 |
ໃນພິທີ ສະຫາຍວັນລາຕີ ຄໍາວານວົງສາ ກ່າວວ່າ: ລາວ ແລະ ຈີນ ເປັນປະເທດບ້ານໃກ້ເຮືອນຄຽງ ທີ່ມີຊາຍແດນຕິດຈອດກັນດ້ວຍສາຍພູ ແລະ ແມ່ນໍ້າລຳເຊ, ປະຊາຊົນສອງຊາດ ມີສາຍພົວພັນມິດຕະພາບອັນເປັນມູນເຊື້ອ ໄປມາຫາສູ່ກັນມາແຕ່ບູຮານນະການ. ການເວລາເຖິງຈະໝູນວຽນປ່ຽນໄປ, ແຕ່ມິດຕະພາບຄວາມຮັກແພງ ກໍຍິ່ງເລິກເຊິ່ງຂຶ້ນ.
ນັບແຕ່ປີ 2014 ເປັນຕົ້ນມາ, ສະຖານີພວກເຮົາ ແລະ ສະຖານີວິທະຍຸ ແລະ ໂທລະພາບກວາງຊີ ໄດ້ ຮ່ວມກັນຈັດລາຍການ "ໂຮງລະຄອນຈີນ", "ກາຕູນຈີນ" ຊຶ່ງໄດ້ອອກອາກາດ ຫຼາຍກວ່າ 3,000 ຕອນ ເຊັ່ນ: ລະຄອນເລື່ອງ "ຄວາມຝັນໃນຫໍແດງ", "ລູກສາວແຫ່ງພູໃຫຍ່", "ມື້ແຫ່ງແສງສະຫວ່າງ”; ກາຕູນ ເລື່ອງ "ຄ້ອງບັ້ງວິເສດ", "ການເດີນທາງມະຫັດສະຈັນຂອງປາກວຍ", "ມັງກອນດອກ”, “ຂົວລົມ” ແລະ ອື່ນໆ ໄດ້ເປີດໜ້າຕ່າງໃໝ່ ເຮັດໃຫ້ພວກເຮົາເຫັນພາບລວມຂອງສອງປະເທດ ແລະ ໄດ້ຮູ້ຈັກກວາງຊີ. ຮູ້ຈັກຈີນຫຼາຍຍິ່ງຂຶ້ນ. ນອກນີ້ ກໍຍັງໄດ້ຮ່ວມກັນຖ່າຍທຳສາລະຄະດີຫຼາຍເລື່ອງ ເຊັ່ນ: "ເລື່ອງລາວແຫ່ງ ການເວລາ" ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ຈີນ ຄົບ ຮອບ 55 ປີຊຶ່ງໄດ້ຜົນຕອບຮັບຢ່າງກວ້າງຂວາງ ຢູ່ສອງປະເທດ.
 |
ການຮ່ວມມືຂອງ ສອງສະຖານີ 10 ກວ່າປີຜ່ານມານັ້ນ, ໄດ້ສະທ້ອນໃຫ້ເຫັນມິດຕະພາບລາວ-ຈີນ, ບັນທຶກເລື່ອງລາວອັນອົບອຸ່ນ ແລະ ໝາກຜົນອັນໜ້າຊົມຊື່ນ ໃນການຮ່ວມກັນສ້າງ "ໜຶ່ງແລວ ໜຶ່ງເສັ້ນທາງ" ແລະ "ການສ້າງຄູ່ຮ່ວມຊາຕາກຳລາວ-ຈີນ" ດ້ວຍເລນກ້ອງ ທັງໄດ້ຮ່ວມກັນຈັດກິດຈະກຳຕ່າງໆ. ປີນີ້, ສອງສະຖານີພວກເຮົາ ຈະສືບຕໍ່ຮ່ວມມື ແລະ ຮ່ວມກັນລົງນາມການຮ່ວມມື ພາຍໃຕ້ໂຄງການ “ ໂຮງລະຄອນຈີນ ແລະ ກາຕູນຈີນ ” ແລະ ຈະຂະຫຍາຍການຮ່ວມມື ໃນຂົງເຂດປັນຍາປະດິດ ຫຼື AI ແບບທົດລອງ (ລາຍການທີ່ນໍາໃຊ້ AI ເຂົ້າຊ່ວຍໃນການຜະລິດ), ເພື່ອສ້າງພະລັງຂັບເຄື່ອນໃໝ່ ໃຫ້ແກ່ການຜະລິດເນື້ອໃນຂອງພວກເຮົາ. ສືບຕໍ່ເສີມຂະຫຍາຍທ່າແຮງທີ່ຕັ້ງໜ້າ, ສ້າງກິດຈະກຳແລກປ່ຽນວັດທະນະທໍາ-ສັງຄົມ ໃຫ້ຫຼາຍຂຶ້ນ, ເພື່ອຊຸກຍູ້ການສືບທອດ ແລະ ເສີມຂະຫຍາຍມິດຕະພາບລາວ-ຈີນ.
