ທ່ານນາງ ວັດທະນາ ດາລາລອຍ ໄດ້ຊີ້ແຈງຕໍ່ຄໍາຖາມກ່ຽວກັບການຈັດຕັ້ງປະຕິບັດຄາດໝາຍເງິນຕາ ໃນການພັດທະນາເສດຖະກິດ-ສັງຄົມ ແລະ ວາລະແຫ່ງຊາດວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ຊຶ່ງສັງລວມແລ້ວແມ່ນກ່ຽວກັບບັນດາເປົ້າໝາຍທີ່ກຳນົດ ເຫັນວ່າມີບາງເປົ້າໝາຍທີ່ ທຫລ ສາມາດຈັດຕັ້ງປະຕິບັດໄດ້ບັນລຸເປົ້າໝາຍ ແລະ ບາງຕົວຊີ້ວັດທີ່ຍັງບໍ່ທັນຈັດຕັ້ງປະຕິບັດໄດ້ເທື່ອ ເປັນຕົ້ນລະດັບຄັງສຳຮອງເງິນຕາຕ່າງປະເທດທີ່ສາມາດກຸ້ມການນໍາເຂົ້າໄດ້ພຽງ 5 ເດືອນ ການສະໜອງທຶນໃຫ້ຜູ້ປະກອບການ MSMEs ຍັງບໍ່ທັນກວ້າງຂວາງ ແລະ ທົ່ວເຖິງ.
ຕໍ່ບັນຫາດັ່ງກ່າວ, ທຫລ ໄດ້ມີມະຕິຂອງສະພາແຫ່ງຊາດສະບັບເລກທີ 154/ສພຊ, ລົງວັນທີ 12 ທັນວາ 2024 ປະກອບມີ 8ຄາດໝາຍສໍາລັບຂະແໜງການທະນາຄານຄື:ປະລິມານເງິນຂະຫຍາຍຕົວບໍ່ໃຫ້ເກີນ 20%;ການຄຸ້ມຄອງອັດຕາແລກປ່ຽນໃຫ້ເໜັງຕີງຢູ່ໃນລະດັບບໍ່ກົດດັນຕໍ່ອັດຕາເງິນເຟີ້;ການຄຸ້ມຄອງອັດຕາເງິນເຟີ້ໃຫ້ຢູ່ໃນລະດັບ 1 ຕົວເລກໃນທ້າຍປີ 2025;ລະດັບຄັງສຳຮອງເງິນຕາຕ່າງປະເທດສາມາດກຸ້ມການນໍາເຂົ້າຢ່າງຕໍ່າ 5 ເດືອນຂຶ້ນໄປ;ການຄຸ້ມຄອງລາຍຮັບຈາກການສົ່ງອອກຜ່ານລະບົບທະນາຄານບໍ່ໃຫ້ຫຼຸດ 75% ຂອງມູນຄ່າການສົ່ງອອກທັງໝົດ;ຍອດເຫຼືອເງິນຝາກຂອງທະນາຄານທຸລະກິດບັນລຸ 110% ຂອງ GDP;ຍອດເຫຼືອສິນເຊື່ອຂອງລະບົບທະນາຄານບັນລຸໄດ້ 62% ຂອງ GDP;ອັດຕາສ່ວນໜີ້ບໍ່ເກີດດອກອອກຜົນຢູ່ໃນລະດັບບໍ່ເກີນ 3% ຂອງຍອດສິນເຊື່ອທັງໝົດ.ຕໍ່ກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໄດ້ກຳນົດອີກ 7 ຕົວຊີ້ວັດຄື:ອັດຕາເງິນເຟີ້ໃຫ້ຢູ່ໃນລະດັບບໍ່ເກີນ 9% ໃນທ້າຍປີ 2025;ອັດຕາແລກປ່ຽນໃຫ້ເໜັງຕີງສອດຄ່ອງກັບດຸນຍະພາບທາງດ້ານເສດຖະກິດ-ເງິນຕາ ແລະ ບໍ່ສ້າງແຮງກົດດັນຕໍ່ອັດຕາເງິນເຟີ້;ການຄຸ້ມຄອງລາຍຮັບຈາກການສົ່ງອອກຜ່ານລະບົບທະນາຄານບໍ່ຫຼຸດ 70%;ຄັງສຳຮອງເງິນຕາຕ່າງປະເທດບໍ່ຫຼຸດ 3 ເດືອນ;ອັດຕາສ່ວນໜີ້ບໍ່ເກີດດອກອອກຜົນບໍ່ເກີນ 3% ຂອງຍອດສິນເຊື່ອທັງໝົດ;ຖານະການຊຳລະປົກກະຕິເກີນດຸນຢູ່ໃນລະດັບ 2% ຂອງGDP ແລະຕົວຊີ້ວັດຕິດພັນກັບຄວາມໝັ້ນຄົງຂອງສະຖາບັນການເງິນ. ຊຶ່ງຕົວຊີ້ວັດທີ່ສະພາແຫ່ງຊາດຮັບຮອງທີ່ຕິດກັນກັບແຜນເງິນຕາຄາດວ່າສາມາດຈັດຕັ້ງປະຕິບັດໄດ້ 5 ໃນ 8 ຕົວຊີ້ວັດ ແລະ ຕົວຊີ້ວັດຕິດພັນກັບວາລະແຫ່ງຊາດ ຄາດຈະສາມາດຈັດຕັ້ງປະຕິບັດໄດ້ທັງໝົດ 7 ຕົວຊີ້ວັດ.
ຂ່າວ: ນາງ ພູວັນ, ພາບ: ສຸກສະຫວັນ
ຄໍາເຫັນ