 |
ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຂຶ້ນລາຍງານກ່ຽວກັບການຈັດຕັ້ງປະຕິບັດນະໂຍບາຍ, ນິຕິກຳ, ກົນໄກຕ່າງໆ ໃນການພັດທະນາພະລັງງານໄຟຟ້າ ຕໍ່ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ IX ໃນຕອນບ່າຍວັນທີ 12 ມິຖຸນານີ້ ທີ່ຫໍສະພາແຫ່ງຊາດ ພາຍໃຕ້ການເປັນປະທານຂອງ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ.
ທ່ານ ມະໄລທອງ ກົມມະສິດ ກ່າວໃຫ້ຮູ້ວ່າ: ການຂຶ້ນລາຍງານຄັ້ງນີ້, ແມ່ນໃນເວລາທີ່ສັງຄົມໃຫ້ຄວາມສົນໃຈຫຼາຍ ເພາະບັນຫາລາຄາໄຟຟ້າ ກຳລັງເປັນບັນຫາຮ້ອນ ທີ່ກະທົບຕໍ່ຊີວິດການເປັນຢູ່ຂອງປະຊາຊົນ ແລະ ການເຄື່ອນໄຫວເສດຖະກິດ-ສັງຄົມ ໃນປັດຈຸບັນ. ນັບແຕ່ປີ 1987 ພັກ ແລະ ລັດຖະບານໄດ້ເລີ່ມປະຕິບັດນະໂຍບາຍປ່ຽນແປງໃໝ່ໂດຍເປີດຮັບການລົງທຶນຂອງພາກເອກະຊົນເຂົ້າໃນການພັດທະນາເສດຖະກິດແນໃສ່ດຶງດູດການລົງທຶນ,ບົດຮຽນປະສົບການ, ເຕັກໂນໂລຊີແລະການເຂົ້າເຖິງຕະຫຼາດເພື່ອພັດທະນາຂະແໜງການພະລັງງານທີ່ເຮົາມີທ່າແຮງ. ດ້ວຍເຫດນີ້,ລັດຖະບານຈຶ່ງໄດ້ໃຫ້ນະໂຍບາຍສົ່ງເສີມພິເສດຫຼາຍຢ່າງເປັນຕົ້ນແມ່ນໃຫ້ນະໂຍບາຍຍົກເວັ້ນພາສີ, ຜ່ອນຜັນດ້ານອາກອນກໍາໄລແລະອາກອນປະເພດອື່ນໆເພື່ອໃຫ້ໂຄງການມີຜົນຕອບແທນສູງສຸດ;ອະນຸຍາດໃຫ້ຜູ້ຮັບເໝົານໍາເຂົ້າແຮງງານຕ່າງປະເທດໃນຊ່ວງດໍາເນີນການກໍ່ສ້າງ;ນະໂຍບາຍການເກັບຄ່າພາກຫຼວງໃນຊ່ວງດໍາເນີນງານໃນອັດຕາທີ່ໂຄງການສາມາດຈ່າຍໄດ້. ການໃຫ້ນະໂຍບາຍພິເສດດັ່ງກ່າວໄດ້ສ້າງຄວາມເພິ່ງພໍໃຈໃຫ້ແກ່ຜູ້ພັດທະນາແລະຜູ້ສະໜອງທຶນລວມທັງນະໂຍບາຍເປີດເສລີໃຫ້ຂາຍໄຟໄປຕ່າງປະເທດເພາະເວລານັ້ນລາວເຮົາກໍບໍ່ທັນມີຄວາມຕ້ອງການຊົມໃຊ້ໄຟຟ້າຫຼາຍນະໂຍບາຍພິເສດດັ່ງກ່າວໄດ້ເປັນສິ່ງຈູງໃຈໃຫ້ນັກລົງທຶນເຂົ້າມາພັດທະນາພະລັງງານໄຟຟ້ານໍ້າຕົກຈົນເກີດມີໂຄງການພັດທະນາເຂື່ອນໄຟຟ້າຈໍານວນທັງໝົດ 109 ໂຄງການ ດັ່ງທີ່ເຫັນໃນປະຈຸບັນ.ລັດຖະບານຊຸດຜ່ານມາກໍຮັບຮູ້ການສູນເສຍຜົນປະໂຫຍດດັ່ງກ່າວ, ແຕ່ກໍ່ເຫັນໄດ້ວ່າພວກເຮົາມີຄວາມຈໍາເປັນແລະໃນອານາຄົດພາຍຫຼັງໂຄງການສິ້ນສຸດອາຍຸສໍາປະທານໂຄງການທັງໝົດກໍຈະກາຍເປັນຊັບສິນຂອງປະເທດຊາດແລະປະຊາຊົນ, ໝາຍວ່າລັດຖະບານໄດ້ສ້າງຊັບສິນ (ເຂື່ອນໄຟຟ້ານໍ້າຕົກ) ມູນຄ່າມະຫາສານໄວ້ໃຫ້ຄົນຮຸ່ນຫຼັງໄດ້ສືບຕໍ່ນໍາໃຊ້ເພື່ອພັດທະນາປະເທດຊາດ.