ສະຖານີໂທລະພາບແຫ່ງຊາດລາວ ຈະສືບຕໍ່ໃນການຮ່ວມມືບົນຈິດໃຈ "ເພື່ອນບ້ານທີ່ດີ, ເພື່ອນມິດທີ່ດີ, ສະຫາຍທີ່ດີ, ຄູ່ຮ່ວມງານທີ່ດີ" ທັງ 4 ປະການ, ເດີນຄຽງບ່າຄຽງໄຫຼ່ ກັບສະຖານີວິທະຍຸ ແລະ ໂທລະພາບກວາງຊີ ແລະ ຄູ່ຮ່ວມງານສື່ມວນຊົນຈີນອື່ນໆ, ປະກອບສ່ວນດ້ານສື່ມວນຊົນ ເຂົ້າໃນການສ້າງຄູ່ຮ່ວມຊາຕາກໍາລາວ-ຈີນ ທີ່ມີປະສິດທິພາບ, ປະສິດທິຜົນສູງຂຶ້ນເທື່ອລະກ້າວ.
ສະຫາຍ ນາງ ເສີນ ປີ້ ຈຸ່ນ ກ່າວວ່າ: ຕະຫຼອດໄລຍະຜ່ານມາ, ສະຖານີວິທະຍຸ ແລະ ໂທລະພາບກວາງຊີ ແລະ ສະຖານີໂທລະພາບແຫ່ງຊາດລາວ ໄດ້ຢຶດໝັ້ນຈິດໃຈແຫ່ງການຊ່ວຍເຫຼືອຊຶ່ງກັນ ແລະ ກັນ, ມີວິໄສທັດຮ່ວມກັນ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ ຢ່າງເປັນຮູບປະທຳ, ຮັກສາສາຍພົວພັນຮ່ວມມືທີ່ແໜ້ນແຟ້ນ ແລະ ໝັ້ນຄົງ. ທັງສອງຝ່າຍໄດ້ເສີມຂະຫຍາຍການຮ່ວມມືດ້ານການເຜີຍແຜ່ວັດທະນະທຳຢ່າງເລິກເຊິ່ງ.
 |
ສື່ມວນຊົນ ແມ່ນຂົວຕໍ່ທີ່ເຊື່ອມຕໍ່ຈິດໃຈຂອງປະຊາຊົນແລະ ເປັນຂົວຜ່ານແຫ່ງການຮໍ່າຮຽນວັດທະນະທໍາ, ໃນມື້ນີ້ ແມ່ນຈຸດເລີ່ມຕົ້ນໃໝ່ ແລະ ຍັງເປັນການຮ່ວມມືທີ່ເລິກເຊິ່ງກວ່າເກົ່າຂອງທັງສອງຝ່າຍ, ໂອກາດໃໝ່ ສໍາລັບການກ້າວໄປພ້ອມກັນ. ບົນພື້ນຖານເວທີອັນໃໝ່ຂອງ “ປີ ມິດຕະພາບ ລາວ-ຈີນ”, ໃນອະນາຄົດ, ພວກເຮົາຫວັງວ່າຈະໄດ້ເພີ່ມທະວີການຮ່ວມມືຍຸດທະສາດດ້ານສື່ມວນຊົນ ທີ່ຫຼາກຫຼາຍ ແລະ ທຸກລະດັບ ກັບສະຖານີ ໂທລະພາບແຫ່ງຊາດລາວ. ໂດຍອີງໃສ່ທ່າໄດ້ປຽບຂອງສື່ມວນຊົນໃໝ່, ນໍາໃຊ້ເຕັກໂນໂລຊີ AI, ການເຜີຍແຜ່ແບບດີຈີຕອນ ແລະ ວິທີການທັນສະໄໝອື່ນໆ ເປັນຕົ້ນ, ສ້າງນະວັດຕະກຳຮູບແບບການຮ່ວມມືສື່ມວນຊົນຫຼາຍຮູບຫຼາຍແບບ, ເພີ່ມຄວາມອຸດົມສົມບູນຂອງເນື້ອໃນ, ຂະຫຍາຍມິຕິຂອງການເຜີຍແຜ່, ເພື່ອເລົ່າເລື່ອງລາວອັນສະຫງ່າງາມຂອງມິດຕະພາບອັນດີງາມ ຮ່ວມກັນ ລະຫວ່າງ ລາວ-ຈີນ.
(ຂ່າວ: ແສງຈັນ)
ຄໍາເຫັນ