ທ່ານ ທອງສະຫວັນ ພົມວິຫານ ເປັນປະທານຮ່ວມ ແລະ ເຂົ້າຮ່ວມກອງປະຊຸມ ລມຕ ຕ່າງປະເທດອາຊຽນ ກັບ ຄູ່ຮ່ວມເຈລະຈາອາຊຽນ

1. ໃນນາມປະເທດປະສານງານ ການພົວພັນຮ່ວມມືອາຊຽນ-ການາດາ (2024-2027), ທ່ານ ທອງສະຫວັນ ພົມວິຫານ ໄດ້ເປັນປະທານຮ່ວມກອງປະຊຸມລັດຖະມົນຕີຕ່າງປະເທດອາຊຽນ-ການາດາ ຮ່ວມກັບ ທ່ານ ນ. ອານິຕາ ອາແນນ, ລັດຖະມົນຕີ ກະຊວງການຕ່າງປະເທດ ການາດາ. ກອງປະຊຸມຄັ້ງນີ້ ໄດ້ປຶກສາຫາລື ແລະ ທົບທວນຄືນຄວາມຄືບໜ້າ ການພົວພັນຮ່ວມມື ອາຊຽນ-ການາດາ ໃນໄລຍະ ຜ່ານມາ ແລະ ຍິນດີຕໍ່ຄວາມຄືບໜ້າຂອງການຈັດຕັ້ງປະຕິບັດຖະແຫຼງການຮ່ວມຜູ້ນໍາອາຊຽນ-ການາດາ ວ່າດ້ວຍການຮັດແໜ້ນການເຊື່ອມຈອດ ແລະ ຄວາມເຂັ້ມແຂງອາຊຽນ ທີ່ຮັບຮອງເອົາໃນປີ 2024. ໃນນີ້, ກອງປະຊຸມ ໄດ້ສືບຕໍ່ຊຸກຍູ້ໃຫ້ເລັ່ງລັດການເຈລະຈາສັນຍາເຂດການຄ້າເສລີອາຊຽນ-ການາດາ (ACAFTA) ໃຫ້ສໍາເລັດພາຍໃນປີ 2026, ພ້ອມທັງ ສະເໜີໃຫ້ມີກິດຈະກໍາສະເຫຼີມສະຫຼອງ ການພົວ ພັນອາຊຽນ-ການາດາ ຄົບຮອບ 50 ປີ ໃນປີ 2027. ນອກຈາກນີ້, ກອງປະຊຸມ ໄດ້ຮັບຮອງເອົາ ແຜນປະຕິບັດງານ ອາຊຽນ-ການາດາ ສະບັບໃໝ່ (2026-2030), ຊຶ່ງຈະເປັນພື້ນຖານອັນສຳຄັນໃນການພົວພັນ ຮ່ວມມືອາຊຽນ-ການາດາ ໃນ 5 ປີ ຂ້າງໜ້າ.

2. ກອງປະຊຸມລັດຖະມົນຕີຕ່າງປະເທດອາຊຽນ-ອິນເດຍ ໄດ້ສະແດງຄວາມຊົມເຊີຍຕໍ່ຜົນສໍາເລັດຂອງການ ຈັດຕັ້ງປະຕິບັດ ແຜນປະຕິບັດງານ ອາຊຽນ-ອິນເດຍ (2021-2025). ອາຊຽນ ແລະ ອິນເດຍ ໄດ້ຢືນຢັນຄວາມໝາຍໝັ້ນ ທີ່ຈະຈັດຕັ້ງປະຕິບັດ ແຜນປະຕິບັດງານ ອາຊຽນ-ອິນເດຍ ສະບັບໃໝ່ (2026-2030) ໃຫ້ມີປະສິດທິພາບ. ສອງຝ່າຍ ຍິນດີຕໍ່ການກໍານົດເອົາປີ 2026 ເປັນ “ປີແຫ່ງການຮ່ວມມືທາງທະເລ ອາຊຽນ-ອິນເດຍ”. ນອກນັ້ນ, ສອງຝ່າຍ ຍັງໄດ້ຊຸກຍູ້ ການທົບທວນສັນຍາການຄ້າເສລີອາຊຽນ-ອິນເດຍ ເພື່ອອຳນວຍຄວາມສະດວກໃຫ້ແກ່ການຄ້າ-ການລົງທຶນ ແລະ ເພີ່ມທະວີຄວາມເຂັ້ມແຂງຂອງຕ່ອງໂສ້ການສະໜອງໃນພາກພື້ນ, ຊຸກຍູ້ການຮ່ວມມືດ້ານການຫັນເປັນດິຈິຕອນ, ການຮ່ວມມືດ້ານຄວາມປອດໄພທາງໄຊເບີ, ການຫັນປ່ຽນສູ່ພະລັງງານສະອາດ, ການຄຸ້ມຄອງໄພພິບັດ ແລະ ການສົ່ງເສີມການສຶກສາ ລວມທັງຜ່ານ ທຶນການສຶກສາອາຊຽນ-ອິນເດຍ ດ້ານກະສິກໍາ.