ຕົກມາສູ່ຍຸກປັດຈຸບັນ, ສະພາບການມີການປ່ຽນແປງເຊັ່ນ: ແຫຼ່ງຊັບພະຍາກອນທີ່ສາມາດພັດທະນາເຂື່ອນໄຟຟ້າແມ່ນຫຼຸດໜ້ອຍລົງ, ນັກລົງທຶນທັງພາຍໃນແລະຕ່າງປະເທດສົນໃຈຢາກມາພັດທະນາຫຼາຍຂຶ້ນເຖິງຂັ້ນຍາດແຍ່ງກັນເພື່ອພັດທະນາໂຄງການແລະສົ່ງອອກໄຟຟ້າໄປຕ່າງປະເທດໂດຍກົງແລະຕ້ອງລົງທຶນກໍ່ສ້າງສາຍສົ່ງຂ້າມຊາຍແດນໄປເອງ; ຜູ້ຊື້ຕ່າງປະເທດມີຄວາມໜ້າເຊື່ອຖືດີກວ່າ, ສະເໜີໃຫ້ລາຄາໄຟຟ້າທີ່ສູງກວ່າໄດ້ຮັບນະໂຍບາຍຍົກເວັ້ນພາສີອາກອນແບບດຽວກັນກັບການຂາຍໄຟໃຫ້ພາຍໃນ. ສະນັ້ນ, ຜູ້ລົງທຶນຈຶ່ງສຸມໃສ່ການຜະລິດເພື່ອສົ່ງອອກແລະບໍ່ຕ້ອງການຂາຍໃຫ້ກັບພາຍໃນເພາະລາຄາຖືກກວ່າ. ໃນຂະນະດຽວກັນ, ຄວາມຕ້ອງການຊົມໃຊ້ໄຟຟ້າພາຍໃນເພີ່ມຂຶ້ນຈຶ່ງຈະມີຄວາມສ່ຽງທີ່ປະເທດເຮົາຈະບໍ່ມີໄຟພຽງພໍກັບຄວາມຕ້ອງການພາຍໃນໄລຍະອັນໃກ້ນີ້.ຖ້າລັດຖະບານຈະສືບຕໍ່ນໍາໃຊ້ນະໂຍບາຍຄືສະໄໝເປີດປະເທດໃໝ່ໆເມື່ອ 40 ປີກ່ອນ,ກໍຈະໄດ້ຮັບຜົນປະໂຫຍດບໍ່ສົມຄູ່ກັບທ່າແຮງດັ່ງກ່າວບວກກັບປັດຈຸບັນລັດຖະບານຕ້ອງຂຸດຄົ້ນລາຍຮັບຈາກທຸກທ່າແຮງກໍຄືຂະຫຍາຍຖານລາຍຮັບເພື່ອໄດ້ງົບປະມານມາກໍ່ສ້າງພື້ນຖານໂຄງລ່າງ-ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນຂອງປະເທດແລະສະພາບການຂາດແຄນພະລັງງານໃນລະດູແລ້ງ (ເນື່ອງຈາກວ່າພາຍໃນປະເທດເຮົາແມ່ນເພິ່ງພາເຂື່ອນໄຟຟ້ານໍ້າຕົກຫຼາຍກວ່າ 95% ຂອງພະລັງງານທັງໝົດ).
ດ້ວຍເຫດນັ້ນ, ລັດຖະບານຈຶ່ງມີຄວາມຈໍາເປັນຕ້ອງມີການທົບທວນຄືນບັນດານະໂຍບາຍຕ່າງໆຄືນໃໝ່ເພື່ອໃຫ້ແທດເໝາະກັບສະພາບພາຍໃນ, ພາກພື້ນແລະສາກົນທີ່ມີການປ່ຽນແປງໂດຍສະເພາະແມ່ນການທົບທວນນະໂຍບາຍທາງດ້ານພາສີ, ອາກອນ, ຄ່າສໍາປະທານເພື່ອເຮັດໃຫ້ການລົງທຶນໃນແຫຼ່ງຜະລິດເພື່ອຂາຍໄຟຟ້າໃຫ້ພາຍໃນມີຜົນຕອບແທນຕໍ່ການລົງທຶນດີກວ່າການຂາຍໄປຕ່າງປະເທດແຕ່ລາຄາໄຟບໍ່ສູງລວມທັງນະໂຍບາຍເພື່ອນໍາໃຊ້ທ່າແຮງແຫຼ່ງພະລັງງານສະອາດໃຫ້ກາຍເປັນເຄື່ອງຈັກຂັບເຄື່ອນການຫັນເປັນອຸດສາຫະກໍາຊຶ່ງຈະເປັນພື້ນຖານຂອງເສດຖະກິດທີ່ເຂັ້ມແຂງແລະຍືນຍົງຕາມແນວທາງນະໂຍບາຍຂອງພັກແລະລັດຖະບານໃນໄລຍະໃໝ່.
