ທະນາຄານນະໂຍບາຍສາຂາສະຫວັນນະເຂດ ສະຫຼຸບວຽກງານຮອບດ້ານ

ໃນວັນທີ 12 ມັງກອນ ນີ້, ທະນາຄານນະໂຍບາຍ(ທນບ) ສາຂາສະຫວັນນະເຂດ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານຮອບດ້ານປະຈໍາປີ 2023  ແລະວາງທິດທາງແຜນການປີ 2024 ຊຶ່ງໄດ້ຈັດຂຶ້ນທີ່ຫ້ອງປະຊຸມຂອງທະນາຄານດັ່ງກ່າວ. ໂດຍການເປັນປະທານຂອງທ່ານ ວຽງທອງ ໄຊວົງສາ ຫົວໜ້າ ທນບ ສາຂາສະຫວັນນະເຂດ, ມີຄະນະສາຂາ, ຄະນະຂະແໜງ, ຄະນະຫ້ອງການປະສານງານ, ຄະນະໜ່ວຍບໍລິການ ແລະພະນັກງານພາຍໃນເຂົ້າຮ່ວມຢ່າງພ້ອມພຽງ.
ທ່ານ ສີສຸກ ສີສຸວັນ ຫົວໜ້າຂະແໜງຫ້ອງການບໍລິຫານ-ຈັດຕັ້ງພະນັກງານ ກໍໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານໃນປີ 2023 ຜ່ານມາວ່າ: ປັດຈຸບັນ ທນບ ສາຂາສະຫວັນນະເຂດ ມີພະນັກງານທັງໝົດ 90 ຄົນຍິງ 41 ຄົນ, ພະນັກງານສົມບູນ 87 ຄົນຍິງ 38 ຄົນ. ດ້ານວຽກງານວິຊາສະເພາະຮອດທ້າຍປີ 2023 ສາມາດປ່ອຍສິນເຊື່ອໄດ້ທັງ
ໝົດ139,49 ຕື້ກີບ, ເທົ່າກັບ 117,23% ຂອງແຜນການປີ(118.986 ຕື້ກີບ), ເພີ່ມຂຶ້ນ 84,97% ທຽບໃສ່ທ້າຍປີ 2022(75,413 ຕື້ກີບ); ເກັບຕົ້ນທຶນໄດ້ທັງໝົດ 54,35 ຕື້ກວ່າກີບ, ເທົ່າກັບ 74,13%ຂອງແຜນການປີ(73,31 ຕື້ກວ່າກີບ), ເພີ່ມຂຶ້ນ 9,86 ຕື້ກວ່າກີບ, ເທົ່າກັບ 111,54% ທຽບໃສ່ທ້າຍປີ 2022 ແມ່ນ 44,48 ຕື້ກວ່າກີບ; ເກັບດອກເບ້ຍໄດ້ທັງໝົດ 20,53 ຕື້ກວ່າກີບ, ເທົ່າກັບ 37,88%ຂອງແຜນການປີ(54,219 ຕື້ກີບ), ຍອດສິນເຊື່ອຮອດທ້າຍປີ 2023 ສາມາດປະຕິບັດໄດ້ 432,41 ຕື້ກວ່າກີບ, ເທົ່າກັບ 106,61% ຂອງແຜນປີ 405,613  ຕື້ກີບ, ຮອດທ້າຍເດືອນ 12/2023  ມີຍອດຊັບສິນທັງໝົດ 325,67 ຕື້ກວ່າກີບ, ເພີ່ມຂຶ້ນ 0,41% ທຽບໃສ່ປີ 2022; ລາຍຮັບສະສົມຮອດເດືອນ 12/2023 ແມ່ນ 65,80 ຕື້ກວ່າກີບ, ຫຼຸດລົງ 0,03%, ລາຍຈ່າຍສະສົມຮອດເດືອນ 12/2023 ແມ່ນ 59,51 ຕື້ກວ່າກີບ, ຫຼຸດລົງ 0,26% ທຽບໃສ່ປີ 2022ແລະມີກໍາໄລສະສົມຮອດເດືອນ 12/2023 ຈໍານວນ 6,25 ຕື້ກວ່າກີບ ຖືວ່າມີທ່າອຽງດີຂຶ້ນແບບຂາດຕົວ, ທຽບໃສ່ປີ 2022.
ຂ່າວ-ພາບ:ສະຫວັນນະເຂດ