ປະທານປະເທດ ຕ້ອນຮັບ ລັດຖະມົນຕີກະຊວງການຕ່າງປະເທດ ກໍາປູເຈຍພ້ອມຄະນະເຂົ້າຢ້ຽມຂໍ່ານັບ

ໃນໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການເດີນທາງມາຢ້ຽມຢາມຄັ້ງນີ້ຊຶ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານ ລະຫວ່າງສອງປະເທດ ໃຫ້ຂະຫຍາຍຕົວຍິ່ງໆຂຶ້ນ ພ້ອມທັງໄດ້ຝາກຄວາມຢື້ຢາມຖາມຂ່າວ ເຖິງ ພະບາດ ສົມເດັດ ພະບໍລົມມະນຽດ ໂນໂຣດົມ ສີຫາມຸນີ, ພະມະຫາກະສັດ ແຫ່ງ ຣາຊະອານາຈັກ ກໍາປູເຈຍ ແລະ ພະມານດາຂອງພະອົງ ລວມທັງການນໍາຂັ້ນສູງທ່ານອື່ນໆຂອງກໍາປູເຈຍ.

ໃນຂະນະດຽວກັນ, ທ່ານ ປຣາກ ໂຊຄົນ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ນໍາເອົາຄໍາຢື້ຢາມຖາມຂ່າວຂອງສົມເດັດກະສັດພະບໍລົມມະນຽດ ໂນໂຣດົມ ສີຫາມຸນີ, ພະມະຫາກະສັດ ແຫ່ງ ຣາຊະອານາຈັກ ກໍາປູເຈຍ ແລະ ບັນດາການຂັ້ນສູງຂອງກໍາປູເຈຍ ເຖິງ ທ່ານ ທອງລຸນ ສີສຸລິດ ພ້ອມທັງໄດ້ແຈ້ງຜົນຂອງກອງປະຊຸມຄະນະກໍາມາທິການຮ່ວມ ວ່າດ້ວຍ ການຮ່ວມມືສອງຝ່າຍ ລາວ-ກໍາປູເຈຍ, ກໍາປູເຈຍ-ລາວ ຄັ້ງທີ 15 ໃຫ້ຊາບໂດຍຫຍໍ້ ຊຶ່ງທ່ານ ທອງລຸນ ສີສຸລິດ ກໍໄດ້ສະແດງຄວາມຊົນເຊີຍຕໍ່ຜົນສຳເລັດດັ່ງກ່າວ ແລະ ຕີລາສູງທີ່ສອງຝ່າຍໄດ້ເຫັນດີເອກະພາບ ແລະ ຮັບຮອງເອົາບົດບັນທຶກກອງປະຊຸມດັ່ງກ່າວ. ພ້ອມນີ້, ທ່ານ ປຣາກ ໂຊຄົນກໍໄດ້ຢືນຢັນວ່າ ຈະສືບຕໍ່ເຮັດວຽກຮ່ວມກັບຝ່າຍລາວຢ່າງໃກ້ຊິດ ເພື່ອພ້ອມກັນຈັດຕັ້ງປະຕິບັດຜົນກອງປະຊຸມຄັ້ງນີ້ ໃຫ້ປະກົດຜົນເປັນຮູບປະທໍາ.

ນອກຈາກນັ້ນ, ສອງຝ່າຍຍັງໄດ້ແລກປ່ຽນຄໍາຄິດຄໍາເຫັນ ກ່ຽວກັບ ການພົວພັນຮ່ວມມື ລະຫວ່າງສອງປະເທດ ໃນດ້ານຕ່າງໆຕື່ມ ເຊັ່ນ: ວຽກງານຊາຍແດນ, ດ້ານພະລັງງານໄຟຟ້າ, ການເຊື່ອມຕໍ່ເສັ້ນທາງຄົມມະນາຄົມ, ດ້ານການຄ້າ, ການທ່ອງທ່ຽວ ແລະ ການລົງທຶນ, ການສຶກສາ ແລະ ກິລາ ແລະ ອື່ນໆ ແນໃສ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ກໍຄືການເປັນຄູ່ຮ່ວມຍຸດທະສາດຮອບດ້ານ ແລະໝັ້ນຄົງຍາວນານ ລະຫວ່າງສອງປະເທດ ລາວ-ກໍາປູເຈຍ ໃຫ້ແຕກດອກອອກຜົນຍິ່ງໆຂຶ້ນ.ໃນ ວັນດຽວກັນ ທ່ານ ສອນໄຊ ສີພັນດອນ ນາຍົກລັດຖະມົນຕີ ກໍໄດ້ຕ້ອນຮັບທ່ານ ປຣາກ ໂຊຄົນ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ ແຫ່ງ ຣາຊະອານາຈັກ ກໍາປູເຈຍ ພ້ອມດ້ວຍຄະນະ ເຂົ້າຢ້ຽມຂໍ່ານັບເຊັ່ນດຽວກັນ ທີ່ສຳນັງານນາຍົກລັດຖະມົນຕີ