ແລະ ແຜນການປີ 2024-2025 ຈາກທ່ານ ພຸດ ສິມມາວົງ ລັດຖະມົນຕີກະຊວງສຶກສາທິການ ແລະ ກິລາ (ສສກ) ໃນວັນທີ 9 ສິງຫານີ້ ທີ່ສູນ ICTC.
ຜ່ານການຮັບຟັງຜົນການຈັດຕັ້ງປະຕິບັດແຜນພັດທະນາຂະແໜງການສຶກສາ ແລະ ກິລາປະຈຳປີ 2023-2024 ແລະ ແຜນການປີ 2024-2025, ການຈັດຕັ້ງແຜນພັດທະນາວຽກງານການສຶກສາໃນໄລຜ່ານມາດຳເນີນໃນທ່າມກາງທີ່ມີທັງກາລະໂອກາດ, ຂໍ້ສະດວກ ແລະ ສິ່ງທ້າທາຍໄປພ້ອມໆກັນ ຊຶ່ງເປັນຂໍກຸນແຈເຮັດໃຫ້ເກີດຜົນສຳເລັດໃນສົກຮຽນຜ່ານມາ, ການຈັດການຮຽນ-ການສອນອາຊີວະສຶກສາແບບຄວບຄູ່ ແລະ ຮູບແບບການຝຶກອົບຮົມແບບເນັ້ນສະມັດຖະພາບໃນສະຖານອາຊີວະສຶກສາໄດ້ຖືກຈັດຕັ້ງປະຕິບັດຢ່າງກວ້າງຂວາງ, ກອງປະຊຸມໄດ້ປະກອບຄຳຄິດຄຳເຫັນ ເປັນຕົ້ນການແກ້ໄຂບັນຫາການຂາດແຄນຄູ, ບຸລິມະສິດໃນການສົ່ງເສີມວຽກງານການສຶກສາກ່ອນໄວຮຽນ, ວິທີແກ້ໄຂການເຂົ້າຮຽນຫຼຸດລົງ, ການປະລະເພີ່ມຂຶ້ນ ແລະ ຜົນການຮຽນຂອງນັກຮຽນຕໍ່າ, ບຸລິ ມະສິດສຳລັບການສຶກສາຜູ້ໃຫຍ່ ແລະ ການສະໜອງການຝຶກອົບຮົມວິຊາຊີບຂັ້ນພື້ນຖານ ແລະ ອື່ນໆ.
ໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຍ້ອງຍໍຊົມເຊີຍ ແລະ ເປັນເອກະພາບຕໍ່ຜົນສຳເລັດ ໃນການຈັດຕັ້ງປະຕິບັດວຽກງານການສຶກສາທົ່ວປະເທດທີ່ຜ່ານມາ ພ້ອມຍົກໃຫ້ເຫັນເຖິງພາລະບົດບາດຂອງວຽກງານການສຶກສາໃນປັດຈຸບັນ ແລະ ເມື່ອກ່ອນ ຊຶ່ງໃນສະໄໝດຳເນີນການຕໍ່ສູ້ປະຕິວັດປົດປ່ອຍຊາດ, ພັກເຮົາໄດ້ຄຳນຶງເຖິງການສຶກສາໄວ້ເປັນວຽກສຳຄັນຕົ້ນໆ ຂອງແນວທາງຂອງພັກ, ເວລາກຳລັງມີສົງຄາມທີ່ດຸເດືອດຂ້ຽວຂາດນັ້ນ ພັກເຮົາວາງແນວທາງອອກວ່າ: ຈະຕ້ອງເອົາການສຶກສາໄປກ່ອນກ້າວໜຶ່ງ, ມີຄໍາຂວັນ “ຮຽນໜັງສືແມ່ນຮັກຊາດ”, “ຄູເປັນຄົນຂອງພັກ”, “ຮຽນໜັງສືແມ່ນການຕໍ່ສູ້ເອົາຊະນະກັບສັດຕູໂຕໂງ່ຈ້າຫຼ້າຫຼັງ”, “ເປັນນັກຮຽນ ຕ້ອງຮຽນໃຫ້ເກັ່ງເສັງໃຫ້ໄດ້, ນຳໃຊ້ໃຫ້ເປັນ” ແລະ ອື່ນໆອີກ.
