ຂ່າວສານຊີອາໄອລາຍງານ ຫວ່າງມໍ່ໆມານີ້, ທ່ານ ສີຈິ້ນຜິງ ປະທານປະເທດຈີນ ໄດ້ໃຫ້ທິດຊີ້ນຳອັນສຳຄັນຕໍ່ການຊຸກຍູ້ການຫັນເປັນອຸດສາຫະກຳແບບໃໝ່ຂອງຈີນ ໂດຍກ່າວວ່າ: ຕ້ອງຊຸກຍູ້ການສ້າງສາປະເທດຊາດໃຫ້ເຂັ້ມແຂງ ແລະ ຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນຢ່າງຮອບດ້ານດ້ວຍຄວາມທັນສະໄໝແບບຈີນ, ການບັນລຸການຫັນເປັນອຸດສາຫະກຳແບບໃໝ່ແມ່ນໜ້າທີ່ສຳຄັນ. ຕ້ອງຈັດຕັ້ງປະຕິບັດແນວຄິດພັດທະນາອັນໃໝ່ຢ່າງຄົບຖ້ວນ, ຖືກຕ້ອງ ແລະ ຮອບດ້ານ, ວາງແຜນການເອກະພາບໃນດ້ານການພັດທະນາ ແລະ ຄວາມໝັ້ນຄົງ, ຕັ້ງໜ້ານຳພາການປະຕິວັດດ້ານວິທະຍາສາດເຕັກໂນໂລຊີ ແລະ ການປະຕິຮູບດ້ານຂະແໜງການຮອບໃໝ່, ຕ້ອງຈັດຕັ້ງປະຕິບັດຄວາມຮຽກຮ້ອງຕ້ອງການດ້ານການພັດທະນາຢ່າງມີຄຸນນະພາບສູງເຂົ້າໃນທຸກຂັ້ນຕອນຂອງການຫັນເປັນອຸດສາຫະກຳແບບໃໝ່. ທ່ານ ສີຈິ້ນຜິງ ເນັ້ນໜັກວ່າ: ການຫັນເປັນອຸດສາຫະຫຳແບບໃໝ່ເປັນໂຄງການແບບລະບົບ. ຕ້ອງປັບປຸງຮູບແບບດຳເນີນງານທີ່ຄະນະພັກນຳພາເປັນເອກະພາບກັນ, ອົງການປົກຄອງຮັບຜິດຊອບຈັດຕັ້ງປະຕິບັດ, ວິສາຫະກິດເສີມຂະຫຍາຍບົດບາດຫຼັກແຫຼ່ງ ແລະ ກຳລັງແຮງສັງຄົມເຂົ້າຮ່ວມຢ່າງກວ້າງຂວາງ, ເຕົ້າໂຮມກຳລັງແຮງອັນໃຫຍ່ຫຼວງເພື່ອຊຸກຍູ້ການຫັນເປັນອຸດສາຫະກຳແບບໃໝ່, ປະກອບສ່ວນອັນໃຫຍ່ກວ່າເກົ່າເຂົ້າໃນການສ້າງເປັນປະເທດສັງຄົມນິຍົມທີ່ເຂັ້ມແຂງ ແລະ ທັນສະໄໝຢ່າງຮອບດ້ານ.
ລາຄາອາຫານໂລກໃນເດືອນກັນຍາເພີ່ມຂຶ້ນສູ່ລະດັບສູງສຸດໃນຮອບເກືອບ 4 ປີ
ສຳນັກຂ່າວສານຊິນຮວາລາຍງານໃນທ້າຍອາທິດ ຜ່ານມາວ່າ: ອົງການອາຫານ ແລະ ການກະເສດ ແຫ່ງສະຫະປະຊາຊາດ (FAO) ລາຍງານວ່າ, ດັດຊະນີລາຄາອາຫານທົ່ວໂລກໃນເດືອນກັນຍາ ສະເລ່ຍຢູ່ທີ່ 136.0 ຈຸດ, ເພີ່ມຂຶ້ນຈາກໂຕເລກເດືອນສິງຫາທີ່ໄດ້ຮັບການປັບປຸງໃໝ່ທີ່ 134.0 ຈຸດ. ໂດຍເປັນການເພີ່ມຂຶ້ນສູ່ລະດັບສູງສຸດໃນຮອບເກືອບ 4 ປີ, ນັບຕັ້ງແຕ່ເດືອນພະຈິກ 2022, ທ່າມກາງບັນຫາດ້ານການຂົນສົ່ງ ແລະ ຄວາມກັງວົນກ່ຽວກັບສະພາບອາກາດ.
ດັດຊະນີລາຄາມາດຕະຖານສຳລັບທັນຍາພືດ, ນ້ຳຕານ ແລະ ນ້ຳມັນພືດ ໄດ້ເພີ່ມຂຶ້ນໃນເດືອນກັນຍາ ຜ່ານມາ, ໃນຂະນະທີ່ລາຄາຊີ້ນ ແລະ ຜະລິດຕະພັນນົມຫຼຸດລົງ.
ຄໍາເຫັນ