ທ່ານ ຄໍາພັນ ພົມມະທັດ ພົບປະໂອ້ລົມພະນັກງານຫຼັກແຫຼ່ງ ທີ່ເຮັດວຽກງານກວດກາ  ພາຍໃນແຂວງຫົວພັນ.

ໃນຕອນເຊົ້າວັນທີ 5 ຕຸລາ 2023 ນີ້້, ທີ່ຫ້ອງປະຊຸມຫ້ອງວ່າການປົກຄອງແຂວງຫົວພັນ ທ່ານ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ  ໄດ້ພົບປະໂອ້ລົມພະນັກງານຫຼັກແຫຼ່ງທີ່ເຮັດວຽກງານກວດກາ ພາຍໃນແຂວງຫົວພັນ ໂດຍການໃຫ້ກຽດຕ້ອນຮັບຂອງ ທ່ານ ຮິນທອງ ດວງຈັນສຸກ ຄະນະປະຈໍາພັກແຂວງ, ປະທານຄະນະກວດກາພັກ-ອົງການກວດກາລັດແຂວງຫົວພັນ, ມີບັນດາທ່ານຮອງປະທານ, ພະນັກງານຂອງຄະນະກວດກາແຂວງ, ຜູ້ເຮັກວຽກງານກວດກາບັນດາພະແນກການອ້ອມຂ້າງແຂວງ, ຄະນະກວດກາເມືອງ ເຂົ້າຮ່ວມ ທັງໝົດ 64 ທ່ານ, ຍິງ 17 ທ່ານ. 
 ໃນການພົບປະຄັ້ງນີ້, ທ່ານ ຮິນທອງ ດວງຈັນສຸກ ໄດ້ລາຍງານສະພາບການເຄື່ອນໄຫວວຽກງານກວດກາໃນໄລຍະເຄິ່ງສະໄໝທີ່ຜ່ານມາວ່າ: ທົ່ວແຂວງຫົວພັນມີໜ່ວຍພັກທັງໝົດ 1.149 ໜ່ວຍພັກ, ທຽບໃສ່ປີ 2021 ເພີ່ມຂຶ້ນ 1 ໜ່ວຍພັກ, ໄດ້ຕີລາຄາຈັດແບ່ງປະເພດເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນມີ 845 ໜ່ວຍພັກ, ກາງ 5 ໜ່ວຍພັກ, ບໍ່ໄດ້ປະເມີນມີ 299 ໜ່ວຍພັກ; ມີສະມາຊິກພັກທັງໝົດ 20.667 ສະຫາຍ, ຍິງ4.977 ສະຫາຍ, ທຽບໃສ່ປີ 2021 ເພີ່ມຂື້ນ906 ສະຫາຍ, ຍິງ 681ສະຫາຍ; ສະມາຊິກພັກໄດ້ປະເມີນກາງສະໄໝ 15.828 ສະຫາຍ, ຍິງ 3.972 ສະຫາຍ, ມີສະມາຊິກພັກແຂງ ຈໍານວນ 15.204 ສະຫາຍ, ຍິງ 3.759 ສະຫາຍ, ສະມາຊິກພັກກາງມີ 624 ສະຫາຍ, ບໍ່ໄດ້ປະເມີນ 4.839 ສະຫາຍ; ມີສະມາຊິກພັກຖືກປະຕິບັດວິໄນທັງໝົດ 55 ສະຫາຍ, ຍິງ 13 ສະຫາຍ,ໃນນີ້ ຕິຕຽນ 19 ສະຫາຍ, ຍິງ 8 ສະຫາຍ, ກ່າວເຕື່ອນ 5 ສະຫາຍ,ຍິງ 2 ສະຫາຍ, ໂຈະການຮ່ວມຊິວິດພັກ 13 ສະຫາຍ, ຍິງ 3 ສະຫາຍ, ປົດຕໍາແໜ່ງ 2 ສະຫາຍ, ໄລ່ອອກຈາກພັກ 16 ສະຫາຍ ເຫດຜົນຂອງການປະຕິບັດວິໄນແມ່ນຍ້ອນຂາດສະຕິຕໍ່ການຈັດຕັ້ງ, ລະເມີດກົດລະບຽບພັກ, ກົດໝາຍຂອງລັດ, ມົ້ວສຸມຢາເສບຕິດ ແລະ ອຶ່ນໆ; ໄດ້ກວດກາໂຄງການລົງທຶນ ຂອງລັດເລີ່ມແຕ່ຫົວທີ ຈຳນວນ 3 ໂຄງການ ລວມມູນຄ່າ 207,57 ຕື້ກ່ວາກີບ ປະຈຸບັນແມ່ນກວດກາສຳເລັດແລ້ວ 100%; ກວດກາໂຄງການມູນຄ່າຕໍ່າກ່ວາ 10 ຕື້ກີບ ແລະ ສູງກວ່າ 10 ຕື້ກີບ ໄດ້ທັງໝົດ 162 ໂຄງການ ລວມມູນຄ່າສະພາຮັບຮອງ 5.311,54 ຕື້ກີບ, ມູນຄ່າໂຄງການທີ່ບໍ່ຖືກຕ້ອງ ຕ້ອງໄດ້ຫັກລົບອອກຈາກມູນຄ່າໂຄງການຈຳນວນ 147,32 ຕື້ກີບ ແລະ ມູນຄ່າບໍລິສັດຄ້າງມອບພັນທະໃຫ້ລັດຈຳນວນ 107,70 ຕື້ກີບ ແລະ 538.505,83 ໂດລາສະຫາລັດ; ການກວດກາໂຄງການຕາມມະຕິສະພາແຫ່ງຊາດ ສາມາດປະຍັດໃນການຫຼຸດເພດານໜີ້ສິນງົບປະມານຂອງລັດຖະບານໄດ້ທັງໝົດຈຳນວນ 255,02 ຕື້ກີບ ແລະ 538.505,83 ໂດລາສະຫາລັດ; ການດຳເນີນການແກ້ໄຂຜົນການກວດກາ ແມ່ນຫັກລົບມູນຄ່າທີ່ບໍ່ຖືກຕ້ອງອອກຈາກສາລະບານງົບປະມານແຫ່ງລັດແລ້ວ ຈໍານວນ 49ໂຄງການ, ເປັນມູນຄ່າ 106,79 ຕື້ກີບ; ໄດ້ດໍາເນີນການກວດກາຕາມຂໍ້ຕົກລົງທັງໝົດມີ 5 ເປົ້າໝາຍຄື: ຫ້ອງວ່າການແຂວງ, ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ, ພະແນກແຮງງານ ແລະ ສະຫວັດດີການສັງຄົມແຂວງ, ລັດວິສາຫະກິດຫົວພັນການຄ້າ, ພະແນກອຸດສາຫະກຳ-ການຄ້າແຂວງ ແລະ ການຄ້າເມືອງ ເຊິ່ງກວດກາພົບເຫັນທັງໝົດ 11,255,327,200 ກີບ, ເກັບກູ້ຄືນໄດ້ແລ້ວ 2,036,265,575 ກີບ, ແຂວງອອກຂໍ້ຕົກລົງລົບລ້າງ3,224,559,000 ກີບ, ຍັງເກັບກູ້ບໍ່ທັນໄດ້ 2,067,971,470 ກີບ ຕິດພັນກັບພະນັກງານລັດທັງໝົດ 43 ຄົນ; ປະຈຸບັນໄດ້ປະຕິບັດວິໄນຕໍ່ບຸກຄົນທີ່ລະເມີດໝົດແລ້ວ; ໄດ້ຮັບຄໍາຮ້ອງ-ຄໍາສະເໜີ ທັງໝົດ 20 ສະບັບ. ໃນນີ້ ມີບັດສົນເທ 2 ສະບັບ ເນື້ອໃນຄໍາຮ້ອງ-ຄໍາສະເໜີສ່ວນໃຫຍ່ແມ່ນຂໍ້ຂັດແຍ່ງທາງດ້ານທີ່ດິນ ແລະ ຄວາມບໍ່ໂປ່ງໃສໃນການປະຕິບັດໜ້າທີ່ວຽກງານຂອງພະນັກງານ ມາຮອດປັດຈຸບັນໄດ້ປະສານສົມທົບກັບພາກສ່ວນທີ່ກ່ຽວຂ້ອງແກ້ໄຂສໍາເລັດແລ້ວ.
