ສະມາຄົມຜູ້ອາຍຸສູງ (ສອສ) ແຂວງສະຫວັນນະເຂດ ໄດ້ຈັດກອງປະຊຸມໃຫຍ່ ຄັ້ງທີ II ຂຶ້ນຫວ່າງບໍ່ດົນມານີ້ ທີ່ຫ້ອງວ່າການປົກຄອງແຂວງ. ໃຫ້ກຽດເປັນປະທານຂອງທ່ານນາງ ພາວັນ ບົວຫຼວງລາດ ຫົວໜ້າພະແນກແຮງງານ ແລະສະຫວັນດີການສັງຄົມແຂວງ (ຮສສ), ມີທ່ານ ສິງ ໄຊຍະບົວສີ ປະທານ ສອສ ແຂວງ, ທ່ານ ທອງເຕີນ ໄຊຍະເສນ ຫົວໜ້າຄະນະທີ່ປຶກສາສະມາຄົມ ພ້ອມດ້ວຍສະມາຊິກກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ສິງ ໄຊຍະບົວສີ ໄດ້ກ່າວເປີດກອງປະຊຸມພ້ອມທັງຜ່ານບົດລາຍງານການຈັດຕັ້ງປະຕິບັດວຽກງານ 6 ປີຜ່ານມາ 2017-2023 ແລະທິດທາງແຜນການ 3 ປີຕໍ່ໜ້າວ່າ: ປັດຈຸບັນ ສອສ ແຂວງມີສະມາຊິກທັງໝົດ 382 ທ່ານ ຍິງ 195 ທ່ານເພື່ອຄວາມສະດວກໃນການຄຸ້ມຄອງ-ບໍລິຫານວຽກງານຈຶ່ງແບ່ງການຈັດຕັ້ງອອກເປັນ 10 ໜ່ວຍ, ສ່ວນໃຫຍ່ເປັນພະນັກງານບໍານານຈາກອົງການຈັກຕັ້ງພັກ-ລັດ. ໃນເວລາທີ່ສະມາຊິກເຈັບເປັນນອນໂຮງໝໍທາງ ສອສ ໄດ້ຈັດຕັ້ງກັນໄປຢ້ຽມຢາມ ພ້ອມທັງມອບຂອງຂວັນເຄື່ອງຕ້ອນ ລວມເປັນເງິນທັງໝົດ 21 ລ້ານກີບ, ສໍາລັບຜູ້ທີ່ເສຍຊີວິດທາງສະມາຄົມໄດ້ນໍາພວງມາລາ ແລະເງິນຄັງໄປມອບໃຫ້ຄອບຄົວຜູ້ເສຍຊີວິດຕາມລະບຽບ ສອສ ວາງໄວ້ລວມທັງໝົດ 43 ຄັ້ງ, ໃຊ້ເງິນສົງເຄາະຊ່ວຍເຫຼືອທັງໝົດ 146 ລ້ານກວ່າກີບ. ສໍາລັບເງິນຄັງຂອງ ສອສ ນັບແຕ່ມື້ສ້າງຕັ້ງຈົນຮອດວັນທີ 5/1/2024 ມີລາຍຮັບທັງໝົດ 262 ລ້ານກວ່າກີບ, ລາຍຈ່າຍ 206 ລ້ານກວ່າກີບ, ຍອດຍັງເຫຼືອເກືອບ 56 ລ້ານກີບ. ສໍາລັບທິດທາງແຜນການ 3 ປີຕໍ່ໜ້າຈະສືບຕໍ່ເຄື່ອນໄຫວວຽກງານການເມືອງ-ແນວຄິດໃຫ້ແກ່ສະມາຊິກ, ເອົາໃຈໃສ່ຄຸ້ມຄອງລາຍຮັບ-ລາຍຈ່າຍໃນວຽກງານການເງິນຂອງສະມາຄົມ ແລະອື່ນໆ.
ຈາກນັ້ນ, ກອງປະຊຸມໄດ້ມີການຜ່ານຂໍ້ຕົກລົງຂອງທ່ານເຈົ້າແຂວງວ່າດ້ວຍການແຕ່ງຕັ້ງຄະນະບໍລິຫານງານສະມາຄົມຜູ້ອາຍຸສູງຊຸດທີ II ຊຶ່ງໄດ້ຕົກລົງແຕ່ງຕັ້ງເອົາ 19 ທ່ານດັ່ງນີ້: ທ່ານ ສິງ ໄຊຍະບົວສີ ເປັນປະທານ, ທ່ານ ບຸນຍົງ ໄຊປັນຍາ ເປັນຮອງປະທານ, ທ່ານນາງ ບຸນມີ ຂັນຕິວົງ ເປັນຮອງປະທານ, ທ່ານ ບຸນຍູ້ ທໍາມະວົງ ເປັນຮອງປະທານ, ທ່ານ ລິນສາຍຖະໜອມ ພະສະຫວັດ ເປັນຮອງປະທານ ແລະກໍາມະການອີກ 14 ທ່ານ.
ຂ່າວ-ພາບ: ສະຫວັນນະເຂດ
ຄໍາເຫັນ