ທ່ານໄດ້ໃຫ້ຂໍ້ຄິດເພື່ອເປັນການແລກປ່ຽນຕໍ່ວຽກງານການສຶກສາວ່າ: ໃນສັງຄົມຂອງປະເທດໜຶ່ງ ເປັນຕົ້ນແມ່ນປະເທດທີ່ກ້າວໜ້າຈະເລີນໄດ້ໄວ ໜັກແໜ້ນ, ປະເທດຮັ່ງມີ, ລໍ້າລວຍນັ້ນ ຊຶ່ງປະກອບມີຊັບພະຍາກອນມະ ນຸດ, ຊັບພະຍາກອນບຸກຄົນທີ່ປະກອບດ້ວຍຄຸນສົມບັດປະມານ 5 ຢ່າງຄື: 1. ມີຄົນ ທີ່ມີຄວາມຮັກຊາດຢ່າງດູດດື່ມເປັນຈຳນວນຫຼາຍ; 2. ມີຄົນຫຼວງຫຼາຍໃນພົນລະເມືອງທີ່ສະແຫວງຫາຄວາມຮູ້ ອາດເວົ້າໄດ້ວ່າກະຕືລືລົ້ນຮຽນ, ຮຽນຮູ້ສິ່ງໃໝ່ໆ; 3. ມີຄົນ ທີ່ຮູ້ເບິ່ງຕົວເອງ ແລະ ສົມທຽບໃສ່ຄົນອື່ນ, ຮູ້ຊອກຫາຈຸດທີ່ຍັງອ່ອນ ແລະ ແກ້ໄຂຕົວເອງເພື່ອໃຫ້ເທົ່າຄົນອື່ນ ຫຼື ລື່ນຄົນອື່ນຍິ່ງດີ ຫຼື ອາດເວົ້າແນວໜຶ່ງວ່າເປັນຄົນທີ່ຢູ່ໃນບັນຍາກາດແຫ່ງການແຂ່ງຂັນຢູ່ຕະຫຼອດເວລາ; 4. ມີຄົນທີ່ດຸໝັ່ນຂະຫຍັນພຽນເປັນຈຳນວນຫຼວງຫຼາຍ ເປັນສ່ວນໃຫຍ່ຂອງປະເທດ; 5. ມີຄົນ ທີ່ຮູ້ຈັກປະຢັດ, ອົດອອມ, ບໍ່ຟຸ່ມເຟືອຍ, ບໍ່ໂລດໂຜນ, ໃຊ້ຊີວິດລຽບງ່າຍພໍດີ. ສິ່ງນີ້ເປັນຂໍ້ຄິດທີ່ຢາກຝາກເຖິງບັນດາຜູ້ບໍລິຫານການສຶກສາ. ຖ້າປະເທດໃດ, ສັງຄົມໃດມີ 5 ປະເພດຄົນນີ້ຢູ່ກັບຕົນເປັນສ່ວນໃຫຍ່ ຫຼື ມີລັກສະນະແຜ່ຫຼາຍເທົ່າໃດ. ປະເທດນັ້ນ, ສັງຄົມນັ້ນຈະຮັ່ງມີ, ເຂັ້ມແຂງໄດ້ດີກວ່າ.
ພ້ອມດຽວກັນນີ້, ທ່ານຍັງຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງໂດຍສະເພາະກະຊວງ ສສກ ຕໍ່ກັບການສ້າງຄົນຍຸກໃໝ່ ໂດຍຫັນປ່ຽນຄ່ານິຍົມທີ່ບໍ່ເປັນຕົວຂອງຕົວເອງ ກາຍມາເປັນຄ່ານິຍົມເຊື່ອມຕົນເອງ ເຮັດດ້ວຍຕົນເອງ, ຮັກກຽດສັກສີຂອງຕົນເອງໃຫ້ມີຄຸນຄ່າ, ມີຄວາມຮູ້, ຄວາມສາມາດ ແລະ ພ້ອມພຽງໄປດ້ວຍຄຸນສົມບັດສິນທຳປະຕິວັດ ເພື່ອເປັນທ່າແຮງອັນສຳຄັນ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຂຶ້ນຢ່າງບໍ່ຢຸດຢັ້ງ.
ຂ່າວ-ພາບ: ຍຸພິນທອງ
ຄໍາເຫັນ