຫົວໜ້າຫ້ອງການສຶກສາເມືອງ ແລະ 7. ທ່ານ ນາງ ພົມພອນ ກອງບົວຄໍາ ຄະນະໜ່ວຍພັກ ຮອງເລຂາຄະນະບໍລິຫານງານຊາວໜຸ່ມແຂວງ.

ໃນພິທີ, ບັນດາຜູ້ອອກສະໝັກຮັບເລືອກຕັ້ງແຕ່ລະທ່ານໄດ້ຜັດປ່ຽນກັນຂຶ້ນປະກອບຄຳເຫັນ ພ້ອມທັງແນະນໍາຕົນເອງ ເພື່ອໃຫ້ຜູ້ມີສິດປ່ອນບັດເລືອກຕັ້ງໄດ້ຮັບຮູ້ໜ້າທີ່ຕໍາແໜ່ງ-ໜ້າທີ່ວຽກງານແຕ່ລະຄົນແຕ່ລະໄລຍະ, ຜົນງານການເຄື່ອນໄຫວທີ່ພົ້ນເດັ່ນ, ວຸດທິການສຶກສາ, ວິໄສທັດການພັດທະນາໃນຕໍ່ໜ້າ ແລະ ແຜນວຽກອື່ນໆ ທັງນີ້ເພື່ອໃຫ້ຜູ້ມີສິດປ່ອນບັດເລືອກຕັ້ງໄດ້ໃຊ້ສິດຂອງຕົນເອງປ່ອນບັດເອົາຜູ້ແທນທີ່ຕົນເອງມັກ ໃນວັນທີ 22 ກຸມພາ 2026 ທີ່ຈະມາເຖິງນີ້ໃຫ້ບັນລຸຕາມຄາດໝາຍທີ່ວາງໄວ້; ໃນພິທີ ຍັງໄດ້ຮັບຊົມການສະແດງສິລະປະວັນນະຄະດີ, ລະຄອນສັ້ນ ກ່ຽວກັບການເລືອກຕັ້ງ ຈາກນັກຮຽນ ມ.ຕົ້ນ - ມ.ປາຍ ພ້ອມທັງຄະນະສິລະປະຂອງແຂວງ ແລະ ພາຍຫຼັງຈົບເວທີການສະແດງຄະນະຍັງໄດ້ຮັບການບາສີສູ່ຂວັນ ຕາມຮີດຄອງປະເພນີ ຂອງແຂວງອັດຕະປືອີກດ້ວຍ.

(ຂ່າວ: ແສງຈັນ)