ທາບທາມບຸກຄະລາກອນເຂົ້າໃນໂຄງປະກອບຄະນະສະຫະພັນນັກຮົບເກົ່າເມືອງຫົງສາ ສະໄໝທີ V

ກອງປະຊຸມທາບທາມບຸກຄະລາກອນເຂົ້າໃນໂຄງປະກອບຄະນະສະຫະພັນນັກຮົບເກົ່າເມືອງຫົງສາ ສະໄໝທີ V ໄດ້ຈັດຂຶ້ນເມື່ອບໍ່ດົນມານີ້ທີ່ສະໂມສອນເມືອງຫົງສາ ແຂວງໄຊຍະບູລີ ໂດຍການເປັນປະທານຂອງສະຫາຍ ແຫຼ້ ອ່ອນສົມບູນ ຮອງເລຂາພັກເມືອງ ປະທານຄະນະກວດກາພັກ ຫົວໜ້າອົງການກວດກາລັດ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.
ສະຫາຍ ພັຕ ພອນຄໍາວົງພະແກ້ວປະທານສະຫະພັນນັກຮົບເກົ່າເມືອງໄດ້ຜ່ານບົດສະຫຼຸບວຽກງານຮອບດ້ານໃນໄລຍະ 1 ປີຜ່ານມາ, ຊຶ່ງສະຫະພັນນັກຮົບເກົ່າໄດ້ຖືເອົາວຽກງານການເມືອງ-ແນວຄິດເປັນສຳຄັນເຕົ້າໂຮມຄວາມສາມັກຄີ, ສຶກສາອົບຮົບສະມາຊິກພັກ, ພະນັກງານ-ລັດຖະກອນ ແລະສະມາຊິກນັກຮົບເກົ່າຢ່າງເປັນປົກກະຕິ-ຕໍ່ເນື່ອງ, ໄດ້ນຳເອົາເອກະສານ, ນິຕິກໍາຕ່າງໆຂອງຂັ້ນເທິງລົງເຜີຍແຜ່ໃຫ້ສະມາຊິກນັກຮົບເກົ່າ, ອົງການຈັດຕັ້ງຂອງບ້ານໄດ້ຮັບຮູ້-ເຂົ້າໃຈ. ເຮັດໃຫ້ອົງການປົກຄອງບ້ານຮູ້ນຳພາ-ຊີ້ນຳວຽກງານຕ່າງໆ ສະເພາະແມ່ນວຽກງານຂອງສະຫະພັນນັກຮົບເກົ່າໃຫ້ມີການເຄື່ອນໄຫວຖືກຕ້ອງ, ສະມາຊິກມີຄວາມຕື່ນຕົວສະໝັກໃຈປະຕິບັດຖືກຕ້ອງຕາມລະບຽບ-ກົດໝາຍໄດ້ວາງອອກຢ່າງເຂັ້ມງວດ.ສະຫະພັນນັກຮົບເກົ່າເມືອງມີພະນັກງານທັງໝົດ 8 ສະຫາຍ, ຍິງ 3 ສະຫາຍ, ໃນນີ້ເປັນຄະນະປະທານ 3 ສະຫາຍ ຍິງ 1 ສະຫາຍ, ມີພະນັກງານບຳນານ 3 ສະຫາຍ ຍິງ 1 ສະຫາຍ, ມີທະຫານປະຈຳການ 3 ສະຫາຍ ຍິງ 1 ສະຫາຍ, ຕໍາຫຼວດ 1 ສະຫາຍ, ພະນັກງານ-ລັດຖະກອນ 1 ສະຫາຍ ຍິງ 1 ສະຫາຍ.ປັດຈຸບັນສະຫະພັນນັກຮົບເກົ່າຂັ້ນຮາກຖານບ້ານມີ 7 ໜ່ວຍຮາກຖານ, ມີ 9 ຈຸຂຶ້ນກັບ, ມີຄະນະໜ່ວຍຂັ້ນຮາກຖານບ້ານທັງໝົດ 14 ສະຫາຍ ຍິງ 1 ສະຫາຍ, ມີສະມາຊິກນັກຮົບເກົ່າທັງໝົດ 215 ສະຫາຍ ຍິງ 25ສະຫາຍ, ມີທະຫານ 182 ສະຫາຍ ຍິງ 18 ສະຫາຍ, ຕຳຫຼວດ 33 ສະຫາຍ ຍິງ 7 ສະຫາຍ. ພ້ອມນັ້ນ,ສະຫາຍນາງ ແສງຫຼ້າ ມະຫາວົງສະນັ່ນ ຄະນະປະຈຳພັກເມືອງ ຫົວໜ້າຄະນະຈັດຕັ້ງເມືອງໄດ້ຜ່ານມາດຖານເງື່ອນໄຂຜູ້ທີ່ຈະອອກສະໝັກເລືອກຕັ້ງເປັນຄະນະສະຫະພັນນັກຮົບເກົ່າເມືອງ. ຈາກນັ້ນໄດ້ທາບທາມຮອບ I ຢ່າງເປັນທາງການ.ໃນນັ້ນຍັງໄດ້ຮັບຟັງການມີຄໍາເຫັນໂອ້ລົມໃຫ້ທິດຊີ້ນໍາຈາກສະຫາຍ ແຫຼ້ ອ່ອນສົມບູນ ຕື່ມອີກ.
ຂ່າວ-ພາບ: ກິດຕິສັກ ບົວໄລ