3. ກອງປະຊຸມລັດຖະມົນຕີຕ່າງປະເທດອາຊຽນ-ສ.ອາເມຣິກາ ໄດ້ທົບທວນຄືນການຮ່ວມມື ອາຊຽນ-ສ.ອາເມຣິກາ ໃນໄລຍະຜ່ານມາ ແລະ ໄດ້ຊຸກຍູ້ການຮັດແໜ້ນການຮ່ວມມືໃນຂົງເຂດທີ່ສໍາຄັນ ເປັນຕົ້ນແມ່ນ ການຄ້າ ແລະ ການລົງ ທຶນ, ພະລັງງານ, ຄວາມໝັ້ນຄົງ, ການຕ້ານອາຊະຍາກໍາຂ້າມຊາດ, ແຮ່ທາດ, ນະວັດຕະກໍາ, ປັນຍາປະດິດ, ການພັດທະນາຊັບພະຍາກອນມະນຸດ ແລະ ອື່ນໆ, ພ້ອມທັງ ຊົມເຊີຍຜົນສໍາເລັດຂອງການຈັດຕັ້ງປະຕິບັດ ແຜນປະຕິບັດງານອາຊຽນ-ສ.ອາເມຣິກາ (2021-2025) ທີ່ສາມາດຈັດຕັ້ງປະຕິບັດສໍາເລັດທຸກກິດຈະກໍາ ກວມເອົາສາມເສົາຄໍ້າປະຊາຄົມອາຊຽນ ພ້ອມທັງຊຸກຍູ້ເລັ່ງລັດການເຈລະຈາຮ່າງແຜນປະຕິບັດງານສະບັບໃໝ່ ເພື່ອເປັນພື້ນຖານໃຫ້ແກ່ການພົວພັນຮ່ວມມືອາຊຽນ-ສ.ອາເມ ຣິກາ ໃນຊຸມປີຕໍ່ໜ້າ.

4. ກອງປະຊຸມລັດຖະມົນຕີຕ່າງປະເທດ ອາຊຽນ-ຣັດເຊຍ ໄດ້ຊົມເຊີຍຄວາມຄືບໜ້າການພົວພັນຮ່ວມມືອາ ຊຽນ-ຣັດເຊຍ ໃນໄລຍະຜ່ານມາ ໂດຍສະເພາະຜົນສໍາເລັດຂອງກອງປະຊຸມສຸດຍອດ ສະເຫຼີມສະຫຼອງ ການພົວພັນອາຊຽນ-ຣັດເຊຍ ຄົບຮອບ 35 ປີ ໃນວັນທີ 18 ມິຖຸນາ 2026 ທີ່ ກາຊານ, ຣັດເຊຍ. ກອງປະຊຸມ ເຫັນດີໃຫ້ມີການຕິດຕາມ ແລະ ຊຸກຍູ້ການຈັດຕັ້ງປະຕິບັດເອກະສານຜົນກອງປະຊຸມ ສຸດຍອດດັ່ງກ່າວ ເປັນຕົ້ນແມ່ນການຈັດຕັ້ງປະຕິບັດແຜນປະຕິບັດງານ ອາຊຽນ-ຣັດເຊຍ (2026-2030), ລວມທັງການຮ່ວມມືດ້ານເສດຖະກິດ, ດ້ານພະລັງງານ, ດ້ານວັດທະນະທໍາ ແລະ ການໄປມາຫາສູ່ລະຫວ່າງປະຊາຊົນຂອງສອງພາກພື້ນ.

5. ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ໄດ້ສະແດງຄວາມຍິນດີຕໍ່ການຮັບຮອງສັນຍາເຂດການຄ້າເສລີ ອາຊຽນ-ຈີນ ສະບັບ 3.0 ແລະ ແຜນປະຕິບັດງານອາຊຽນ-ຈີນ ສະບັບໃໝ່ (2026-2030) ໃນທ້າຍປີ 2025 ຜ່ານມາ ແລະ ເຫັນດີໃຫ້ພ້ອມກັນສືບຕໍ່ຈັດຕັ້ງປະຕິບັດຢ່າງເປັນຮູບປະທໍາ. ພ້ອມນີ້, ກອງປະຊຸມ ຍັງໄດ້ຊົມເຊີຍການຈັດຕັ້ງປະຕິບັດບັນດາກິດຈະກໍາ ເພື່ອສະເຫຼີມສະຫຼອງຄົບຮອບ 5 ປີ ແຫ່ງການເປັນຄູ່ຮ່ວມຍຸດທະສາດຮອບດ້ານອາຊຽນ-ຈີນ ໃນປີ 2026. ສອງຝ່າຍ ເຫັນດີຊຸກຍູ້ການຮ່ວມມື ເພື່ອຮັບມືກັບຜົນກະທົບຈາກສະພາບການໃນຕາເວັນອອກກາງ ເປັນຕົ້ນແມ່ນຄວາມໝັ້ນຄົງດ້ານພະລັງງານ ແລະ ສະບຽງອາຫານ, ໃນນີ້ ກອງປະຊຸມໄດ້ຮັບຮອງເອົາ ຖະແຫຼງການຮ່ວມ ອາຊຽນ-ຈີນ ວ່າດ້ວຍສະພາບການໃນຕາເວັນອອກກາງ ແລະ ການຮັດແໜ້ນການຮ່ວມມືດ້ານພະລັງງານໃນພາກພື້ນ.

6. ກອງປະຊຸມລັດຖະມົນຕີຕ່າງປະເທດອາຊຽນ-ສ.ເກົາຫຼີ ໄດ້ທົບທວນຄືນຄວາມຄືບໜ້າການຮ່ວມມື ພາຍຫຼັງການຍົກລະດັບການພົວພັນ ເປັນຄູ່ຮ່ວມຍຸດທະສາດຮອບດ້ານ ໃນປີ 2024. ກອງປະຊຸມ ສະແດງຄວາມຊົມເຊີຍ ຕໍ່ຄວາມຄືບໜ້າຂອງການຈັດຕັ້ງປະຕິບັດ ແຜນປະຕິບັດງານ ອາຊຽນ-ສ.ເກົາຫຼີ (2026-2030), ການເລີ່ມຕົ້ນ ການເຈລະຈາຍົກລະດັບ ສັນຍາເຂດການຄ້າເສລີອາຊຽນ-ສ.ເກົາຫຼີ ແລະ ຊຸກຍູ້ການຮ່ວມມືດ້ານເສດຖະກິດດິຈິຕອນ ໂດຍສະເພາະແມ່ນ ຂໍ້ລິເລີ່ມດ້ານປັນຍາປະດິດ, ການຮ່ວມມືດ້ານຄວາມໝັ້ນຄົງທາງໄຊເບີ, ການຕ້ານອາຊະຍາກໍາຂ້າມຊາດ, ການຮັບມືກັບການປ່ຽນແປງຂອງສະພາບດິນຟ້າອາກາດ ແລະ ສົ່ງເສີມການສຶກສາ-ວັດທະນະທໍາ. ກອງປະຊຸມ ຍັງໄດ້ປຶກສາຫາລືຂໍ້ສະເໜີໃນການຈັດກອງປະຊຸມສຸດຍອດ ເພື່ອສະເຫຼີມສະຫຼອງ ຄົບຮອບ 40 ປີ ແຫ່ງການພົວພັນຮ່ວມມືອາຊຽນ-ສ.ເກົາຫຼີ ໃນປີ 2029.

