 |
ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງ ທ່ານ Moctar LAM ໃນຄັ້ງນີ້ ພ້ອມທັງໄດ້ຕີລາຄາສູງຕໍ່ການພົວພັນຮ່ວມມືທີ່ດີ ລະຫວ່າງ ສປປ ລາວ ແລະ ສາທາລະນະລັດ ອິດສະລາມ ໂມຣີຕານີ ໃນຕະຫຼອດໄລຍະຜ່ານມາ, ທັງໃນຂອບການຮ່ວມມືສອງຝ່າຍ ແລະ ຫຼາຍຝ່າຍ ກໍຄືການຮ່ວມມືໃນຂົງເຂດວຽກງານຝຣັງໂກໂຟນີ, ໂດຍສະເພາະເລີ່ມແຕ່ທີ່ ສປປ ລາວ ແລະ ສາທາລະນະລັດ ອິດສະລາມ ໂມຣີຕານີ ມີສາຍພົວພັນການທູດໃນວັນທີ 19 ກັນຍາ 2013 ເປັນຕົ້ນມາ. ພ້ອມດຽວກັນນີ້, ທ່ານຮອງລັດຖະມົນຕີກະຊວງການຕ່າງປະເທດ ຍັງໄດ້ແຈ້ງໃຫ້ທາງຝ່າຍ ໂມຣີຕານີ ຊາບກ່ຽວກັບ ຜົນສໍາເລັດຂອງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ຊຶ່ງລັດຖະບານ ສປປ ລາວ ໃຫ້ບຸລິມະສິດແກ່ການພັດທະນາພື້ນຖານໂຄງລ່າງເພື່ອການເຊື່ອມໂຍງ-ເຊື່ອມຈອດ, ການພັດທະນາຊົນນະບົດເພື່ອຫຼຸດຜ່ອນຄວາມທຸກຍາກຂອງປະຊາຊົນ, ການເຕີບໂຕສີຂຽວ ແລະ ເປັນມິດຕໍ່ສິ່ງແວດລ້ອມ, ການຫັນເປັນດິຈິຕອນ ເພື່ອສ້າງການຫັນປ່ຽນດ້ານການພັດທະນາເສດຖະກິດ-ສັງຄົມຮອບດ້ານ ໄປສູ່ຄຸນນະພາບໃໝ່, ຄວາມໝາຍໝັ້ນເພື່ອ ນໍາພາປະເທດອອກຈາກສະຖານະພາບດ້ອຍພັດທະນາ ອີງຕາມການສະເໜີແນະນໍາຂອງ ອົງການ ສປຊ. ນອກຈາກນີ້, ທ່ານ ຮອງລັດຖະມົນຕີ ຍັງໄດ້ຕີລາຄາສູງຕໍ່ການພົບປະ ແລະ ການປຶກສາຫາລື ລະຫວ່າງສອງຝ່າຍໃນຄັ້ງນີ້, ແນໃສ່ເພື່ອເສີມຂະຫຍາຍການຮ່ວມມື ລະຫວ່າງ ສປປ ລາວ ແລະ ໂມຣີຕານີ ໃນຊຸມປີຕໍ່ໜ້າ, ລວມທັງການຮ່ວມມືໃນຂອບວຽກງານ ຝຣັງໂກໂຟນີ.
ໃນໂອກາດດຽວກັນນີ້, ທ່ານ Moctar LAM ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການພົວພັນຮ່ວມມືທີ່ດີລະຫວ່າງ ສາທາລະນະລັດ ອິດສະລາມ ໂມຣີຕານີ ແລະ ສປປ ລາວ ໃນໄລຍະຜ່ານມາ, ພ້ອມທັງໃຫ້ຄວາມໝາຍໝັ້ນວ່າ ຈະສືບຕໍ່ຊຸກຍູ້ເພື່ອໃຫ້ມີການເສີມຂະຫຍາຍການຮ່ວມມືໃນຂົງເຂດວຽກງານຕ່າງໆ ລະຫວ່າງສອງປະເທດ ໃນຕໍ່ໜ້າໃຫ້ກວ້າງຂວາງກວ່າເກົ່າ, ລວມທັງການຮ່ວມມືໃນຂອບວຽກງານຝຣັງໂກໂຟນີ.
(ຂ່າວ: ກຕທ)
ຄໍາເຫັນ