ໂອກາດດຽວກັນນີ້, ທ່ານ ຄໍາພັນ ພົມມະທັດ ຍັງໄດ້ໃຫ້ກຽດໂອ້ລົມ ແລະ ສະແດງຄວາມຍ້ອງຍໍຊົມເຊີຍມາຍັງຄະນະພັກ-ຄະນະນໍາ, ຄະນະກວດກາແຕ່ລະຂັ້ນ ທີ່ໄດ້ເອົາໃຈໃສ່ປະຕິບັດວຽກງານຕິດຕາມ, ກວດກາມີຜົນສໍາເລັດຫຼາຍດ້ານໃນໄລຍະຜ່ານມາ. ພ້ອມທັງຍົກໃຫ້ເຫັນສະພາບການຜັນແປຂອງສັງຄົມໃນປັດຈຸບັນ ທີ່ຕ້ອງໄດ້ມີການເລັ່ງທວງໃຫ້ເພິ່ມທະວີບົດບາດໃນວຽກງານຕິດຕາມ, ກວດກາ ໃຫ້ຫັນໄປສູ່ດ້ານຄຸນນະພາບ ໂດຍສະເພາະຕ້ອງເອົາໃຈໃສ່ຂັດເລືອກ, ຍົກລະດັບບໍາລຸງກໍ່ສ້າງພະນັກງານສືບທອດປ່ຽນແທນໃຫ້ທັນກັບໜ້າທີ່ການເມືອງໃນໄລຍະ
ໃໝ່, ການປະເມີນ, ຊັບຊ້ອນຈັດວາງພະນັກງານຕ້ອງມີຄວາມໂປ່ງໃສ່, ການປະເມີນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຕ້ອງອີງໃສ່ຄຸນນະພາບເປັນຫຼັກ ຫຼີກເວັ້ນການປະເມີນແບບສະເລ່ຍ, ຖືເອົາວຽກງານຕິດຕາມ, ກວດກາ ເປັນປັດໄຈໜຶ່ງທີ່ສໍາຄັນໃນການຟື້ນຟູຄວາມເຊື່ອໝັ້ນ, ຄວາມສັດທາຂອງສັງຄົມ ຕໍ່ການຈັດຕັ້ງ, ສະມາຊິກພັກ, ພະນັກງານ-ລັດຖະກອນ ກໍຄືລະບອບການເມືອງຂອງພວກເຮົາ; ສືບຕໍ່ເຊື່ອມຊຶມ, ຜັນຂະຫຍາຍເນື້ອໃນຈິດໃຈໃນຄໍາສັ່ງແນະນໍາເລກທີ169/ຄລສພ, ລົງວັນທີ 15 ສິງຫາ 2022 ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ; ກວດກາຄືນບັນດາໂຄງການເກົ່າທີ່ມີມູນຄ່າ 10 ຕື້ຂຶ້ນ ແລະ 10 ຕື້ລົງ ເພື່ອສະຫຼຸບຂາດໂຕໃນທົ່ວແຂວງ, ເລັ່ງສຸ່ມໃສ່ວຽກງານຕິດຕາມ, ກວດກາປົກກະຕິແຕ່ຫົວທີ ເພື່ອບໍ່ໃຫ້ມີການກະທໍາຜິດໃນການປະຕິບັດສັນຍາ, ກວດກາຕາມມະຕິຂອງສະພາປະຊາຊົນແຂວງ, ກວດກາຕາມຄໍາຮ້ອງ-ຄໍາສະເໜີ ແລະ ການຄົ້ນຄວ້າວິໄນຕໍ່ພະນັກງານໃຫ້ຖືກຕ້ອງ, ໂປ່ງໃສ່, ຍຸດຕິທໍາ, ການດໍາເນີນການກວດກາຕ້ອງມີຂໍ້ມູນລະອຽດ ແລະ ໃຊ້ຂໍ້ມູນຢ່າງຕໍ່ເນື່ອງກັນເພື່ອບໍ່ໃຫ້ເກີດການຊັກຊ້າແກ່ຍາວໃນເວລາກວດກາ. ຂ່າວ:ຄຳຫວັນ ຈັນທະວົງ