ຖອດຖອນບົດຮຽນການຄຸ້ມຄອງຮັກສາສາຍສົ່ງໄຟຟ້າແຮງສູງ 500 ກິໂລໂວນ

ວັນທີ 8 ທັນວາ ຜ່ານມາ ທີ່ຫ້ອງວ່າການເມືອງເງິນ ແຂວງໄຊຍະບູລີ ໄດ້ຈັດກອງປະຊຸມສະຫຼຸບຖອດຖອນບົດຮຽນ ວຽກງານຄຸ້ມຄອງຮັກສາສາຍສົ່ງໄຟຟ້າແຮງສູງ 500 ກິໂລໂວນ ໂດຍການເຂົ້າຮ່ວມເປັນກຽດ ມີທ່ານ ທອງພັນ ສຸກສະຫວັດ ຮອງເຈົ້າເມືອງໆເງິນ, ມີທ່ານ ຍຸດທະນາ ຈຸນພັນທອງ ຜູ້ອໍານວຍການຝ່າຍສື່ສານອົງກອນ ແລະ ພັດທະນາສັງຄົມ ບໍລິສັດໄຟຟ້າຫົງສາ ຈໍາກັດ,  ມີບັນດາຄະນະກໍາມະການຄຸ້ມຄອງລະບົບສາຍສົ່ງໄຟຟ້າແຮງສູງ 500 ກິໂລໂວນ, ມີທ່ານນາຍບ້ານທີ່ມີແລວສາຍສົ່ງຜ່ານ ທັງ 3 ເມືອງ ຄື: ເມືອງເງິນ, ເມືອງຫົງສາ, ເມືອງຊຽງຮ່ອນ ແລະ ທີມງານຂອງບໍລິສັດໄຟຟ້າຫົງສາ ຈໍາກັດ ເຂົ້າຮ່ວມ; ທ່ານ ຄົມເພັດ ແກ້ວພິລາ ຕ່າງໜ້າ ບໍລິສັດ ໄຟຟ້າຫົງສາ ຈໍາກັດໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດ ວຽກງານການຄຸ້ມຄອງ ແລະ ປົກປັກຮັກສາສາຍສົ່ງໄຟຟ້າແຮງສູງ 500 ກິໂລໂວນ ປະຈຳປີ 2023 ແລະ ທິດທາງແຜນການ ປີ 2024. ຜ່ານມາ ຄະນະກໍາມະການພວກເຮົາແມ່ນໄດ້ເອົາໃຈໃສ່ ປຸກລະດົມພໍ່ແມ່ປະຊາຊົນ ທັງສາມເມືອງໄດ້ມີສ່ວນຮ່ວມໃນການປົກປັກຮັກສາແລວສາຍສົ່ງໄຟຟ້າແຮງສູງ ເປັນຕົ້ນການອະນາໄມຕັດຫຍ້າ, ຕັດຕົ້ນໄມ້ ສ້າງແລວກັນໄຟ.  ກ້ອງແລວສາຍສົ່ງ 500 ກິໂລໂວນ, ເປັນແຕ່ລະໄລຍະ ໂດຍເລີ່ມແຕ່ເດືອນກຸມພາ-ເດືອນພຶດສະພາ ພ້ອມທັງມີການກວດກາເຝົ້າລະວັງໄຟປ່າ ແລະ ການຈູດສວນຂອງປະຊາຊົນ ເພື່ອທໍາການຜະລິດ ທີ່ຈະສົ່ງຜົນກະທົບ ແລະ ຄວາມປອດໄພ ຕໍ່ໄຟຟ້າໃນໄລຍະລະດູແລ້ງຂອງທຸກໆປີ.
     ຈາກນັ້ນ, ບັນດາທ່ານທີ່ເຂົ້າຮ່ວມກອງປະຊຸມ ກໍໄດ້ແລກປ່ຽນຄໍາຄິດເຫັນ ໂດຍໄດ້ຍົກໃຫ້ເຫັນ ຈຸດອອ່ນ ແລະ ຂໍ້ຄົງຄ້າງ ຕໍ່ວຽກງານຄຸ້ມຄອງປົກປັກຮັກສາຍສົ່ງໄຟຟ້າແຮງສູງ 500 ກິໂລໂວນ ໃນໄລຍະຜ່ານມາ ເພື່ອແນໃສ່ເຮັດໃຫ້ການຄຸ້ມຄອງປົກປັກຮັກສາສາຍແຮງສູງ 500 ກິໂລໂວນ ມີຄວາມປອດໄພໃຫ້ນັບມື້ດີຂຶ້ນໄປເລື້ອຍໆ.
     ຕອນທ້າຍ ກໍໄດ້ມອບເງິນສະໜັບສະໜູນ ຄ່າອະນາໄມສ້າງແລວກັນໄຟປະຈໍາງວດ II ໃຫ້ກັບອົງການປົກຄອງບ້ານ ຂອງປີ 2023 ຈໍານວນ 92.276.000 ກີບ ຊຶ່ງໃຫ້ກຽດມອບໂດຍແມ່ນທ່ານ ຍຸດທະນາ ຈຸນພັນທອງ ຜູ້ອໍານວຍການຝ່າຍສື່ສານອົງກອນ ແລະ ພັດທະນາສັງຄົມ ບໍລິສັດ ໄຟຟ້າຫົງສາ ຈໍາກັດ ໃຫ້ກຽດຂຶ້ນຮັບໂດຍແມ່ນຕາງໜ້າ ນາຍບ້ານທີ່ມີແລວສາຍສົ່ງຜ່ານ ທັງ 3 ເມືອງ.
(ຂ່າວ-ພາບ ສຸລີຍາ ແສງເດືອນ)