7. ກອງປະຊຸມລັດຖະມົນຕີຕ່າງປະເທດອາຊຽນ-ຍີ່ປຸ່ນ ໄດ້ຮັບຊາບຄວາມຄືບໜ້າໃນການຈັດຕັ້ງປະຕິບັດແຜນປະຕິບັດງານຖະແຫຼງການຮ່ວມວິໄສທັດຜູ້ນໍາອາຊຽນ-ຍີ່ປຸ່ນ ວ່າດ້ວຍມິດຕະພາບ ແລະ ການຮ່ວມມື. ພ້ອມນີ້, ກອງປະຊຸມ ຍັງໄດ້ທົບທວນຄືນການຮ່ວມມືສອງຝ່າຍໃນໄລຍະຜ່ານມາ ແລະ ເຫັນດີສືບຕໍ່ຮັດແໜ້ນການຮ່ວມມືໃນຂົງເຂດທີ່ມີຄວາມສົນໃຈຮ່ວມກັນ ເປັນຕົ້ນແມ່ນ ການຫັນເປັນດິຈິຕອນ, ການຄ້າດິຈິຕອນ, ນະວັດຕະກໍາ ແລະ ປັນຍາປະດິດ, ພະລັງງານສະອາດ, ການຮັບມືກັບໄພພິບັດ, ການພັດທະນາຊັບພະຍາກອນມະນຸດ ແລະ ການໄປມາຫາສູ່ລະຫວ່າງປະຊາຊົນ. ນອກນັ້ນ, ກອງປະຊຸມ ໄດ້ເຫັນດີໃນດ້ານຫຼັກການຕໍ່ການຮັບຮອງເອົາ ຖະແຫຼງການຮ່ວມວ່າດ້ວຍການບັນລຸວິໄສທັດປະຊາຄົມອາຊຽນ 2045 ໃນໂອກາດກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 29 ທີ່ຈະຈັດຂຶ້ນໃນເດືອນພະຈິກ 2026.

8. ກອງປະຊຸມລັດຖະມົນຕີຕ່າງປະເທດອາຊຽນ-ອົສຕຣາລີ ໄດ້ສະແດງຄວາມຍິນດີຕໍ່ຄວາມຄືບໜ້າໃນການຈັດ ຕັ້ງປະຕິບັດແຜນປະຕິບັດງານອາຊຽນ-ອົສຕຣາລີ (2025-2029) ແລະ ໄດ້ຊຸກຍູ້ຮັດແໜ້ນການຮ່ວມມືໃນຂົງເຂດທີ່ມີຄວາມສົນໃຈ ແລະ ທ່າແຮງຮ່ວມກັນ ເປັນຕົ້ນແມ່ນ ການຄ້າ ແລະ ການລົງທຶນ, ພະລັງງານ, ກະສິກໍາ, ເສດຖະກິດດີຈີຕອນ ແລະ ການໄປມາຫາສູ່ລະຫວ່າງປະຊາຊົນ. ພ້ອມນີ້, ກອງປະຊຸມ ໄດ້ເຫັນດີໃນດ້ານຫຼັກການຕໍ່ການສະເໜີອອກ ຖະແຫຼງການຮ່ວມຜູ້ນໍາອາຊຽນ-ອົສຕຣາລີ ວ່າດ້ວຍການເປັນຄູ່ຮ່ວມຍຸດທະສາດຮອບດ້ານອາຊຽນ-ອົສຕຣາລີ ຄົບຮອບ 5 ປີ ໃນໂອາກາດ ກອງປະຊຸມສຸດຍອດອາຊຽນ-ອົສຕຣາລີ ຄັ້ງທີ 6 ທີ່ຈະຈັດຂຶ້ນໃນເດືອນພະຈິກ 2026.

