ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ອິນເດຍ ປະຈໍາ ສປປ ລາວ ໃນໂອກາດສໍາເລັດການປະຕິບັດໜ້າທີ່ການທູດຢູ່ ສປປ ລາວ.
ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຍ້ອງຍໍຊົມເຊີຍຕໍ່ທ່ານທູດໃນການປະກອບສ່ວນຢ່າງຕັ້ງໜ້າໃນການທູດເພື່ອຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສອິນເດຍ ໃຫ້ມີການຂະຫຍາຍຕົວ ແລະ ໄດ້ຮັບການພັດທະນາຍິ່ງໆຂຶ້ນຕະຫຼອດໄລຍະເວລາເກືອບ 2 ປີ ທີ່ທ່ານເອກອັກຄະລັດຖະທູດປະຕິບັດໜ້າທີ່ຢູ່ ສປປ ລາວນັບຕັ້ງແຕ່ວັນທີ 26 ກຸມພາ 2023 ເປັນຕົ້ນມາ. ທັງສອງຝ່າຍຕີລາຄາສູງຕໍ່ການພົວພັນຮ່ວມມືຂອງສອງປະເທດ ເຫັນໄດ້ມີທ່າເສີມຂະຫຍາຍຢ່າງຕໍ່ເນື່ອງ ຕະຫຼອດໄລຍະ 68 ປີຜ່ານມາ ນັບຕັ້ງແຕ່ສອງປະເທດໄດ້ສ້າງຕັ້ງສາຍພົົວພັນການທູດນໍາກັນ ໃນວັນທີ 2 ກຸມພາ 1956 ຊຶ່ງສະແດງໃຫ້ເຫັນຜ່ານການພົບປະແລກປ່ຽນການຢ້ຽມຢາມຂອງການນໍາຂັ້ນສູງເປັນປົກກະຕິ, ການສືບຕໍ່ໃຫ້ການຮ່ວມມື ແລະ ການສະໜັບສະໜູນຊ່ວຍເຫຼືອຊຶ່ງກັນ ແລະ ກັນ ທັງໃນຂອບສອງຝ່າຍ ແລະ ຫຼາຍຝ່າຍ ໃນເວທີພາກພື້ນ ແລະ ສາກົນ. ພ້ອມດຽວກັນນີ້ທ່ານ ທອງສະຫວັນ ພົມວິຫານ ໄດ້ສະແດງຄວາມຂອບໃຈຕໍ່ທ່ານທູດ ກໍຄືລັດຖະບານ ແລະ ປະຊາຊົນອິນເດຍ ທີ່ໄດ້ໃຫ້ການສະໜັບສະໜູນ ແລະ ການຊ່ວຍເຫຼືອ ສປປ ລາວ ຕະຫຼອດໄລຍະຜ່ານມາໃນຫຼາຍຂະແໜງການຮ່ວມມືເຊັ່ນ: ການຄ້າ-ການລົງທຶນ, ດ້ານປ້ອງກັນຊາດ, ດ້ານວັດທະນະທໍາ,ດ້ານພາສີ ເປັນຕົ້ນຊຶ່ງເປັນການປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ, ພິເສດກໍແມ່ນການສະໜັບສະໜູນ ສປປ ລາວ ໃນການເປັນປະທານອາຊຽນ ປີ 2024.
ໃນໂອກາດດຽວກັນນີ້, ທ່ານທູດ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງຖືໂອກາດນີ້ ສະແດງຄວາມຊົມເຊີຍຕໍ່ທ່ານ ທອງສະຫວັນ ພົມວິຫານ ທີ່ໄດ້ຮັບການແຕ່ງຕັ້ງໃຫ້ດໍາລົງຕໍາແໜ່ງເປັນ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຄົນໃໝ່. ພ້ອມນີ້, ທ່ານທູດ ຍັງໄດ້ສະແດງຄວາມຊົມເຊີຍຕໍ່ຜົນສໍາເລັດໃນການເປັນປະທານອາຊຽນຂອງ ສປປ ລາວ ແລະ ຂອບໃຈຢ່າງຈິງໃຈມາຍັງ ລັດຖະບານ ສປປ ລາວ ແລະ ທຸກພາກສ່ວນທັງສູນກາງ ແລະ ທ້ອງຖິ່ນ ທີ່ໄດ້ໃຫ້ການຮ່ວມມືທີ່ດີໂດຍສະເພາະກໍແມ່ນກະຊວງການຕ່າງປະເທດ ສປປ ລາວ ທີ່ໄດ້ໃຫ້ການຮ່ວມມື, ການສະໜັບສະໜູນຊ່ວຍເຫຼືອ ແລະ ການອໍານວຍຄວາມສະດວກດ້ານຕ່າງໆ, ເຮັດໃຫ້ການປະຕິບັດໜ້າທີ່ການທູດຂອງຕົນຢູ່ ສປປ ລາວ ປະສົບຜົນສໍາເລັດເປັນຢ່າງດີ ແລະ ມີຄວາມຍິນດີທີ່ຈະສືບຕໍ່ປະກອບສ່ວນຊ່ວຍຊຸກຍູ້ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສ ອິນເດຍ ໃຫ້ຂະຫຍາຍຕົວຍິ່ງໆຂຶ້ນໃນຕໍ່ໜ້າ.
ຂ່າວ:ກະຊວງການຕ່າງປະເທດ
ຄໍາເຫັນ