ໃນໂອກາດຂຶ້ນລາຍງານຄັ້ງນີ້, ທ່ານ ມະໄລທອງ ກົມມະສິດ ກໍໄດ້ສະເໜີທິດທາງ ແລະ ມາດຕະການແກ້ໄຂບັນຫາ ແລະ ພັດທະນາຂະແໜງພະລັງງານໃນຕໍ່ໜ້າ ເພື່ອແກ້ໄຂຂໍ້ຄົງຄ້າງທີ່ຜ່ານມາ ແລະ ພັດທະນາຂະແໜງພະລັງງານໃຫ້ເຂັ້ມແຂງ, ຍືນຍົງ ແລະ ໃຫ້ປະເທດຊາດ-ປະຊາຊົນ ໄດ້ຮັບຜົນປະໂຫຍດຫຼາຍຂຶ້ນ ເປັນຕົ້ນຄືການຄົ້ນຄວ້າ ແລະ ເຈລະຈາສັນຍາກັບຜູ້ພັດທະນາ ທີ່ປະເທດເຮົາເສຍປຽບຫຼາຍ ໃນໄລຍະຜ່ານມາ; ໃຫ້ບູລິມະສິດແກ່ການສະໜອງພະລັງງານ ເພື່ອການຊົມໃຊ້ ແລະ ພັດທະນາອຸດສາຫະກຳພາຍໃນປະເທດ; ພັດທະນາພະລັງງານທາງເລືອກ ເພື່ອຫຼຸດຜ່ອນການເພິ່ງພາພະລັງງານນໍ້າຫຼາຍເກີນໄປ; ດຶງດູດ ແລະ ຄັດເລືອກນັກລົງທຶນທີ່ດີ ເພື່ອຮ່ວມມືກັບລັດຖະບານ ພັດທະນາໂຄງການພະລັງງານ; ອຳນວຍຄວາມສະດວກ, ຊຸກຍູ້ ແລະ ຊ່ວຍເຫຼືອ ເພື່ອເລັ່ງພັດທະນາໂຄງການພະລັງງານ ທີ່ໄດ້ສຶກສາ ຫຼື ສຳປະທານແລ້ວ; ປະຕິຮູບລະບົບການເງິນ ແລະ ການບໍລິຫານ; ປະຕິຮູບລັດວິສາຫະກິດໄຟຟ້າລາວ ແລະ ບໍລິສັດລູກ ໃຫ້ມີຄວາມຄືບໜ້າໄວຂຶ້ນ.
ທ່ານ ມະໄລທອງ ກົມມະສິດ ກ່າວອີກວ່າ: ທິດທາງໃນຕໍ່ໜ້າ ແມ່ນຕ້ອງສ້າງການຫັນປ່ຽນປະເທດເຮົາ ຈາກການເປັນ “ໝໍ້ໄຟໃຫ້ແກ່ກຳໄລຂອງຕ່າງປະເທດ” ມາເປັນ “ເສດຖະກິດທີ່ມີອຸດສາຫະກຳເຂັ້ມແຂງດ້ວຍພະລັງງານຕົນເອງ” ຕາມທິດເສດຖະກິດເອກະລາດ ເປັນເຈົ້າຕົນເອງ ໂດຍການເຈລະຈາໜີ້ສິນ, ໃຫ້ບູລິມະສິດແກ່ການສ້າງອຸດສາຫະກຳພາຍໃນ, ສ້າງຄວາມຄວາມຫຼາກຫຼາຍທາງດ້ານການຜະລິດພະລັງງານ ແລະ ສ້າງໂຄງການລົງທຶນແບ່ງປັນຜົນປະໂຫຍດທີ່ຄຸ້ມຄ່າ-ເປັນທໍາ. ເຮັດແນວນີ້ໄດ້, ສປປ ລາວ ກໍມີຄວາມສາມາດທີ່ຈະສ້າງເສດຖະກິດທີ່ເຂັ້ມແຂງ ບົນພື້ນຖານການມີຂະແໜງພະລັງງານ ເປັນແຮງຂັບເຄື່ອນໃນອະນາຄົດ.
(ຂ່າວ-ພາບ: ສຸກສະຫວັນ)
ຄໍາເຫັນ