9. ກອງປະຊຸມລັດຖະມົນຕີຕ່າງປະເທດອາຊຽນ-ນິວຊີແລນ ໄດ້ສະແດງຄວາມຊົມເຊີຍຜົນສຳເລັດຂອງກອງປະຊຸມສຸດຍອດສະເຫຼີມສະຫຼອງການພົວພັນຮ່ວມມືອາຊຽນ-ນິວຊີແລນ ຄົບຮອບ 50 ປີ ແລະ ການຍົກລະດັບເປັນຄູ່ຮ່ວມຍຸດທະສາດຮອບດ້ານ ໃນປີ 2025. ພ້ອມນີ້, ກອງປະຊຸມ ຊຸກຍູ້ການຈັດຕັ້ງປະຕິບັດ ແຜນປະຕິບັດງານການເປັນຄູ່ຮ່ວມຍຸດທະສາດຮອບດ້ານອາຊຽນ-ນິວຊີແລນ (2026-2030) ຢ່າງມີປະສິດ ທິພາບ ແລະ ເພີ່ມທະວີການຮ່ວມມືໃນຂົງເຂດທີ່ມີທ່າແຮງຮ່ວມກັນ ເປັນຕົ້ນແມ່ນ ກະສິກໍາ, ພະລັງງານສະອາດ, ການຮັບມືກັບໄພພິບັດ, ການສ້າງຂີດຄວາມສາມາດໃຫ້ແກ່ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ການພັດທະນາຊັບພະຍາກອນມະນຸດ ແລະ ການໄປມາຫາສູ່ລະຫວ່າງປະຊາຊົນ. ກອງປະຊຸມ ເຫັນດີຮັບຮອງ ຖະແຫຼງການຮ່ວມລັດຖະມົນຕີຕ່າງປະເທດອາຊຽນ-ນິວຊີແລນ ວ່າດ້ວຍການຮັດແໜ້ນຄວາມເຂັ້ມແຂງຂອງພາກພື້ນ.

10. ກອງປະຊຸມລັດຖະມົນຕີຕ່າງປະເທດອາຊຽນ-ອີຢູ ໄດ້ຮັບຊາບຄວາມຄືບໜ້າໃນການຈັດຕັ້ງປະຕິບັດແຜນປະຕິບັດງານການຮ່ວມມືອາຊຽນ-ອີຢູ່ (2023-2027) ແລະ ທິດທາງແຜນການຮ່ວມມືໃນຕໍ່ໜ້າ ໂດຍເຫັນດີສືບຕໍ່ຮັດແໜ້ນການຮ່ວມມື ເປັນຕົ້ນ ໃນຂົງເຂດການຄ້າ-ການລົງທຶນ, ການຫັນເປັນດີຈີຕອນ, ການຮັບມືກັບການປ່ຽນແປງດິນຟ້າອາກາດ ແລະ ການໄປມາຫາສູ່ລະຫວ່າງປະຊາຊົນ. ກອງປະຊຸມ ຍັງໄດ້ປຶກສາຫາລືການກະກຽມໃຫ້ແກ່ການສະເຫຼີມສະຫຼອງໃນໂອກາດຄົບຮອບ 50 ປີ ແຫ່ງການພົວພັນອາຊຽນ-ອີຢູ ໃນປີ 2027.

11. ກອງປະຊຸມລັດຖະມົນຕີຕ່າງປະເທດອາຊຽນ-ອັງກິດ ໄດ້ຕີລາຄາສູງຕໍ່ຜົນສໍາເລັດຂອງການຈັດຕັ້ງປະ ຕິບັດແຜນປະຕິບັດງານອາຊຽນ-ອັງກິດ (2022-2026) ແລະ ສືບຕໍ່ຄວາມໝາຍໝັ້ນໃນການເສີມຂະຫຍາຍຄວາມຮ່ວມມື ດ້ານເສດຖະກິດ-ການຄ້າ, ການຮັບມືກັບການປ່ຽນແປງດິນຟ້າອາກາດ ແລະ ການເຊື່ອມໂຍງ-ເຊື່ອມຈອດພາກພື້ນ. ເພື່ອສືບຕໍ່ຊຸກຍູ້ ການຮັດແໜ້ນສາຍພົວພັນ ອາຊຽນ-ອັງກິດ ໃຫ້ມີຄວາມແໜ້ນແຟ້ນ, ມີປະສິດທິຜົນ ແລະ ນໍາພາຜົນປະໂຫຍດຕົວຈິງມາສູ່ປະຊາຊົນຂອງສອງພາກພື້ນຢ່າງຍືນຍົງ, ກອງປະຊຸມ ໄດ້ຮັບຮອງເອົາແຜນປະຕິບັດອາຊຽນ-ອັງກິດ ສະບັບໃໝ່ (2027-2031) ແລະ ຖະແຫຼງການຮ່ວມລັດຖະມົນຕີຕ່າງປະເທດ ອາຊຽນ-ອັງກິດ ວ່າດ້ວຍການຮ່ວມມືໃນແນວຄວາມຄິດອາຊຽນ ກ່ຽວກັບ ອິນໂດ-ປາຊີຟິກ.

12. (ຂ່າວ: ກຕທ)